El miércoles fina'l plazu pa presentar candidatures a los XXXII Premios Andrés Solar

 L'actu d'entrega va ser el 16 d'avientu.
.

 Un añu más la Xunta pola Defensa de la Llingua Asturiana (XDLA) convoca los Premios Andrés Solar pa premiar a aquelles persones o entidaes que fixeron pola normalización del asturianu, asina como pa 'reconocer' a los que destacaron por tolo contrario. Los primeros reciben el Pegollu, mentes que los segundos son merecedores de la Madreña de purpurina.

 Tolos ciudadanos pueden presentar les candidatures pa dambos gallardones, xunto a un razonamientu, hasta'l miércoles al corréu electrónicu info@exunta.org. Un xuráu escoyerá a los ganadores ente toles propuestes recibíes.                                         Fonte: Asturies.com

L’Arribada anuncia a los nominaos pa los Premios Timón 2017

• . L'Arribada abre la convocatoria pa la presentación de candidatures pa los Premios Timón

  Tres zarrar el plazu de presentación de candidatures el llunes, l’Asociación Cultural L’Arribada anunció a los nominaos pa les trés categoríes de los Premios Timón 2017. A lo llargu d’esti mes, un xuráu va escoyer la terna definitiva d’aspirantes a los gallardones.

  Los candidatos al premiu más veteranu, el XI Premiu Timón p’autores en llingua asturiana y eonaviego, al que concurren aquellos escritores nacíos nel añu 1967 o anteriores, son Lurdes Álvarez, Pablo Antón Marín Estrada, Xandru Martino, Cristina Muñiz Martín, Xosé Miguel Suárez, Belén Rico, Adolfo Camilo Díaz, Taresa Lorences, Ignaciu Llope, Consuelo Vega, Xilberto Llano y Ánxel Álvarez Llano. Mentes, al VIII Premiu Timón p’autores asturianos en llingua castellana van aspirar José Luis Piquero, Paco Abril, Aurelio González Ovies, Pepe Monteserín, José María Ruilópez, Carmen Gómez Ojea, Herme G. Donis, Luis Arias Argüelles-Meres, Pedro de Silva y Ángel García Prieto.

  Por último, el llistáu de nominaos al V Premiu Timón de Cultura Asturiana, que valora a les asociaciones, sociedaes, fundaciones y instituciones con sede n’Asturies que tengan como fin "la conservación y promoción de la identidá cultural de nueso, y a persones con una trayeutoria valoratible nesi ámbitu", ta compuestu por Iniciativa pol Asturianu, Asociación Cultural San Tirso del Eo, Fundación Belenos y ‘Reciella. Families pol asturianu’.
Fonte: asturies.com

L'ALLA abre'l plazu pa presentar candidatures al primer Premiu Nacional de Lliteratura Asturiana

 

Ana María Cano y Xosé Antón González Riaño

'Academia de la Llingua Asturiana (ALLA)presentó esti martes el Premiu Nacional de Lliteratura Asturiana. Esti premiu tendrá calter triañal y con él buscase "facer pública reconocencia del llabor normalizador que representa la creación lliteraria nel idioma d’Asturies".

D'igual forma, según esplicó Ana María Cano, presidenta de l'ALLA, que tuvo acompañada pol vicesecretariu Xosé Antón González Riaño, con esti gallardón anunciáu mientres el pasáu Día de les Lletres Asturianes la institución pretende tamién poner en valor "el fundamental papel que xueguen los y les escritores en llingua asturiana nel caltenimientu de la cultura del pueblu asturianu". Asina, van poder presentase candidatures hasta'l 1 d'avientu d'aquelles persones vives que tuvieren una destacada trayeutoria lliteraria nel nuesu idioma a lo llargo del tiempu.

El ganador o ganadora recibirán el premiu coincidiendo cola celebración del Día de les Lletres Asturianes. El premiu consiste nun Medayón distintivu del Premiu, fechu pol escultor Adolfo Manzano, una dotación económica de 3.000€  y l'ALLA espublizará una antoloxía representativa de la produccción lliteraria del autor con una edición exclusiva y qu'espeye la importancia del premiu.

Con esti premiu dende l'Academia quieren "suplir una carencia institucional" 

Les bases del premiu son les siguientes:

Primera

El Premiu Nacional de Lliteratura Asturiana, que tendrá calter triañal y cuntará con una dotación económica de 3.000 €, nun podrá xebrase en más d’un autor o autora, nun podrá ser declaráu ermu nin concedese a títulu póstumu.

Segunda

Premiaráse al conxuntu de toa una trayeutoria lliteraria, fecha a lo llargo del tiempu en llingua asturiana.

Tercera

Podrán presentar candidatures al premiu:

L’Academia de la Llingua Asturiana.
Les instituciones culturales y llingüístiques asitiaes nel territoriu del dominiu llingüísticu ástur.
Cualquier de los miembros del xuráu.
La presentación fairáse al traviés d’escritu empobináu a l’ALLA nel que se conseñarán los méritos lliterarios de los autores propuestos, asina como una amuesa representativa de la so producción escrita (al rodiu de 50 páxines).

