Xixón vive un wikialcuentru na Nueche d'Ánimes

  Celebróse la pasada nuechi, taller d'edición d'artículos sobre mitoloxía y tradiciones

   Wikimedia n'Asturianu entama un alcuentru en Xixón na Nueche d'Ánimes. L'oxetivu ye celebrar un taller d'edición d'artículos pa Uiquipedia sobre mitoloxía y tradiciones.

   Los asistententes tamién podrán participar nun taller p'afuracar nabos y calabaces, como se facía tradicionalmente n'Asturies, nun amagüestu y presenciar películes de terror. El llugar onde van desendolcase toles actividaes, que van principiar a les 20 hores, ye'l llocal de la Sociedá Cultural Xixonesa, na cai Miranda númberu 4.

   Nel casu de querer participar nel taller d'afuracar nabos y calabaces, los asistentes han de trayer la hortalexa, los preseos de corte y una vela. D'igual forma, pese a que'l llocal cuenta con bar, encamiéntase a los participantes a llevar comida pa compartir.

Fonte: asturies.com

I Concursu de Videopoesía "República de la Poesía"

 

Cartelu del I Concursu de Videopoesía

   Una serie de colectivos culturales ciudadanos sofiten la iniciativa de convocar el primer Concursu de Videopoesía “República de la Poesía”: el Colectivu Artísticu Musa Cafeína, l'Atenéu Obreru de Xixón, la Sociedá Cultural Xixonesa, el Espaciu Cultural La Manzorga y el Colectivu Versos Llibres.

   Tratase de que, a partir de la obra poética, la vida y los enclinos políticos de Machado, cualquier persona col so móvil, cámara dixital o cualesquier otru dispositivu afayadizu, traduza les imaxes poétiques o escenes de la vida del poeta n'imaxes que puedan proxectase, faciendo de la orixinalidá, l'usu estéticu de les nueves tecnoloxíes y la palabra, un argumentu y una forma d'espresión.  Fonte:  Asturnews.

La Sociedá Cultural Xixonesa critica l'involucionismu llingüísticu del FICXixón

La Sociedá Cultural refuga los cambeos producíos anguaño nel nome de dos seiciones del Festival Internacional de Cine. Pa la Sociedá Cultural Xixonesa "la sustitución de les denominaciones de “Llendes” y “Esbilla” respectivamente por "Límites” y “Gran Angular” supon un pasu tras na siempres precaria normalización del usu institucional de la llingua asturiana. Un fechu tan risible y arbitrariu solamente ye esplicable dende una concepción desaxeradamente probe y vergoñosa de la cultura asturiana. Asina anque paeza increíble inda hai xestores culturales que dende una mentalidá provinciana marcada pol autuodiu entienden la cultura asturiana como una realidá divorciada de la cultural universal, cuando lo universal precisamente se construye dende la integración de les aportaciones singulares de los distintos pueblos y non dende homoxeneidaes impuestes", señalen dende'l coleutivu. Asina, dende la Sociedá Cultural Xixonesa améstense a la crítica realizada pola Xunta pola Defensa de la Llingua Asturiana, y reclamen la rectificación del gobiernu del conceyu, qu'al xuiciu de la XDLA carauterízase nesti llaceriosu casu "pol pasotismu y el cosmopaletismu", tanto na figura del responsable del festival, como na del propiu conceyal de cultura, Carlos Rubiera. Fonte: Infoasturies

Presentóse el númberu 32 de la revista "Asturies. Memoria encesa d'un país"

La revista "Asturies" sigue'l so camín dempués de cuasi dos décades d'actividá

Un momentu de la presentación: Javier Cubero y Bertu Peña

   Esti martes 12 de marzu celebróse nel llar de la Sociedá Cultural Xixonesa un actu de presentación del númberu 32 de la revista “Asturies, memoria encesa d’un país” de la Fundación Belenos. Nél intervinieron l'etnógrafu Berto Peña, del conseyu de redacción, y Javier Cubero, autor d'unu de los artículos publicaos nesti númberu. Darréu de la presentación del númberu abrióse un alderique col públicu presente.

   Berto Peña  -Alberto Álvarez Peña-  realizó una repás hestóricu de les distintes actividaes que vien realizando la Fundación nos caberos años, tres lo qu'esplicó l'actual situación de la revista, que pasa a ser añal. Amás, comentó dalgunos de los artículos nuevos que van poder vese en númberos próximos, asina como los proyectos de la Fundación Belenos pal so congresu añal, que celebren en La Puela.

   Pela so parte, Javier Cubero, que tamién collabora na revista, destacó la urxencia de xenerar "pontes y circuitos ente los distintos sectores del texíu sociocultural asturianu", señalando que "la retroalimentación ye fundamental pa una sociedá civil viva y dinámica".

   Fonte:  Asturnews.

Sociedá Cultural Xixonesa y Fundación Belenos: Asturies. Memoria encesa d'un país

La Sociedá Cultural Xixonesa acueye la presentación de la revista Asturies de la Fundación Belenos númberu 32

   El martes 12 de marzu los llocales de la Sociedá Cultural Xixonesa, allugaos na cai Balmonte de Miranda, 4, entlu. dcha., a les 19.00 hores, van acoyer un actu de presentación del númberu 32 de la revista “Asturies. Memoria encesa d’un país” de la Fundación Belenos.

