La iconografía del arte popular asturianu, de la mano d'Alvarez Peña

• Álvarez Peña va falar de la ‘Iconografía del arte popular asturianu’ na charra d’Ástura

Na semeya, Bertu Álvarez Peña y Amadéu Benavente

  L'etnógrafu protagonizó la charra mensual d'Ástura nel Atenéu Obreru de Xixón.

  Los presentes pudieron conocer de la mano d'Alberto Álvarez Peña los símbolos que s'atopen n’horros, paneres, arcones, sobrepuertes de cases, cuernes de mecer, gaxapos o marcos de pan y quesu, ente otros, y lo sos significaos. Asina, cruces o custodies amiéstense con símbolos solares como hexapételes, radiales, tetrasqueles o esvástiques o culiebres, de calter proteutor na tradición non cristiana. Más allá de lo decorativu, no fondero trescala’l raigañu proteutor de la collecha, el ganáu y la vida.

  El tercer martes d'avientu, el día 15, va celebrase otra charra de calter ciéntificu y divulgativu de temática asturiana d'Ástura. Nesta ocasión va centrase finalmente nes novedaes de la escavación del castiellu de Gauzón, prevista en principio pa esti mes.
Fonte: asturies.com

Álvarez Peña (Bertu Peña) va falar de la ‘Iconografía del arte popular asturianu’ na charra d’Ástura

 Celebróse la charra mensual d’Ástura nel Atenéu Obreru de Xixón

Na semeya. Alberto Álvarez Peña. Bertu Peña

  Esti martes, a les 20 hores –media hora más tarde del horariu habitual–, celebróse la charra mensual d’Ástura nel Atenéu Obreru de Xixón. Nesta ocasión el convidáu foi Alberto Álvarez Peña, que faló de la ‘Iconografía del arte popular asturianu’.

  L’etnógrafu, poro, esplicónos cómo lo qu’entendemos como arte popular y que vemos n’horros, paneres, arcones, sobrepuertes de cases, cuernes de mecer, gaxapos o marcos de pan y quesu, ente otros, nun tien sólo un enfotu decorativu. “No fondero trescala’l raigañu proteutor de la collecha, el ganáu y la vida. Hexapételes, radiales, tetrasqueles o esvástiques nun son debuxos xeométricos ensin más; vencéyense al sol que frañe les tiniebles yá dende los tiempos de les vieyes relixones paganes”, espliquen dende l’Asociación Cultural Ástura sobre esti tipu de motivos, que se define n’ocasiones col nome xenéricu de ‘arte pastoril alpinu’. “Munches veces estes iconografíes fúndense nun sincretismu cola simboloxía cristiana de cruces, cálices o custodies, y abondos d'ellos podemos rastrexalos na dómina’l bronce y atopalos notres fasteres d’Europa coles que podemos tener un acervu cultural común”, añaden.

     El so protagonista, el xixonés Álvarez Peña, ye bien conocíu nel país pol so escomanáu trabayu dientro de la etnografía, sobre manera no que ye la mitoloxía y la tradición oral.                                                                                                                             Fonte: asturies.com

ÁSTURA ENTAMA UNA CHARRA SOBRE LES TRADICIONES ASTURIANES DE NAVIDÁ

    La charra mensual sobre cultura del país qu’entama l’asociación Ástura en collaboración col Atenéu Obreru de Xixón va centrase nes tradiciones asturianes de Navidá. Nella van participar Alberto Álvarez Peña y el coleutivu Reciella.

    Baxo’l nome de ‘La recuperación de les tradiciones asturianes de Navidá’, l’etnógrafu va facer un repás por delles tradiciones que se caltienen n’Asturies dende hai sieglos, munches d’elles compartíes por otros pueblos europeos, pero que tán a piques de desaniciase o son desconocíes por una bona parte de la población. Mentes, representantes de l’asociación de families que trabayen en tresmitir a los sos fíos la cultura y la llingua del país van reflexonar sobre les posibilidaes d'incorporación d'estes tradiciones anguaño nes celebraciones xuntos colos neños y neñes, yá sía trabayando na escuela o na propia familia.

    L’actividá va celebrase esta tarde, a les 19.30 hores, na sede del Atenéu Obreru de Xixón, asitiada na cai Cuadonga númberu 7, y tien entrada llibre. Ésta ye la segunda charra qu’entama esta seronda l’asociación cultural Ástura en collaboración con esta entidá –la primera centróse nel software llibre n’asturianu–, cola intención de dedicar una xornada tolos meses a la cultura asturiana.

   Fonte:  Asturies.com