Presentación n'Uviéu del númberu 34 de la revista "Asturies, memoria encesa d'un país"

Nueva presentación d'esta espublización empobinada pol Fundación Belenos.

El prósimu vienres, 9 de xineru, va presentase'l númberu 34 de la revista editada pola Fundación Belenos, “Asturies, memoria encesa d’un país”. Va ser a partir de les 19’30 hores nel chigre Ca Beleño (cai Martínez Vigil, 4 – Uviéu). 

Esti actu rematará con un Homenaxe a Beleño, cola actuación a cargu de dellos músicos –ente ellos Xuan Prado y Frankie Delgado, fundadores del grupu– que van interpretar dalgunes de les composiciones más nomaes d’esta mítica banda.

Fonte: Infoasturies

El celtismu llingüísticu y García Arias protagonicen el númberu 34 de la revista Asturies

La Fundación Belenos vieno acabante d’asoleyar esta selmana pasada'l númberu 34 de la so revista, “Asturies, memoria encesa d’un país”, na qu'amás de les estayes habituales, como Memoria Gráfica d’Asturies, nesta ocasión firmada por Antón Álvarez Sevilla y dedicada a apurrir dellos datos ya imáxenes sobre les nueses races autóctones nun asoleyaos enantes en trabayos de so, y Cartafueyos de Belenos, la espublización recueye trabayos de munchu interés como'l firmáu por García Arias alrodiu del celtismu llingüísticu n'Asturies. La llista d'artículos d'esti númberu 34 entámala "Averamientu a la ecoloxía de los conceyos asturianos del Altu Navia" por Fernando Montes García y síguela "Una reflexón sol celtismu llingüísticu asturianu" de Xosé Lluís García Arias, tres del que pue lleese l'artículu "Afayu d’una estela con decoración castreña n’Antrialgu (Piloña)" por mor de la investigación d'Ástur Paredes, Daniel Cueli Canto y Alberto Álvarez Peña. Completen esti númeru dellos otros artículos como "El guerreru durmiente" d'Alberto Álvarez Peña; "El palu: un arma na tradición asturiana" de Gausón Fernande Gutierri, "Catalogar pa protexer: el padremuñu etnográficu del conceyu de Cabrales" de Diego Ruiz de la Peña Ruiz y Alberto Álvarez Uría y "El “Celta o Astur”, una escultura de Folgueras" de Lluis Portal Hevia. El caberu de los artículos col que se pieslla'l númberu ye "Cill Áirne: trenta años d’un viaxe iniciáticu a la verde Erín" firmáu por Ignaciu Llope. La revista va distribuyise ente los suscriptores nos prósimos díes y yá se pue mercar nes llibreríes Ojanguren (Uviéu), Paradiso (Xixón) y Rima (L’Infiestu). Fonte: Asturnews

La Fundación Belenos presenta'l númberu 33 d'"Asturies, memoria encesa d'un país"

Belenos presentó'l númberu 33 de so revista
El vienres 29 de payares la Fundación Belenos presentó nel Botánicu de Xixón el númberu 33 de la revista "Asturies, memoria encesa d'un país". Nesta nueva edición destaca la espublización d'un bayurosu reportaxe firmáu por Ignacio Abella, y entituláu "El Felechu", autor que va tar presente na presentación xunto a collaboradores davezu de la revista como Berto Álvarez Peña, Ástur Paredes, Xulio Concepción, Xosé Nel Riesgo, y Jesús Martínez Salvador.    El númberu 33 de la revista Asturies de la Fundación Belenos vieno acabante d'asoleyase no postrero d'esti branu con dellos trabayos d'ente los que destacaba'l descubrimientu d'un nuevu asentamientu castreñu n'Asturies.    Nel segundu númeru de la revista nesti 2013 “Asturies, memoria encesa d’un país” presenta un trabayu col títulu de “Un nuevu asentamientu castreñu n’Asturies: El Castillón d’Antrialgo, Piloña”, que presenta un importante descubrimientu arqueolóxicu y vien robláu polos etnógrafos Xuan Fernández-Piloñeta, Alberto Álvarez Peña y Daniel Cueli Canto. El trabayu sírve-yos a los autores pa documentar un castru que nun yaba catalogáu hasta esti momentu ya que nun apaecía na Carta Arqueolóxica del conceyu.     Amás d'esti trabayu, el númeru 33 de la revista tamién recueye un trabayu sobre “El felechu” d'Ignacio Abella, l'entituláu “Horros beyuscos: nel cantu’l desaniciu” d'Ástur Paredes y Gausón Fernande, “Delles representaciones de sierpes nos retablos asturianos” d'Alberto Álvarez Peña, un repasu “A vueltes col paxellu asturianu: les monteres” por Gausón Fernande Gutierri y un analís de la lleenda “La muyer xabaz qu’echa les mamielles al costín: una lleenda asturiana y los sos pareyos universales” fechu por Jesús Suárez López. Xunta estos trabayos completa el númberu l'estudiu “Siempre de camín, ente la casa y la cabana” de Xulio Concepción Suárez.           Fonte:  Asturnews.

