El gol pol asturianu del Athletic Bilbao

Estos díes atrás l'Athletic de Bilbao dábamos una lleición a los asturianos y sobre manera a los equipos de fútbol d'Asturies y del restu del dominiu llingüísticu. Esti club recibía al Sporting de Xixón (o de Gijon, porque asina ye como sigue denomándose pudiendo usar la forma popular y tamién oficial) con una acoyida llingüística a lo grande: cartelu con un Afayáivos na fachada del estadiu y usu del asturianu na megafonía a lo llargo'l partíu.

Munchos asturianos y asturianes comentaben estos díes nes redes sociales como quedaren plasmaos al ver qu'un equipu de fuera usa más l'asturianu que los grandes equipos de fútbol d'Asturies, como un equipu que nada tien que ver con Asturies fai más por normalizar la presencia del idioma que la mayoría de los d'equí.

Ye verdá que n'otres categoríes, equipos como'l Ciares en Xixón o'l Rosal n'Uviéu, ente otros. O n'otros deportes, equipos como'l Siete Pulmones Baloncestu, son exemplu d'usu comprometíu del asturianu y señalen el camín a siguir pa los demás. Sicasí, entá tamos esperando que los grandes equipos asturianos faigan lo que fexo l'Athletic y usen con normalidá l'idioma, porque ye positivo, porque normaliza y porque-y da los equipos más cercanía cola afición ya identidá.

Dende Iniciativa pol Asturianu vamos trabayar pa que se dean esti cambiu y los equipos asuman la so obligación col territoriu al que representen, usando la llingua propia de l'afición na promoción, na toponimia, na megafonía y en tolos ámbitos, con normalidá y metiéndo-y un gol a la marxinación de la llingua asturiana nel ámbitu deportivu. Mientres, gracies Athletic, por danos esta lleición.

Fonte: Iniciativa pol Asturianu

TPA va entamar a emitir partíos de fútbol n’asturianu de forma periódica

Esti domingu va producise la primer emisión d’un partíu de fútbol n’asturianu en TPA. Va ser el Lealtad-Coruxo de Segunda División B, choque que van comentar Miguel Fernandi y Nacio González y que va ser el primeru de munchos, yá que la intención de la direición xeneral del ente ye la de retresmitir al menos un alcuentru al mes.

El partíu programáu al meudía en Les Caleyes va pasar a la historia por ser el primeru que la televisión pública va emitir en llingua asturiana nos sos diez años de vida. Fernandi va ser l’encargáu de llevar el pesu de la retresmisión col acompañamientu nos comentarios de González, col que yá coincidiera en Radio Sele nos partíos del Uviéu.

“Ye un acontecimientu más que simbólicu, yá que la idea ye la de facer al menos un partíu al mes del Lealtad y del Caudal”, esto ye, los dos equipos del país que militen en Segunda División B, esplica Fernandi, que nun descarta que tamién se pudiera emitir n’asturianu dalgún de Tercera División, dependiente d’otra productora. Nesi sen, nun se pueden sumar a esta iniciativa los alcuentros del Sporting y l’Uviéu pol fechu de que RTPA nun tien los derechos de retresmisión de la LFP.

40 años de retrasu

La direición xeneral de RTPA y la Direición Xeneral de Planificación Llingüística y Normalización son les impulsores d’esta iniciativa, pa lo que confiaron nel llabor de Fernandi, trabayador de la radio pública, que debuta asina nuna retresmisión televisiva. “Toi mui contentu por tener esta oportunidá histórica”, destaca’l lluanquín, qu’afirma que’l fechu de que se pueda ver na TPA un partíu de fútbol n’asturianu “ye un pasu mui importante pa la normalización del idioma, como sería tamién informativu”, anque apunta “que vien con 40 años de retrasu”, comparándolo coles emisiones en llingua propia de les otres autonómiques.

El partíu ente’l Lealtad y el Coruxo va disputase a les 12 hores del domingu. El conxuntu maliayu vien cargáu de moral tres la victoria por 2-3 col Somozas, partíu que-y valió p’asentase nuna cómoda décima posición, a cinco puntos de los puestos de peligru. Un trunfu énte’l conxuntu gallegu en Les Caleyes serviría a los de Roberto Aguirre p’alcanzar na tabla al Coruxo, que suma 25 puntos, y roblar asina una gran primer vuelta.

Fonte: asturies.com

El Real Uviéu trabaya nuna versión n'asturianu de la so web

El club carbayón ta trabayando en collaboración cola ALLA.

La nueva versión de la páxina web del Real Uviéu, amás de delles novedaes nel so diseñu y conteníos, va apurrir un bon avance pa la comunidá asturfalante: "El Real Uviéu trabaya en collaboración cola Academia de la Llingua Asturiana pa poder ufrir bien aína tolos nuesos conteníos n’asturianu". Asina anunciaben que dende'l club carbayón alcuéntrense desendolcando una versión n'asturianu de los sos conteníos web, trabayando a comuña cola ALLA pa facer realidá un nuevu avance pa la nuesa llingua na sociedá.

