Pablo R. Guardado
Les persones interesaes en participar nos concursos qu’entama l’Academia de la Llingua Asturiana (ALLA) tienen hasta esti sábadu pa presentar los orixinales. Pa la edición del 2012 hai premios n’ocho estayes.
Éstes son investigación, llectures pa rapazos, creación lliteraria (Premiu Llorienzu Novo Mier), recoyida de material oral, teatru, recoyida de material lliterario escrito (Premiu Federico G.-Fierro Botas), de cómics y de curtios cinematográficos y documentales. Los ganadores d’estes ocho categoríes van recibir una recompensa de 600 euros, a esceición del de creación audiovisual, que reparte un premiu de 1.200 euros. El xuráu tamién podrá dar dellos áccesit por estaya. Los trabayos p’aspirar a llevase estos concursos han de presentase na Academia de la Llingua Asturiana (L’Águila 10, Uviéu) o per corréu certificáu (Apartáu 574, 33080 Uviéu) enantes del sábadu.
Na edición de los premios del 2011 los ganadores foron Xabiel Fenández García, por ‘Toponimia de la parroquia de Barros (Llangréu)’ (Concursu d’Investigación de Recoyida de Material Toponímico Oral); Alberto Menéndez García, por ‘Eladio, el dinosariu que ñació ayeri’ (Concursu de Llectures pa Rapazos); Héctor Pérez Iglesias, pol poemariu ‘La mano vacía’ (Concursu de Creación Lliteraria ‘Llorienzu Novo Mier’); y Noel Canto Toimil pola obra ‘El facedor de gomeros’ (Concursu de Teatru). Mentes recibieron un accésit el trabayu ‘Léxicu de Llaiñes, Sobrescobiu’, de Xosé Ramón Lozano Cuervo (Concursu de Recoyida Oral de Léxicu Asturianu), y ‘N’el falar de la mio tierrina de Gabino Muñiz García-Robés’, de Rafael Rodríguez Valdés (Concursu de Recoyida de Material Lliterario Escrito ‘Premiu Federico G.-Fierro Botas’). Quedaron ermos el Concursu d’Investigación Llingüística y el Concursu de Recoyida de Material Lliterario Oral.
Fonte: Asturies.com
