N’ast felicita a los cargos eleutos que xuraron n’asturianu nes investidures

En Xixón tolos partíos menos el PP tuvieron un cargu que xuró n'asturianu

L’asociación pro llingua N’ast, unvió una nota de prensa al traviés de la que quixo felicitar “a tolos cargos políticos eleutos qu'a lo llargo d'estos díes tomaron posesión de los sos escaños y conceyalíes utilizando la llingua asturiana”. Un fechu que consideren “d’especial importancia” pues camienten que “la necesaria rexeneración democrática y moral que rique'l nuesu País nun ye realizable ensin la plena normalización social de la llingua del pueblu asturianu”.

Nes pasaes selmanes xuraron o prometieron el so cargu n’asturianu cargos a lo llargo de toa Asturies. Nel casu de Noreña, los conceyales Inaciu Iglesias (FAC) y Pablo Pérez (Conceyu Abiertu), en Xixón, José Ramón Tuero, hasta agora Conceyal de Deportes FSA-PSOE; Carlos Rubiera, de Foru Asturies, y Jorge Espina, cabeza de llista d'Izquierda Xunida-Los Verdes nel conceyu; en L.lena, Ramón Argüelles, xuró’l cargu de conceyal n'asturianu y el cargu d'Alcalde en castellán; Rolando Díaz d'Izquierda Xunida-Los Verdes, y Agripino Pérez, de Bloque Por Asturies-UNA, tamién xuraron n'asturianu. En Casu Felix González Noriega de FAC tamién xuró n’asturianu, y estos son namás unos pocos exemplos.

Na Xunta Xeneral: María Pilar Alonso Alonso, númberu 7 de la llista de la FSA-PSOE y Emilia Vázquez Menéndez d'Izquierda Xunida, xuraron dambes dos cola fórmula "Faigo promesa". Unos fechos que pa N’ast son perimportantes “yá qu'un futuru dignu pal idioma asturianu pasa pol so usu ensin complexos en tou tipu de situaciones y contestos".

Fonte: asturnews, blogue Tierra alantre, la mesma fala

El pulsu de la llingua

Lluís Xabel Álvarez

Paez normal entrugase pol estáu de la llingua asturiana dempués d’unes eleiciones autonómiques. Interesase pol llugar qu’ocupa na realidá del país y pol so pesu dientro de la sociedá española. Ye verdá que’l usu del asturianu nesta recién campaña electoral reducióse como davezu a los partíos con más raigañu nacionaliegu. Pero ye induldable tamién qu’esa vergoña de los partíos mayores a usar la llingua vien a ser ya enforma engañosa. Esa falta de la llingua na campaña eleutoral, ente la táutica y la medrana, escuende un fechu social que foi sedimentando pasu ente pasu nestos cuasi cuarenta años que van dende la fundación de Conceyu Bable: el fechu de que la cuestión de la llingua asturiana vieno a ser y ye tovía un tema políticu común y qu’esi tema sigue abiertu y qu’hai una conciencia de que dalguna vegada y de dalguna manera tendrá que zarrase polo que se refier a la consideranza y usu institucionales. Pocos partíos políticos tendrán a la llingua asturiana como preocupación inmediata y prevalente pero nengún hai que non la tenga apuntada na so axenda, a favor o a la escontra. Ye índiz d’ello la mesma espresión xeneralizada de la pallabra llingua , pa referise non solo al estandar del idioma sinon tamién a tol ámbitu de la cultura asturiana n’asturianu y al so entornu de fidelidaes. Queden lloñe los ruinos chistes del prau qu’atrapa (por campu lletromagnéticu ) y otres tochaes del pasáu. Por embargu son eses mesmes llindeces les que siguen pasando en España por gracioses (véanse delles series televisives d’agora mesmo) y definitories d’un ciertu coritu de nueva planta, enfotáu y marxinal. Claro que los nuevos coritos igual semos más rebalbos y respondones que los vieyos. Pero’l casu ye que nin la poesía nin la música pop-rock asturianes habiten la mente tópica española sol tipu asturianu y que nin siquier lo llogren los mineros más o menos asturfalantes del cine somáticu (refiérome a les películas inspiraes -qu’hailes- na estética del sindicatu Soma-UXT). Y si eso ye asina na cultura urbano-popular qué non asocederá nos cumales de l’alta cultura: l’Instituto Cervantes atiendi a la llingua castellana y a les otres llingües españoles nel mundu. Pingarates d’eso puen sentise nos programes televisivos de cultura (en 24 Horas). El Cervantes esparde eses llingües y trabaya por elles, sí. Pero’l criteriu ye qu’eses llingües seyan oficiales. Los bonos periodistes d’equí siempres lo dixeron na discreción del comentariu priváu: Madrid nun fairá resonar a la llingua asturiana mentes represente a un unu por cientu de militancia pura y dura sinón cuando tenga detrás una mayoría bultable. Entrugo yo: ¿cola victoria política del FAC llogró l’asturianu esa mayoría (d’edá) como pa facese cooficial?

Fonte: La Voz de Asturias

Espublizáu orixinalmente por Llugás

N'ast pide a Foru Asturies la oficialidá del asturianu "si'l so rexonalismu ye sinceru"

L’Asociación Cultural N’Ast, con motivu de la victoria del Foro Asturias nes eleiciones autonómiques, asoleyó un comunicáu nel que desixe a la formación d'Álvarez Cascos la oficialidá. Pa N'Ast, el nuevu escenariu políticu "presenta la gran nota positiva de francer cola dinámica bipartidista y sucursalista de los pasaos trenta años" asistiendo por primer vegada "a una seria posibilidá de que la xestión de les instituciones autonómiques respuenda a analises, polítiques y oxetivos centraos nes necesidaes y problemes específicos de la sociedá asturiana".
Poro, pa N'Ast el Foro Asturias, y el so principal dirixente, Francisco Álvarez-Cascos Fernández, tienen "la gran responsabilidá d'entamar un procesu de reestructuración qu'encare los grandes retos del nuesu País en tolos campos: social, económicu, cultural, etc" y no que se refier al campu cultural y llingüísticu, "si'l Sr. Francisco Álvarez-Cascos Fernández quier ser mínimamente consecuente col discursu rexonalista qu'utilizó nos caberos meses, tien que dar un xiru de 180º a les polítiques públiques esistentes anguaño" y nesi sentíu una midida "urxente, central ya imprescindible" pa recuperar “l'arguyu de ser asturianos” y poner fin a una situación "d'esquizofrenia identitaria y de negación de los drechos civiles de los asturfalantes, ye'l dotar a la llingua asturiana del estatus xurídicu de la oficialidá".
N'Ast remata la so nota prensa afirmando que "si'l rexonalismu manifestáu pol Sr. Francisco Álvarez-Cascos Fernández ye sinceru y nun respuende a una simple maniobra d'oportunismu elleutoralista, nestos momentos tien la obligación moral d'asitiar como ún de los puntos prioritarios de la so axenda política'l negociar un procesu de reforma estatutaria qu'incluya la Oficialidá de la llingua".
Fonte: Asturnews

Espublizáu orixinalmente por Llugás