El FICXixón caltién los Cines Centru como sede

   Les sales úniques nel centru de la ciudá zarraron les sos puertes en xunetu.

   El Festival Internacional de Cine de Xixón (FICXixón) anunció esta mañana que va poder siguir faciendo usu de les cinco sales de los Cines Centru, pese a que tán inactives dende xunetu, pa la edición próxima del certame tres llegar a un alcuerdu col alministrador concursal. Nacho Carballo, direutor del FICXixón, apuntó la so “enorme satisfaición por esta disposición, lo que permitirá siguir ufriendo al públicu de Xixón les sos 1.500 butaques na edición próxima del festival”, que va desendolcase del 20 al 28 de payares.

   D'esta forma, el FICXixón evitar llevar les sos proyeiciones fuera del centru de la ciudá, yá que les sales úniques abiertes na villa son los Yelmos Ocimax Xixón, nel barriu de La Calzada.                                                                                                     Fonte: asturies.com

La Sociedá Cultural Xixonesa critica l'involucionismu llingüísticu del FICXixón

La Sociedá Cultural refuga los cambeos producíos anguaño nel nome de dos seiciones del Festival Internacional de Cine. Pa la Sociedá Cultural Xixonesa "la sustitución de les denominaciones de “Llendes” y “Esbilla” respectivamente por "Límites” y “Gran Angular” supon un pasu tras na siempres precaria normalización del usu institucional de la llingua asturiana. Un fechu tan risible y arbitrariu solamente ye esplicable dende una concepción desaxeradamente probe y vergoñosa de la cultura asturiana. Asina anque paeza increíble inda hai xestores culturales que dende una mentalidá provinciana marcada pol autuodiu entienden la cultura asturiana como una realidá divorciada de la cultural universal, cuando lo universal precisamente se construye dende la integración de les aportaciones singulares de los distintos pueblos y non dende homoxeneidaes impuestes", señalen dende'l coleutivu. Asina, dende la Sociedá Cultural Xixonesa améstense a la crítica realizada pola Xunta pola Defensa de la Llingua Asturiana, y reclamen la rectificación del gobiernu del conceyu, qu'al xuiciu de la XDLA carauterízase nesti llaceriosu casu "pol pasotismu y el cosmopaletismu", tanto na figura del responsable del festival, como na del propiu conceyal de cultura, Carlos Rubiera. Fonte: Infoasturies

La XDLA critica la castellanización de dos seiciones del FICXixón

Alejandro S. García La organización del FICXixón camuda'l nome de dos de les sos seiciones más importantes, Esbilla y Llendes, que van pasar a llamase Gran Angular y Límites respectivamente. La XDLA califica la decisión como ‘cosmopaletismu’. Según el Direutor del certame, Nacho Carballo, “fuera d’Asturies naide sabe lo que significa llendes, pero sí límites.” Pa la Xunta pola Defensa del Asturianu la midida supon un grave pasu pa tras na visibilización del nuesu idioma, y la xustificación nun ye más qu’una amuesa de ‘cosmopaletismu’, una y bones el festival yá tien prestixu internacional nel ámbitu del cine independiente y l'usu del asturianu “ yá taba aceptáu como dalgo normal ensin qu’en nengún momentu supunxere dalgún problema.” La organización llanza tamién dures crítiques escontra'l Conceyal de Cultura Carlos Rubiera, pol so “pasotismu na defensa de los drechos llingüísticos de tolos asturianos” cuandu siempre repite que ye un defensor del asturianu. Nel so comunicáu la Xunta ataca a los argumentos de Nacho Carballo con el exemplu del Festival de Cine de Donostia (Zinemaldia), que les sos seiciones tienen nomes como Zabaltegi y nun torga que'l festival gocie d'un evidente prestixu n'Europa. Amás recuerden qu'una auditoría sobre’l turismo en Xixón señaló la valoración del patrimoniu cultural a traviés del usu del asturianu como dalgo positivo. Por tou esto soliciten a la organización del Festival la restitución de los sos nomes orixinales, y reclamen al Conceyal de Cultura “coherencia ente les pallabres y los fechos.” Fonte. Asturies.com