El númberu 33 d'‘Asturies, memoria encesa d’un país’ yá ta na cai

Pablo R. Guardado La Fundación Belenos ta acabante d’asoleyar el númberu 33 de la revista ‘Asturies, memoria encesa d’un país’. La espublización, que pasa a ser de calter añal, recueye un bon puñáu d’artículos d’interés de temática variada. Nesta ocasión, los llectores van atopar los testos siguientes: ‘El felechu’, d’Ignacio Abella; ‘Un nuevu asentamientu castreñu n’Asturies: El Castillón d’Antrialgu, Piloña’, de Xuan Fernández-Piloñeta, Daniel Cueli Canto y Alberto Álvarez Peña; ‘Horros beyuscos: nel cantu’l desaniciu’, d’Ástur Paredes y Gausón Fernande; ‘Delles representaciones de sierpes nos retablos asturianos’, d’Alberto Álvarez Peña; ‘A vueltes col paxellu asturianu: les monteres’, de Gausón Fernande Gutierri; ‘La muyer xabaz qu’echa les mamielles al costín: una lleenda asturiana y los sos pareyos universales’, de Jesús Suárez López; y ‘Siempre de camín, ente la casa y la cabana’, de Xulio Concepción Suárez. Amás, la espublización va contar coles sos estayes habituales ‘Memoria Gráfica d’Asturies’, nesta ocasión dedicada a la caza del bardión asturianu, ‘L’Estoxu’ y ‘Cartafueyos de Belenos’. La revista, que pasa a ser de calter añal por decisión del conseyu de redaición, yá ta repartiéndose ente los suscriptores. En feches próximes tamién va tar disponible nes llibreríes principales del país al preciu de 15 euros. Fonte: Asturies.com

Presentóse el númberu 32 de la revista "Asturies. Memoria encesa d'un país"

La revista "Asturies" sigue'l so camín dempués de cuasi dos décades d'actividá

Un momentu de la presentación: Javier Cubero y Bertu Peña

   Esti martes 12 de marzu celebróse nel llar de la Sociedá Cultural Xixonesa un actu de presentación del númberu 32 de la revista “Asturies, memoria encesa d’un país” de la Fundación Belenos. Nél intervinieron l'etnógrafu Berto Peña, del conseyu de redacción, y Javier Cubero, autor d'unu de los artículos publicaos nesti númberu. Darréu de la presentación del númberu abrióse un alderique col públicu presente.

   Berto Peña  -Alberto Álvarez Peña-  realizó una repás hestóricu de les distintes actividaes que vien realizando la Fundación nos caberos años, tres lo qu'esplicó l'actual situación de la revista, que pasa a ser añal. Amás, comentó dalgunos de los artículos nuevos que van poder vese en númberos próximos, asina como los proyectos de la Fundación Belenos pal so congresu añal, que celebren en La Puela.

   Pela so parte, Javier Cubero, que tamién collabora na revista, destacó la urxencia de xenerar "pontes y circuitos ente los distintos sectores del texíu sociocultural asturianu", señalando que "la retroalimentación ye fundamental pa una sociedá civil viva y dinámica".

   Fonte:  Asturnews.

Sociedá Cultural Xixonesa y Fundación Belenos: Asturies. Memoria encesa d'un país

La Sociedá Cultural Xixonesa acueye la presentación de la revista Asturies de la Fundación Belenos númberu 32

   El martes 12 de marzu los llocales de la Sociedá Cultural Xixonesa, allugaos na cai Balmonte de Miranda, 4, entlu. dcha., a les 19.00 hores, van acoyer un actu de presentación del númberu 32 de la revista “Asturies. Memoria encesa d’un país” de la Fundación Belenos.

   La espublización recueye los trabayos que vienen darréu: “El mayéu Busián (L.lena): orixe d’una braña na Edá del Bronce” (Jorge Camino Mayor), “Los torques d’Argul (Pezós)” (Alberto Álvarez Peña y Alfonso Fanjul Peraza), “Les cases soportalaes d’Avilés y les sos «mirilles»” (Manuel Mallo Viesca), “Delles considerances alredor de Xosé Faes «capitán de los carlistes, resurrección de Pelayo»” (Javier Cubero de Vicente), “Peslleres, maniyes y picaportes. Artesanía del fierro nes puertes de les cases asturianes” (Inaciu Hevia Llavona y Alberto Álvarez Peña), “Don Pelayo, primer rei de los astures. Testimoniu d’una saga escaecida: la hermana de Don Pelayo” (Gausón Fernande Gutierri), “El potru, un elementu etnográficu escaecíu” (Daniel Cueli Canto), “Normes xenerales pal usu y disfrute de la sidra” (Inaciu Hevia Llavona) y “El Son d’Arriba y los Cantos de Ramos nel Val.le de Naviegu (Cangas del Narcea)” (Santos Nicolás Aparicio).

   Fonte:  Asturnews.