Ñaz “Reciella”, l'asociación de families pol asturianu

El pasáu 19 de setiembre asentóse como asociación “Reciella: families pol asturianu”, grupu de families que llevaben aconceyando y organizando actividaes de diferente tipu a lo llargo d’esti añu 2012. L’asociación naz ensin ánimu d’arriquecimientu y tien como oxetivos fundamentales la tresmisión interxeneracional del asturianu nel ámbitu social y familiar y la enseñanza, promoción y difusión de la llingua asturiana nes primeres edaes; d’alcuerdu colo qu’apaez conseñao nos sos estatutos.

Asina les families que vienen averándose a l’asociación faenlo con neños y neñes que tán nes edaes comprendíes ente los 0 y los seis años, no que na enseñanza reglada apaez venceyao a la Educación Infantil. A xuiciu de los miembros de l’asociación esto ye asina por dos motivos fundamentales: per un llau la importancia que tienen estes edaes na tresmisión y deprendimientu de los idiomes, y en segundu pol vacíu llegal que presenta la non presencia de la Llingua Asturiana nel currículu d’Educación Infantil.Pal cumplimientu de los oxetivos marcaos Reciella plantega diferentes acciones, ente les que taríen la organización d’actividaes nes que la llingua vehicular seya l’asturianu, la realización y edición de materiales empobinaos al públicu infantil, o mesmamente la collaboración y convenios con otru tipu d’asociaciones, alministraciones o instituciones.

D’esta miente, y a lo llargo del branu, l’asociación vino organizando un programa d’actividaes n’asturianu ente les que tuvieron cuentacuentos o talleres d’instrumentos y cocina. La bona acoyida de les mesmes per parte de les families y los rapacinos foi lo qu’animó a los organizadores a dar un pasu alantre pa constituyir el grupu definitivamente como asociación.

Más información: Blogue de l'asociación Reciella

Fonte: Asturnews

N'Ast felicitó l'aniciu d'Iniciativa pol Asturianu

N'Ast camienta que la sociedá asturiana ta de norabona col aniciu d'Iniciativa pol asturianu, formación cola que caltién rellaciones de collaboración mutua.

La vitalidá de la llingua asturiana esprésase col aniciu d'esta nueva muerganización qu'apaez dempués de la quiebra producía nel movimientu de vindicación llingüística tres el puercu remanamientu que del mesmu fexo IX y pigarres al traviés del Conceyu Abiertu Pola Oficialidá, al que desmovilizaren una vuelta entraren nel gobiernu del Principáu y escaecieren el so compromisu cola llingua asturiana.

Iniciativa pol Asturianu defínese comu "una asociación que trabaya pola normalización del idioma asturianu y pola reconocencia de los drechos llingüísticos de los sos falantes. Atalantamos que l’asturianu ha ser vertebrador de la sociedá asturiana y que’l so usu ha ser tresversal, afalando a les instituciones, organismos privaos y sociedá civil a tomar les midíes necesaries pa la so normalización como ferramienta de comunicación, elementu identitariu y patrimoniu cultural y económicu de la sociedá asturiana que ye. Iniciativa pol Asturianu ye un coleutivu abiertu a toles persones esmolecíes pola situación del asturianu y comprometíes con cambiar esta situación."

Fonte: n-ast.org

Iniciativa pol Asturianu preséntase'l sábadu n’Uviéu

L’actu va tener llugar nel salón d’actos de la Biblioteca d’Asturies

L’asociación Iniciativa pol Asturianu va presentase esti sábadu 17 d’avientu nel salón d’actos de la Biblioteca d’Asturies, n’El Fontán, Uviéu. L’actu va consistir nuna pequeña gala con intervenciones, proyeición d’audiovisuales y actuaciones musicales, amás d’otres sospreses. Iniciativa pol Asturianu ye, según espliquen dende la Xunta Promotora de l’asociación “una organización que ñaz pa implicar a tola sociedá asturiana nel procesu de recuperación y normalización del asturianu”. El so trabayu va centrase tanto nel sector públicu como nel priváu “a la busca de nuevos espacios de normalidá pal idioma asturianu”.

L’asociación, añeden, “entama la so actividá pública dempués de dellos meses de trabayu discretu pa xenerar una estructura, crear la so páxina web, materiales y dir xenerando una rede de voluntariáu a lo llargo de tol territoriu asturianu”.

Convidada al actu de presentación
Nel actu d’esti sábadu, presentáu pola periodista Mariluz Pontón, va poder sentise la música de Mariluz Cristobal Caunedo “la dama de la canción asturiana”, amás de Tante Blanco, ex miembru de Los Berrones. Amás, habrá espaciu pal humor, de la mano del monologuista Lluis Antón González, perconocíu pol so trabayu como humorista na TPA. Xunto a estos elementos más lúdicos, presentaránse les idegues básiques del coleutivu y, amás, participarán delles personalidaes de diferentes estayes de la sociedá asturiana: educación, medios de comunicación, arte y cultura… Nel actu espérense delles sospreses que la organización entá nun desveló.