Fonte: Infoasturies

L'Uviéu fai campaña pola salvación cola so web n'asturianu

La campaña más internacional y más importante del Real Uviéu asturianízase ufriendo la información pa mercar aiciones n'asturianu. L'Uviéu ta faciendo tolo posible por llegar a los falantes de les más llingües posibles. Los aficionaos y aficionaes del equipu carbayón asturfalantes, o cualaquier persona que quixere collaborar, va poder informase y mercar aiciones na so llingua. La campaña ta superando toles previsiones y garró una dimensión planetaria.

La páxina de la campaña yosoyelrealoviedo.com , amás de n'asturianu, cunta con versiones en castellán, inglés, rusu, francés, árabe, chinu, portugues, italianu y alemán, pel momentu.

La situación del Uviéu y el puxu de l'afición por salvalu ta teniendo un fondu siguimientu mediáticu internacional y aficionaos de tol mundu tán, pasu ente pasu, superando toles previsiones y faciendo la SAD un pocu más de l'afición.

Les redes sociales como twitter col #SOSRealOviedo tán siendo perimportates nesti fenómenu de mases nel que se ta convirtiendo el SOS mandáu pol club asturianu al mundu futboleru. Un SOS, que ta teniendo una rempuesta impresionante qu'afita la importancia del Uviéu como un club hestóricu.

Fonte: Infoasturies

Concursu lliterariu del equipu fútbol Ciares

L’equipu fútbol de Ciares convoca un concursu lliterariu futboleru.

L’equipu xixonés Unión Club Ceares acaba d’abrir el plazu pal so primer concursu de rellatos futboleros. Una convocatoria na que pueden presentase testos n’asturianu y en castellán y que titulen “Ente llínies”. La estensión másima de los rellatos ye de cinco fueyes, pudiendo mandase hasta’l 20 d'abril a Estadiu de La Cruz, Carretera La Pola, e/n, 33209, Xixón, Asturies. Ente los premios, “un paxu futboleru-cultural”, incluyendo ente otres coses más: una suscripción a la revista Panenka, llibros, una camiseta y una bufanda del Unión Club Ceares, y un carné de simpatizante del club pa la temporada 2012-2013, asoleyándose tamién un llibru colos trés premiaos.

BASES DEL PRIMER CONCURSU DE RELLATU CURTIU “ENTE LLINIES”

1. Pueden participar nesti concursu tolos aficionaos al fútbol que quieran, acullá del so orixe o l’equipu al qu’animen.

2. Pueden optar al mesmu les obres orixinales y inédites en llingua castellana o asturiana y que nun se premiaran n’otros certámenes.

3. La temática de les obres ye llibre, cola condición única de que’l rellatu tenga della relación col fútbol. Esta relación puede dir dende ser l’exe principal de la narración hasta apaecer de manera anecdótica en dalgún de los pasaxes del rellatu.

4. El relatu ha tener una estensión nin inferior a cinco fueyes nin superior a diez. Tien que se presentar mecanografiáu, con lletra Times New Roman (o asemeyada), tamañu 12, interlliniáu 1,5 y cuatro copies del mesmu. Cada autor namás puede unviar un rellatu.

5. Los trabayos presentaos tienen que llevar nel espaciu’l remitente del sobre un alcuñu envede’l nome real. Dientro del sobre tien que s’incluir al empar otru sobre zarráu colos datos del autor: nome, señes, teléfonu de contautu, alcuñu usáu y títulu del relatu. Los orixinales tienen que se mandar a: Estadiu de La Cruz, Carretera La Pola, s/n, 33209, Xixón, Asturies, España. La fecha máxima pa la recepción d’orixinales ye’l 20 d’abril del 2012, aceptándose inclusive los unviaos nesa mesma data.

6. El xuráu fórmenlu cinco persones venceyaes de dalguna manera al mundu lliterariu y futbolísticu, y con conocimientos reconocíos nesos ámbitos.

7. La decisión del xuráu nun puede recurrise.

8. Van concedese trés premios, ensin orde xerárquicu. Los premios van consistir nun paxu futboleru-cultural, incluyendo ente otres coses más: una suscripción a la revista Panenka, llibros, una camiseta y una bufanda del Unicón Club Ceares, y un carné de simpatizante del club pa la temporada 2012-2013. Amás, los relatos ganadores van editase nun llibru, entregándose a los premiaos exemplares del mesmu.

9. El xuráu va facer pública la so decisión el 18 de Mayu del 2012. Esta data podría cambiase, con avisu previu, por mor de circunstancies del club.

10. El fechu de participar nesti Concursu implica aceptar estes Bases. Toles incidencies que nun figuren nestes Bases va resolveles la organización en pro del Concursu.

Fonte: Asturnews