Abiertu’l plazu pa presentase a la preba de conocencia del 28 de mayu de l’ALLA

L’Academia de la Llingua Asturiana vieno acabante de convocar la so preba de conocencia de la llingua de mayu pal próximu día 28, con un plazu de matrícula que va d’esti llunes 16 al xueves 26. 

Como tolos años a estes altures, l’ALLA, sabiendo’l fondu interés de munches persones de llograr que se reconoza la so conocencia de la llingua y manifestar asina'’l so fondu amor al idioma asturianu, fai la primer convocatoria añal pa poder evaluar diches conocencies. Nesta primer convocatoria la preba va celebrase’l 28 de mayu de 2014 y el plazu de matrícula pa la mesma ye del 16 al 26 d’esti mes.

Nesi sen, da anuncia de les sos iniciatives pa conocimientu xeneral, informando de que nel mes de mayu celébrense pruebes, abiertes a toles persones interesaes. Unos quince díes enantes de les pruebes ábrese un plazu de matrícula.Y a les persones declaraes aptes nes pruebes citaes, l’'Academia dará-yos un documentu onde s’afite la conocencia nel nivel 1 o básicu según calces siguíos por esta Institución.

Les persones que nun superen les pruebes del nivel 1 podrán presentase a nueves convocatories toles vegaes que-yos pruya. Pal bon resultáu d’estes prebes habrá tenese un dominiu básicu de les estayes que vienen darréu:

a. ESTAYA LLINGÜÍSTICA a.1. Teoría gramatical: conocencia y dominiu del funcionamientu gramatical del asturianu y de la normativa académica. a.2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita. a.3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador. b. ESTAYA DE LLINGUA Y SOCIEDÁ Conocencia del allugamientu de la llingua dientro de la sociedá asturiana asina como del procesu de normalización en que ta inxerta. 6. La preba va tener dos partes, una escrita (dictáu, torna, exercicios gramaticales, redaición) y otra falada (conversación).

Resulta imprescindible conocer les xeneralidaes gramaticales de la llingua  y los aspeutos básicos de la so normativa ortográfica (Normes ortográfiques, ALLA, Uviéu, 2012, 7ª ed.; Gramática de la Llingua Asturiana, ALLA, Uviéu, 2008, 3ª ed. reimpresión). Asina mesmo, aconséyase la llectura de testos fechos acordies cola normativa, como los asoleyaos por esta Academia.

Fonte: Asturnews

L’Arribada abre’l plazu pa presentar candidatures pa los Timón 2016

por Pablo R. Guardado

Fina’l 10 d’avientu pa les trés categoríes. Nesta edición aspiren al gallardón los escritores nacíos nel añu 1966 o enantes.

Los Premios Timón creáronse nel 2007 col oxetivu de “reconocer la trayeutoria creativa de los escritores d’Asturies”. Nun primer momentu, taben centraos nos autores qu’emplegaben la llingua asturiana o eonaviego, anque dende’l 2010 sumóse una segunda categoría p’aquellos escritores del país qu’usaren el castellanu. Finalmente, nel 2013, l’Asociación Cultural L'Arribada sumó un Timón nuevu, el de Cultura Asturiana, nesti casu destináu a “asociaciones, sociedaes, fundaciones ya instituciones con sede n’Asturies que tengan como fin la conservación y promoción de la identidá cultural de nueso, y a persones con una trayeutoria valoratible nesi ámbitu”.

Dende ayeri, y hasta’l 10 d’avientu, ye posible presentar candidatures a les tres categoríes nel corréu lletrónicu larribada@gmail.com. Éstes pueden facese de manera individual o en nome d’un coleutivu. Nesta ocasión aspiren a los Timón lliterarios los autores nacíos nel 1966 o enantes.

Trés xuraos valorará ente toles candidatures presentaes a la persona o entidá merecedora del X Premiu Timón p’autores en llingua asturiana y eonaviego, del VII Premiu Timón p’autores asturianos en llingua castellana y del IV Premiu Timón de Cultura Asturiana. Los ganadores recibirán una obra del ceramista y escultor xixonés Jesús Castañón na XI Vagamar.

Palmarés

Los ganadores del Timón n’asturianu y eonaviego son: Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013),  Xosé Bolado (2014) y Esther Prieto (2015). Mentes, llevaron el d’autores asturianos en castellanu Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013),  Carmen Ruiz-Tilve (2014) y Francisco García Pérez (2015).

