La XDLA critica la castellanización de dos seiciones del FICXixón

Alejandro S. García La organización del FICXixón camuda'l nome de dos de les sos seiciones más importantes, Esbilla y Llendes, que van pasar a llamase Gran Angular y Límites respectivamente. La XDLA califica la decisión como ‘cosmopaletismu’. Según el Direutor del certame, Nacho Carballo, “fuera d’Asturies naide sabe lo que significa llendes, pero sí límites.” Pa la Xunta pola Defensa del Asturianu la midida supon un grave pasu pa tras na visibilización del nuesu idioma, y la xustificación nun ye más qu’una amuesa de ‘cosmopaletismu’, una y bones el festival yá tien prestixu internacional nel ámbitu del cine independiente y l'usu del asturianu “ yá taba aceptáu como dalgo normal ensin qu’en nengún momentu supunxere dalgún problema.” La organización llanza tamién dures crítiques escontra'l Conceyal de Cultura Carlos Rubiera, pol so “pasotismu na defensa de los drechos llingüísticos de tolos asturianos” cuandu siempre repite que ye un defensor del asturianu. Nel so comunicáu la Xunta ataca a los argumentos de Nacho Carballo con el exemplu del Festival de Cine de Donostia (Zinemaldia), que les sos seiciones tienen nomes como Zabaltegi y nun torga que'l festival gocie d'un evidente prestixu n'Europa. Amás recuerden qu'una auditoría sobre’l turismo en Xixón señaló la valoración del patrimoniu cultural a traviés del usu del asturianu como dalgo positivo. Por tou esto soliciten a la organización del Festival la restitución de los sos nomes orixinales, y reclamen al Conceyal de Cultura “coherencia ente les pallabres y los fechos.” Fonte. Asturies.com

Cuartu festival européu de cine en llingües minoritaries en Frisia

L'asociación cultural Foriining Friisk entama esta fin de selmana'l IV Festival de Cine de les Minoritaries Europees. Los actos van cellebrase nel Cinema Centre Husum, na rexón norte de Frisia.

Nel festival, qu'entamó esti xueves 22, van participar cuatro películes rodaes nuna llingua minoritaria europea: la frisia Merke blues (Espaciu pal blues), la vasca Urteberri on, Amona! (¡Prestosu añu nuevu, güelina!), la romaní Cigan (Xitanu) y la feroesa Kunsten at græde i kor (L'arte de llorar).

El certame va acabar con una celebración de gala onde va entregase'l Premiu de Cine Européu Minoritariu. Nel actu van poder vese escenes de toles películes, xunto a discursos de los direutores, actores y organizadores.

Fonte: Les Noticies

Desanicien el topónimu Xixón nel FIC

La XDLA tacha d'«involucionista» la eliminación del topónimu tradicional La Xunta pola Defensa de la Llingua (XDLA) sacó un comunicáu onde refuga la eliminación del topónimu Xixón del logotipu nuevu del Festival Internacional de Cine y tacha esta midida de «rancia y involucionista» pa cola toponimia asturiana. Diz la organización en defensa de los derechos llingüísticos que «la imposición d'esti diseñu, obra del valencianu Javier Mariscal, carga directamente contra la denominación del certame, onde taba yá plenamente normalizada la presencia del asturianu al traviés del usu del topónimu tradicional, que ye oficial dende setiembre del 2006». Na XDLA sorpriende qu'esti tipu d'acciones lleguen dende la Conceyalía de Cultura de Xixón porque los sos responsables son, precisamente, los encargaos de visibilizar la toponimia tradicional. Amás, nel comunicáu señalen que, hasta'l momentu d'ocupar cargos públicos, delles persones d'esti departamentu –como'l propiu conceyal, Carlos Rubiera, o'l director de la Fundación Municipal de Cultura, Xosé Nel Riesgo– «desempeñaron un papel activu y destacáu nel procesu de dignificación de la nuestra cultura». Otru fechu que llama l'atención a la organización en defensa de la llingua ye que la Conceyalía de Cultura de Xixón anunciara, cuando'l cambiu de dirección del certame cinematográficu, que se-y diba dar a ésti un calter «más asturianu y popular», dalgo que la XDLA «nun entiende» cómo pue ser posible si, nesta edición, el logotipu del festival desanicia la forma tradicional. Por too ello, la Xunta pola Defensa de la Llingua esixe al Festival Internacional de Cine de Xixón que restituya, «de manera inmediata», la denominación «de siempre» y reclamen a los responsables de cultura del Conceyu xixonés que, «por coherencia cola so trayectoria asturianista», se pronuncien al respective. Fonte: Les Noticies

6u Festival de Cine Asturianu

El 6u Festival de Cine Asturianu entamará güei en Xixón cola presentación de los nominaos a los Premios a partir de les 19h nel Salón d'Actos de la Biblioteca Xovellanos.

