Pablo Rodríguez Alonso algama’l Premiu Críticu de les Lletres Asturianes na estaya d’ensayu

Pablo Rodríguez Alonso algama’l Premiu Críticu de les Lletres Asturianes na estaya d’ensayu


por Pablo R. Guardado
L’historiador Pablo Rodríguez Alonso consiguió’l Premiu Críticu de les Lletres Asturianes na categoría d’ensayu pol so estudiu sobre’l discursu del diariu Voluntad. La XDLA entama esti gallardón pola ausencia del idioma nos Premios de la Crítica.

'De totalitarios a «demócrates». Franquismu, fascismu y nazismu na II Guerra Mundial al traviés del diariu xixonés Voluntad’ ye’l nome del ensayu que convenció al xuráu conformáu por Rafael R. Valdés, Antón García y Xuan Xosé Sánchez Vicente, que falló por unanimidá a favor de la investigación del xixonés “pola so contribución a los estudios históricos, de la que destacaron el rigor nel tratamientu de la información y el so bon facer metodolóxicu, abordando cuestiones históriques internacionales al traviés del estudiu de lo local”. Nesti trabayu –ganador tamién del XII Premiu d’investigación histórica Rosario de Acuñal’– l’autor fai un repás al discursu ellaboráu dende Voluntad, mediu d’espresión oficial del falanxismu xixonés, un periódicu que va ser la voz de los vencedores de la Guerra Civil y nel que los mensaxes de venganza contra los vencíos, d’emponderamientu del totalitarismu nazi y fascista y de denuncia de la democracia y les llibertaes van ser una constante. Sicasí, como conseña’l llibru, esi discursu va dir cambiando a medida que l’escenariu internacional, marcáu pola Segunda Guerra Mundial, vaya averándose a la derrota final d’Alemaña, Italia y Xapón. El llibru ta espublizáu por Zahorí Ediciones.

Rodríguez Alonso (Xixón, 1979) recibió con satisfaición la noticia del fallu d’esti premiu dende’l so domiciliu en Breizh, onde reside por motivos de trabayu. Nun mensaxe na rede social Facebook, quixo dar les gracies “al xuráu del premiu que tuvo a bien valorar esti trabayu; un xuráu formáu amás por trés persones que tanto fixeron, faen y toi seguru van facer pola cultura del país”, y a la Xunta pola Defensa de la Llingua Asturiana“ por entamar estos premios y por siguir lluchando depués de tantos años pol futuru del idioma”. El coleutivu cívicu convoca estos gallardones, de manera esceicional, como respuesta a l’ausencia de la llingua asturiana nos XIII Premios de la Crítica de l’Asociación d’Escritores d’Asturies. De momento, a falta de conocer el ganador na estaya de narrativa, Berta Piñán llevóse’l de lliteratura infantil y xuvenil y Xabiero Cayarga, el de poesía. L’actu d’entrega de los premios va tener llugar el 30 de payares, a les 19.30 hores, na galería d’arte uviedina El Texu. Tres el mesmu, va convidase a los presentes a Vinu de Calidá de Cangas Ḷḷumes y a quesu Afuega’l pitu Cá Sanchu.

Fonte: Asturies.com

Critiquen a l'Asociación d'Escritores por suprimir l'asturianu nos Premios de la Crítica

La Xunta Pola critica a l'Asociación d'Escritores por suprimir la categoría d'asturianu de los Premios de la Crítica


La Xunta pola Defensa de la Llingua Asturiana (XDLA) llamentó esti xueves fondamente la decisión final de l'Asociación d'Escritores d'Asturies de nun incluyir nos XIII Premios de la Crítica d'Asturies a los escritores en llingua asturiana.

Al traviés d'una nota de prensa, recuerda que esta asociación d'escritores "venía convocando dende l'añu 2003 delles categoríes pa les obres publicaes n'asturianu nel añu anterior a la convocatoria, pero esti añu namás se puen presentar a concursu les obres en castellanu". "L'Asociaciónargumenta, ente otres cuestiones, la falta d'obres en llingua asturiana concurrentes a concursu, lo que pa nós nun ye más qu'una demostración d'inorancia o despreciu al bon facer de los y les escritores porque a lo llargo del 2011 publicáronse 141 obres n'asturianu, númberu bultable qu'echa embaxo cualquier argumentación sobre la escasez de producción lliteraria nel idioma autóctonu", critica la Xunta.

Refuga también l'argumentu de la crisis ecónomica, pues "persabemos que les editoriales, instituciones y persones interesaes collaboraben cola asociación de manera que'l costu económicu de les categoríes d'asturianu venía siendo prácticamente inesistente".

Dende la Xunta pola Defensa de la Llingua Asturiana, consideren que "más bien lo qu'hai ye pocu o nengún interés en fomentar la lliteratura n'asturianu dende esta asociación: lo que s'escuende, daveres, ye una actitú prexuiciosa pa col idioma y qu'esti premiu valora más la forma (la llingua) que'l fondu (la calidá lliteraria)".

Considera la Xunta "especialmente grave que seya l'Asociación d'Escritores d'Asturies la que discrimine la llingua asturiana cuando son sabedores de que nun se pue falar de lliteratura n'Asturies ensin incluir a los y les escritores na llingua propia".

Por too esto, la Xunta pola Defensa de la Llingua Asturiana, vese "obligada" a convocar, de forma escepcional, los "Premios Críticos de les Lletres Asturianes, que van reconocer en cuatro categoríes -lliteratura infantil y xuvenil, narrativa, poesía y ensayu- les obres publicaes a lo llargo del 2011 n'asturianu y gallego-asturianu. Un xuráu de persones espertes en caúna de les materies va ser l'encargáu d'otorgar estos Premios". La entrega de premios va facese'l vienres 30 de payares, a les 19.30 hores, na galería d'arte El Texu (c/ El Postigu Baxu 13, d'Uviéu).

Fonte: Europa Press