Por último, nes trés ediciones del Timón de Cultura Asturiana resultaron condecoraos  l’Asociación Cultural Ensame Sidreru (2013), la Xunta pola Defensa de la Llingua Asturiana (2014) y l’Asociación pola Recuperación de los Sidros y les Comedies ‘El Cencerru’ (2015).

Fonte: Asturies.com

Abiertu'l plazu de solicitú pa participar na Axenda didáctica escolar por parte de los centros escolares

Los centros interesaos en participar na Axenda Didáctica Escolar d’anguaño van poder formalizar les sos solicitúes hasta’l día 5 de mayu del 2015, inclusive; han presentar modelu de solicitú debida­mente cubiertu según figura nel Anexu I de les normes de participación (Resolución de 28 de xineru del 2013, de la Conseyería d'Educación, Cultura y Deporte, pola que s'establecen les normes de participación na Axenda Didáctica Escolar (BOPA de 12-II-2013), modificada por Resolución de 24 de setiembre del 2014, de la Conseyería d’Educación, Cultura y Deporte. Cada centru ha solicitar siempre 4 proyeutos, marcando un orde de preferencia (con calter escepcional, cuando nun s’ufierten proyeutos suficientes pal grupu d’etapes o variedá llingüística podrán solicitase menos proyeutos, siendo valorada la mentada solicitú pola comisión). La solicitú tien que la facer el direutor/a, xefe/a d’estudios o secretariu/a del centru y la fecha de cada actuación ha alcordase ente la entidá participante y el centru educativu. Ha cuntar col preste de la Direición Xeneral de Política Llingüística. Énte la posibilidá de que’l númberu de solicitúes supere la ufierta, aconséyase que los centros d’una mesma zona alcuerden solicitar de forma conxunta l’asistencia a una de les actividaes, axuntando a la solicitú l’alcuerdu por escrito de tolos centros participantes (cola firma de los sos direutores). L'Anexu I y les fiches de cada proyeutu van poder descargase na páxina web www.educastur.es. Fonte: Asturnews

Sigue abierta la convocatoria del XVIII Concursu de Cuentos pola Oficialidá del Asturianu

El concursu sigue recibiendo trabayos hasta'l 9 de mayu.

El Conceyu Bimenes t’acabante de convocar el XVIII Concursu de Cuentos pola Oficialidá del Asturianu. Los cuentos que se presenten al certame han de tar redactaos en llingua asturiana y nun pasar de les diez fueyes, mecanografiaes a doble espaciu y per una sóla cara. El plazu pa la presentación de trabayos fina’l 9 de mayu y l’apertura pliques tendrá llugar el 9 de xunu, día nel que tamién se dará anuncia de la fecha d’entrega premios.

L’importe económicu de los mesmos ye: 600 € pal primeru, 450 € pal segundu y 300 € pal terceru. Los cuentos, de los qu’hai que presentar l’orixinal, trés copies y una copia más en versión informática, han d’unviase a la direición que vien darréu: Ayuntamientu Bimenes. Martimporra, s/n. 33527 – Bimenes. Ye de destacar el compromisu del Conceyu Bimenes en caltener esti certame lliterariu y l’esfuerzu qu’ello-y supón, yá qu’esta edición, como nes dos anteriores, nun cuenta con nengún sofitu económicu esternu.

Fonte: Infoasturies

Abierta la inscripción pal cursín d'asturianu en Bimenes

Entamáu pol SNL de la Comarca de la Sidra.

El Serviciu de Normalización Llingüística de la Mancomunidá Comarca de la Sidra, en collaboración col conceyu de Bimenes, entamen un cursín d'asturianu que va tener empiezu'l 6 d'ochobre y acabu'l 15 del caberu mes del añu, con una duración de 30 hores n'horariu de 18:00 a 19:30 llunes y miércoles.

Los conteníos nun van llendase namái a la ortografía, léxicu, sintaxis o morfoloxía, sinon que va comprender tamién cuestiones venceyaes a la hestoria y socioloxía de la llingua, asina como música, lliteratura y cine n'asturianu. Poro, animen a participar, siendo'l plazu d'inscripción hasta'l propiu 6 d'ochobre.