   La espublización recueye los trabayos que vienen darréu: “El mayéu Busián (L.lena): orixe d’una braña na Edá del Bronce” (Jorge Camino Mayor), “Los torques d’Argul (Pezós)” (Alberto Álvarez Peña y Alfonso Fanjul Peraza), “Les cases soportalaes d’Avilés y les sos «mirilles»” (Manuel Mallo Viesca), “Delles considerances alredor de Xosé Faes «capitán de los carlistes, resurrección de Pelayo»” (Javier Cubero de Vicente), “Peslleres, maniyes y picaportes. Artesanía del fierro nes puertes de les cases asturianes” (Inaciu Hevia Llavona y Alberto Álvarez Peña), “Don Pelayo, primer rei de los astures. Testimoniu d’una saga escaecida: la hermana de Don Pelayo” (Gausón Fernande Gutierri), “El potru, un elementu etnográficu escaecíu” (Daniel Cueli Canto), “Normes xenerales pal usu y disfrute de la sidra” (Inaciu Hevia Llavona) y “El Son d’Arriba y los Cantos de Ramos nel Val.le de Naviegu (Cangas del Narcea)” (Santos Nicolás Aparicio).

   Fonte:  Asturnews.

La figura de Pin de Pría protagonizó la última xornada sobre republicanismu federal

Un momentu de la charra

El pasáu día 23 de mayu el periodista Inaciu Galán participó con una comunicación sobre l’escritor Pin de Pría nes xornaes sobre republicanismu federal entamaes pola asociación N’ast y la Sociedá Cultural Xixonesa na sede d’esta última institución. La charra centróse nun primer momentu en dar a conocer la vida y obra del que ye ún de los autores clásicos más reconocíos de les lletres asturianes. Darréu Galán estudió la influencia que pudo tener la so militancia política como republicanu federal na decisión de convertise n’escritor n’asturianu, qu’en pallabres del propiu Pin asocedió lleendo un artículu d’un reconocíu federalista.
Diose un repás tamién a les obres de Pin de Pría, destancando como pesie a la so encesa defensa del idioma asturianu, los artículos qu’espublizaba en prensa yeren entá en castellán, por mor de la diglosia predominante na dómina.
L’alderique centróse darréu nun discutiniu sobre les razones del menor desenrrollu y más tardiegu de la reivindicación llingüística n’Asturies, en comparanza con otros territorios del estáu español con llingua propia.
El profesor José Girón zarrará les xornaes nel mes de xunu.
Javier Cubero esplicó los aspectos nacionalitarios del PDRF asturianu

Un momentu de la conferencia
Dientro del ciclu d'hestoria del republicanismu federal n’Asturies, l’ensayista Javier Cubero dio una charra sobre’l papel hestórico del Partíu Democráticu Republicanu Federal na formación d’una conciencia política sobre la singularidá d’Asturies como país. Asina tres reivindicar una enfoque hestoriográficu “dende abaxo y dende Asturies” esplicó la evolución d’esa organización política, les carauterístiques soberanistes del proyectu constitucional que proponía en 1883 pa un futuru Estáu Asturianu, la campaña xunitaria pol autogobiernu del País que se promovió dende les sos files en 1897, y la implicación de dalgunos de los sos militantes nel desendolcu del nomáu “asturianismu cultural”, especialmente en rellación col coleutivu La Quintana.
El miércoles 23 de mayu, acabaron les xornaes (a falta de recuperar la charra de José Girón, que por enfermedá tuvo de retrasar la so conferencia) cola charra “Pin de Pria, un escritor federal na lliteratura asturiana” pol escritor ya investigador, Inaciu Galán.

Fontes: asturnews 1, asturnews 2

N'ast y Sociedá Cultural Xixonesa: xornaes al federalismu n'Asturies

N’ast y la Sociedá Cultural Xixonesa dediquen unes xornaes al federalismu n’Asturies La Sociedá Cultural Xixonesa y l’Asociación Cultural N’Ast organicen unes xornaes como ctividá conxunta a partir del llunes que vien, 14 de mayu. Les charres van xirar al rodiu del Partíu Democráticu Republicanu Federal, una fuercia política de calter anticaciquil que tuvo una importante presencia na sociedá asturiana ente los años 1868 y 1936. Esti sector destacó na so dómina pola so reivindicación del exerciciu de la soberanía pa la ciudadanía asturiana, llegando inclusive a plantegar en 1883 una propuesta de Constitución pa un futuru Estáu Asturianu. Na primer xornada l’hestoriador Faustino Zapico va dar llectura a la conferencia “El pensamientu federalista de Pi i Margall”, sedrá de magar les ocho la tarde. El miércoles 16 sedrá’l turnu del “Republicanismu na Asturies de la I Restauración”, de la mano de José Girón, profesor d’Hestoria Contemporánea de la Universidá d’Uviéu, a la mesma hora y ne mesmu llugar, la sede de la Sociedá Cultural Xixonesa, asitiada na cai Balmonte Miranda, 4, entlu. Dcha, de Xixón. Les siguientes dos charres van tener llugar el llunes 21 de mayu, de la mano del ensayista ya investigador Javier Cubero, con “La dimensión asturianista del Partíu Democráticu Republicanu Federal”, y dos díes más tarde, el miércoles 23 de mayu, cola charra “Pin de Pria, un escritor federal na lliteratura asturiana” pol escritor ya investigador, Inaciu Galán. Fonte: Asturnews