La Llegra entama un ciclu de cine n'asturianu

Van proyeutase trés películes y una esbilla de curtios a lo llargo de tol mes de mayu.

Allargando les celebraciones de la Selmana de les Lletres, l'uvieín Llar La Llegra entama un 'Ciclu de cine n'asturianu' con sesiones tolos martes a partir de les 19.30 hores. La primer película en proyeutase va ser 'Bernabé', el primer llargumetraxe rodáu dafechu en llingua asturiana, con soníu 5.1 y con flaires de baldre, al igual que la entrada.

Les siguientes proyeiciones van ser 'Trainspotting', en versión orixinal sotitulada n'asturianu pola iniciativa Pelis N'ast (día 17); 'L'Acorazáu Potemkin', filme mudu retuláu n'asturianu por Gonzali Producciones (día 24); pa finar cola esbilla de curtios (día 31).

Fonte: Asturies.com

Naz Abellugu pa "crear un alderique social alredor del asturianismu"

 Esti llunes presentóse nel uviedín Llar La Llegra esta iniciativa nacida na rede.

 El proyeutu tien el so niciu hai un añu nes redes sociales, al traviés del IRC y del grupu de Facebook 'Ca Asturies', conformáu por un piñu de persones esmolecíes por Asturies, la so política y la so cultura. Tres munchos alderiques, siempre los domingos a les 20.30 hores na canal d'IRC-Hispano de mesmu nome, decidieron dar un pasu más y entamar Abellugu cola fin de "crear un alderique social alredor del asturianismu", esplica Xurde Lluis González Lains, ún de los sos entamadores.

 El primer pasu foi crear una páxina web na que la xente interesao en collaborar pue apuntase, pa depués pasar a dar a conocer la so propuesta per distintos puntos del país. Ayeri n'Uviéu celebróse la primer d'elles, con una recepción "positiva" ente los presentes. "Queremos qu'Abellugu sía una plataforma qu'axunte xente asturianista y non asturianista, pa falar de temes sobre Asturies", apunta González Lains. En definitiva, crear un texíu que sirva "pa recuperar Asturies pa los asturianos, dende'l pueblu y pal pueblu", como espliquen na so páxina web. "Tenemos milenta fueyes en blanco pa rellenales con toles propuestes que nos lleguen", añade'l miembru d'Abellugu sobre esta iniciativa que salta del ordenador al mundu físicu.

 La primer parte del procesu allargaráse hasta mediaos de marzu, momentu nel que se convocará un conceyu con toles persones interesaes en participar pa llegar a puntos d'alcuentru y afitar oxetivos. Pese a echar a andar recién, Abellugu pasó pronto de seis a venticinco miembros, una cifra que los sos entamadores esperen qu'aumente progresivamente según vayan faciéndose presentaciones en diferentes poblaciones del país. "La xente que conformamos Abellugu veninos de munchos ámbitos, como'l movimientu vecinal, el mundu del teatru o la informática, ente otros", confirma González Lains, qu'añade que "nun somos militante de nenguna organización política".

 Les persones interesaes en participar n'Abellugu pueden ponese en contautu cola plataforma rellenado el formulariu qu'apaez na so páxina web.                  Fonte: asturies.com

García Arias repasa esti vienres en La Llegra 40 años de reivindicación llingüística n'Asturies

Esti vienres a les 19:30 nel Llar La Llegra (Cai El Postigu Baxu 40, Uviéu)

   Charra a cargu de Xosé Lluís García Arias, caderalgu de Dialeutoloxía na Universidá d'Uviéu, primer presidente de Conceyu Bable y de l'Academia de la Llingua Asturiana dende la so creación, en 1981, a 2001 y máxima figura de la filoloxía asturiana.

   Un repás a la historia del movimientu de reivindicación llingüísticu n'Asturies dende la creación de Conceyu Bable, organización qu'entamó hai xusto 40 años, hasta anguaño. Llogros algamaos, perspeutives y retos pal patrimoniu llingüísticu del país.                Fonte: Infoasturies.net