El martes y el miércoles siguientes sedrá'l Teatru Filarmónica d'Uviéu el sitiu afayadizu qu'allugará les proyeiciones y la Gala de Pieslle cola entrega de Premios y l'homenaxe al actor uvieín Juan José Otegui, gala na qu'actuará el Ballet Baidán y el gran artista DiCarlo, nuna ceremonia d'entrega de Premios a la que tán convidaos tolos amantes del cine asturianu y onde habrá tamién otres sospreses.
L'actor Juan José Otegui recibirá'l Premiu d'Honor nel escenariu del Filarmónica nel 6u Festival de Cine Asturianu el prósimu 24 de febreru demientres la Gala de Pieslle del Festival, onde anunciará la so retirada de los escenarios, llueu d'una llarguísima y destacada carrera como actor.
El Festival de Cine Asturianu entamará'l llunes 22 cola presentación en Xixón de los nominaos. A les 7,30 proyectaráse una de les mítiques películes mudes del cine asturianu, Mieres del Camín (Juan Díaz Quesada, 1927). Y a les 8 la tarde tendrá llugar la presentación del llibru Historia del Cine Asturianu, de Xaviel Vilareyo, nel mesmu llugar onde se proyeutó cine per primer vegada en Xixón nel añu 1896, nel llugar onde antaño s'allugó'l vieyu Teatru Xovellanos, que güei ocupa la Biblioteca Pública Xovellanos.

Fonte: Infoasturies

35 curtios n'euskera nel XXXII Festival de Cine de Lekeitio

Un total de 35 curtiometraxes en llingua vasca participarán nel XXXII Festival de Cine y Vídeu Vascu de Lekeitio, l’únicu certame cinematográficu n’euskera, que se cellebrará nesta llocalidá del 24 al 28 de payares.

En rueda de prensa, l’alcalde de Lekeitio, desplicó que, de les 35 obres que se presenten al concursu, 20 foron creaes por autores vizcaínos -4 d’ellos de Lekeitio-, 12 son de creadores guipuzcoanos y 3 d’alaveses.
De toes elles, 8 concurrirán na modalidá de trabayos profesionales y 27 na d’amateurs. Los curtiometraxes competirán pol algame del premiu más preciáu del festival, el Gansu d’Oru, un troféu ensin dotación económica.

Amás, concederánse’l Gansu de Plata -dotáu con 1.600 euros- y de Bronce -1.100 euros- en caúna de les dos categoríes establecíes nel certame -profesional y amateur- y, dientro d’éstes, pa cada modalidá: documental, argumental y de creación.
L’alcalde de Lekeitio dixo que’l certame gocia d’una gran tradición nesta llocalidá y d’una "bona aceutación" tanto por parte’l públicu como de los direutores vascos de películes n’euskera.
.

5u Festival de Cine Asturianu n'Uviéu

El 5u Festival de Cine Asturianu entama güei nel Teatru Filarmónica d’Uviéu, cola proyeición de los curtiometraxes finalistes nuna Gala que presentarán María Xesús Rodríguez y Jesús Menéndez.
Tamién, estrenaráse la obra “De rebaxes na sablera” pol Grupu Teatru de Güeñu. Y llueu proyeutáranse los documentales finalistes.

Güei, a les seyes de la tarde, tien llugar la Gala de Pieslle, cola entrega de premios del Festival, presentada por Pepa Martínez y Jesús Piquero y coles actuaciones del Ballet Baidán, Celia González y el gaiteru Pelayu Cuaya.

Na Gala de Pieslle del festival dirixíu por Xaviel Vilareyo fadráse un homenax a Lilián de Celis y van proyeutase los curtiometraxes ganadores. A les diez de la nueche el Grupu Teatru de Güeñu va estrenar la obra “El misteriu del pelu roxu” . Toles sesiones del fesival son de baldre pa los espeutadores