L’actu va entamar a les siete la tarde y ta abiertu a tolos interesaos, de baldre y hasta enllenar l’aforu del salón d’actos de la Biblioteca d’Asturies.

Folixa nel chigre L’Esperteyu
En terminando l’actu, hacia les nueve, va celebrase una folixa nel chigre uvieín L’Esperteyu, asitiáu en La Caleya la Ciega.

Fonte: Asturnews

Iniciativa pol Asturianu entama a furrular

Iniciativa pol Asturianu

Fundación 2011
Información. Somos una asociación que trabaya pola normalización del idioma asturianu y pol reconocimientu de los drechos llingüísticos de los sos falantes.
Descripción. Atalantamos que l’asturianu ha ser vertebrador de la sociedá asturiana y que’l so usu ha ser treversal, afalando a les instituciones, organismos privaos y sociedá civil a tomar les midíes necesaries pa la so normalización como ferramienta de comunicación, elementu identitariu y patrimoniu cultural y económicu de la sociedá asturiana que ye.

L’ámbitu de trabayu de la organización ye l’actual territoriu de la comunidá autónoma d’Asturies, anque al traviés de la collaboración con otres organizaciones del dominiu llingüísticu asturlleonés, trabayaremos a comuña polos oxetivos yá citaos, y qu’atalantamos han llograse en tol territoiu onde l’asturianu o asturlleonés ye llingua propia.

Iniciativa pol Asturianu ye un coleutivu abiertu a toles persones esmolecíes pola situación del asturianu y comprometíes con cambiar esta situación.

Información xeneral. Trabayamos p’algamar espacios de normalidá pa la llingua asturiana, al traviés d’acciones concretes que mos permitan llegar a alcuerdos con entidaes de tou tipu que supongan afitar l’usu del asturianu n’ámbitos nuevos.

Iniciativa pol Asturianu trabaya pola busca de consensos y alcuerdos sobre l’usu del asturianu, pero tamién fai usu de campañes reivindicatives nes situaciones nes que ye necesario.

Iniciativa pol Asturianu trabaya, a nivel organizativu, puxando pa crear una rede nel territoriu asturianu que-y permita a la organización tener una presencia na cai en tolos conceyos del país, averando la reivindicación llingüística a tolos ciudadanos.

Apostamos por un modelu de reivindicación, qu’ensin escaecer el problema global de la situación del idioma, igüe problemes concretos nel usu del mesmu en tolos ámbitos.

Misión
1. Movilizar a la sociedá asturiana pol futuru de la llingua asturiana, dándo-y visibilidá al conflictu llingüísticu.
2. Recuperar pal asturianu l’espaciu central como llingua común de toles persones d’Asturies y de tol dominiu llingüísticu asturlleonés.
3. Afalar y collaborar con campañes de normalización llingüística.
4. Vixilar el cumplimientu de la llexislación llingüística vixente, defendiendo los drechos de los falantes a los que se-yos nieguen.
5. Trabayar pa la oficialización de tol corpus toponímicu tradicional asturianu, vixilando’l so usu per parte d’instituciones y empreses.
6. Controlar el cumplimientu de les polítiques llingüístiques comprometíes, asina como afalar mayores graos de compromisu llingüísticu per parte de les instituciones y otres entidaes.
7. Afalar la collaboración ente organizaciones de tol dominiu llingüísticu pa xenerar una conciencia ciudadana sobre la xunidá del idioma y trabayar p’algamar oxetivos comunes.
8. Internacionalizar la conocencia del idioma y del conflictu llingüísticu, al traviés d’acciones culturales y de la denuncia énte los organismos estatales ya internacionales de la situación irregular que viven los ciudadanos asturianos no que cinca a la cuestión llingüística. Amás de trabayar con otres comunidaes llingüístiques con situaciones asemeyaes en cualesquier llugar del mundu.
9. Afalar una reconocencia absoluta del asturianu como llingua oficial en tol territoriu asturianu, y xunto col eonaviegu o a fala na fastera correspondiente, amás de collaborar pa qu’esta reconocencia s’algame tamién nel restu de territorios onde l’asturianu ye llingua propia.
10. Reclamar un estatus xurídicu d’oficialidá pal asturianu dientro de los organismos europeos.

Direición de corréu lletrónicu: contautu@iniciativapolasturianu.org

Fonte: www.facebook.com/iniciativapolasturianu