Les propuestes y la documentación habrán apurrise enantes del día 1 d’avientu anterior al añu de la convocatoria.

Cuarta

El xuráu del Premiu Nacional de Lliteratura Asturiana formaránlu:

El Presidente o Presidenta de l’ALLA.
3 miembros de númberu de la institución.
1 representante de la Conseyería d’Educación y Cultura del Gobiernu d’Asturies.
2 personalidaes de reconocíu prestixu del mundu universitariu especialistes en lliteratura asturiana.
La presidencia de l’ALLA fairá tamién el llabor de presidencia del xuráu, mentanto que la representación de la Conseyería d’Educación y Cultura llevará la secretaría del mesmu. La xera deliberadora del xuráu ha ser secreta y del resultáu daráse anuncia a lo cabero del mes de xineru del añu de la convocatoria.

Quinta

El ganador o ganadora recibirán el premiu coincidiendo cola celebración del Día de les Lletres Asturianes. Arriendes de la dotación económica, el premiáu o premiada recibirá un Medayón Distintivu del Premiu. L’ALLA espublizará una pequeña antoloxía representativa de la producción lliteraria del autor.                                                                 Fonte: asturies.com

Abiertu'l plazu pa presentar candidatures pa los XVI Premios de la Crítica d'Asturies

  Hai estaya de meyor obra narrativa n'asturianu, asina como de poesía.

  La Asociación d'Escritores d'Asturies convoca los XVI Premios de la Crítica d'Asturies y los XI Premios de les Lletres, amás del Premiu a la Meyor Columna Periodística. Hasta'l 30 de xunetu cualquier persona física o xurídica pue mandar candidatures pa los meyores trabayos del 2015, pa lo qu'han de remitise a la direición del coleutivu: Hotel d'Asociaciones Santuyano, na cai Fernández Ladreda 48, 33011 d'Uviéu.

  Los XVI Premios de la Crítica convócanse en cuatro estayes: narrativa n'asturianu y castellanu, y poesía n'asturianu y castellanu. Na edición del 2015, Roberto González-Quevedo llevó'l gallardón con ‘Hestoria de la ḷḷiteratura primera en Pesicia’ y Alejandro Fernández-Osorio col poemariu 'Magaya'.

  María Esther García López, presidenta de l'Asociación d'Escritores d'Asturias, anima tolos autores "a presentase a estos premios que contribúin a dignificar la lliteratura fecha n'Asturies, tanto en castellanu como n'asturianu”. Nel documentu axuntu a esta noticia pue consultase, en castellanu, les bases de tolos gallardones.                       Fonte: asturies.com

Adxuntu	Tamañu
bases_premios_de_la_critica_2016.doc	92.5 KB

L’Arribada abre’l plazu pa presentar candidatures pa los Timón 2016

por Pablo R. Guardado

Fina’l 10 d’avientu pa les trés categoríes. Nesta edición aspiren al gallardón los escritores nacíos nel añu 1966 o enantes.

Los Premios Timón creáronse nel 2007 col oxetivu de “reconocer la trayeutoria creativa de los escritores d’Asturies”. Nun primer momentu, taben centraos nos autores qu’emplegaben la llingua asturiana o eonaviego, anque dende’l 2010 sumóse una segunda categoría p’aquellos escritores del país qu’usaren el castellanu. Finalmente, nel 2013, l’Asociación Cultural L'Arribada sumó un Timón nuevu, el de Cultura Asturiana, nesti casu destináu a “asociaciones, sociedaes, fundaciones ya instituciones con sede n’Asturies que tengan como fin la conservación y promoción de la identidá cultural de nueso, y a persones con una trayeutoria valoratible nesi ámbitu”.

Dende ayeri, y hasta’l 10 d’avientu, ye posible presentar candidatures a les tres categoríes nel corréu lletrónicu larribada@gmail.com. Éstes pueden facese de manera individual o en nome d’un coleutivu. Nesta ocasión aspiren a los Timón lliterarios los autores nacíos nel 1966 o enantes.

Trés xuraos valorará ente toles candidatures presentaes a la persona o entidá merecedora del X Premiu Timón p’autores en llingua asturiana y eonaviego, del VII Premiu Timón p’autores asturianos en llingua castellana y del IV Premiu Timón de Cultura Asturiana. Los ganadores recibirán una obra del ceramista y escultor xixonés Jesús Castañón na XI Vagamar.

Palmarés

Los ganadores del Timón n’asturianu y eonaviego son: Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013),  Xosé Bolado (2014) y Esther Prieto (2015). Mentes, llevaron el d’autores asturianos en castellanu Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013),  Carmen Ruiz-Tilve (2014) y Francisco García Pérez (2015).

Por último, nes trés ediciones del Timón de Cultura Asturiana resultaron condecoraos  l’Asociación Cultural Ensame Sidreru (2013), la Xunta pola Defensa de la Llingua Asturiana (2014) y l’Asociación pola Recuperación de los Sidros y les Comedies ‘El Cencerru’ (2015).

Fonte: Asturies.com