Fonte: Infoasturies

Abiertu'l plazu d'inscripción pa la "Prueba de Conocencia de la Llingua Asturiana"

L'Academia de la Llingua Asturiana abre'l plazu pa inscribise na prueba de conocencia. L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pa conocimientu xeneral: 1. Nos meses de xineru y mayu celébrense les pruebes, abiertes a toles persones interesaes. 2. Unos quince díes enantes de les pruebes va abrise un plazu de matrícula. 3. A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución. 4. Les persones que nun superen les pruebes del nivel 1 podrán presentase a nueves convocatories toles vegaes que-yos pruya. 5. Pal bon resultáu d’estes pruebes habrá tenese un dominiu básicu de les estayes que vienen darréu: a. ESTAYA LLINGÜÍSTICA a.1. Teoría gramatical: conocencia y dominiu del funcionamientu gramatical del asturianu y de la normativa académica. a.2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita. a.3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador. b. ESTAYA DE LLINGUA Y SOCIEDÁ Conocencia del allugamientu de la llingua dientro de la sociedá asturiana asina como del procesu de normalización en que ta inxerta. 6. La prueba va tener dos partes, una escrita (dictáu, torna, exercicios gramaticales, redaición) y otra falada (conversación). Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2012, 7ª ed.; Gramática de la Llingua Asturiana, ALLA, Uviéu, 2008, 3ª ed. reimpresión). Asina mesmo, aconséyase la llectura de testos fechos acordies cola normativa, como los asoleyaos por esta Academia. * En resultes d’esto, el 25 de xineru de 2014 va facese la prueba semestral. El plazu de matrícula ye del 13 al 23 de xineru. Fonte: Infoasturies

Abiertu'l plazu pa presentase al concursu de poesía Padre Galo

El certame homenaxea a Fernán Coronas Un añu más, la Sociedá Popular La Regalina abre’l plazu pa presentar obres al so premiu de poesía, dedicáu a la figura del Padre Galo (1884-1939), clásicu de la lliteratura asturiana. El tiempu pa presentar orixinales fina’l 18 de xunetu. Al concursu pueden presentase poemarios en llingua asturiana, con un mínimu de 275 versos. Los trabayos han mandase a la Sociedá, que ta asitiada nel Casinu de Cadavéu, na cai Curión e/n (Valdés). El premiu ye 1.000 euros y la posibilidá de publicar el poemariu . El premiu pue quedar ermu, conociéndose’l resultáu del xuráu, el 7 d’agostu, aniversariu del ñacimientu del Padre Galo. Los trabayos entregaránse por quintuplicáu nos llocales sociales de la Sociedá Popular “La Regalina”, o unviaránse per corréu. Dirán ensin firma, con un lema o nomatu. Nun sobre zarráu dirán les señes del autor col mesmu lema o nomatu que tenga’l poemariu. El Xuráu dará a conocer el ganador nun actu públicu en Cadavéu, el día 7 d’agostu, aniversariu del nacimientu del Padre Galo. Los trabayos non premiaos podrán recoyese nos llocales de la Sociedá Popular “La Regalina” dientro los 30 díes posteriores al fallu. Nos últimos años ganaron autores como Héctor Pérez Iglesias, Rubén d’Areñes, Carmen Guardado, Berto García o L.luis Fernández, ente otros. Fonte: Asturnews

Bimenes: "Concursu de Cuentos pola Oficialidá del Asturianu"

Últimos díes pa presentase al Concursu de Cuentos pola Oficialidá de Bimenes

Conceyu de Bimenes

   El Conceyu Bimenes tien abiertu'l plazu pa presentase al XVI Concursu de Cuentos pola Oficialidá del Asturianu. Los cuentos que se presenten al certame han de tar redactaos n’asturianu y nun pasar de les diez fueyes, mecanografiaes a doble espaciu y per una sóla cara. El plazu de presentación de trabayos fina’l 31 de mayu. L’apertura pliques tendrá llugar el 3 de xunetu y la entrega premios fadráse’l 12 de xunetu, nel trescursu d’una xornada lliteraria. L’importe económicu de los premios ye: 600 € pal primeru, 450 € pal segundu y 300 € pal terceru.

   Los cuentos, de los qu’hai que presentar l’orixinal, trés copies y una copia más en versión informática, han d’unviase a la direición que vien darréu: Conceyu de Bimenes. Martimporra, s/n. 33527 – Bimenes.

   Dende la organización del concursu recuerden que "ye de destacar el compromisu del Conceyu Bimenes de caltener esti certame lliterariu, y l’esfuerzu qu’ello-y supón, magar qu’esti añu, a diferiencia de los anteriores, nun va cuntar col sofitu nin de la Conseyería d’Educación, Cultura y Deporte nin de la Obra Social y Cultural de Caxastur".

Fonte:  Asturnews.