SUATEA esixe un cambiu de rumbu urxente en política llingüística

SUATEA esixe a la Conseyería d’Educacón y cultura la dignificación llingüística y nin desanicie l’asturianu de la Educación infantil nin consienta ratios de 30 alumnos en Primaria.

Como fai alcordanza SUATEA nun comunicáu asoleyáu esti martes, el pasáu mes d’ochobre, el Parlamentu asturianu aprobó una Proposición non de Llei pola dignificación de la llingua asturianacol apoyu del PSOE, Podemos, IX y Foro y “nella, ínstase al Conseyu de Gobiernu a diseñar un plan de dignificación y normalización llingüística enantes del próximu periodu de sesiones”.

Y amás el conseyeru d’Educación y Cultura, Genaro Alonso, nes sos comparecencies públiques y nos conceyos realizaos a primeros de cursu con tolos sindicatos presentes na Xunta de Personal Docente, “comprometióse a meyorar el desarrollu de la Llei d’Usu y Promoción del asturianu y el so reforzamientu nel ámbitu educativu”. De la mesma manera, el Director Xeneral de Planificación lingüística, “mostróse comprometíu con estos principios y con dar solución a les reclamaciones que se-y treslladaron sobre tola riestra d’irregularidaes detectaes a los primero del cursu”.

Pero sigún denuncia SUATEA “estes intenciones y declaraciones concrétense na realidá nuna política continuista cola de gobiernos anteriores del PSOE y que consiste nel desaniciu de la enseñanza del Asturianu y del Gallego-Asturiano na Educación Infantil, la falta de siguimientu per parte de la inspección educativa d’irregularidaes na ufierta de l’asignatura en Secundaria, la non cobertura de baxes de Gallego-Asturiano dende hai más d’un mes nes escueles de Tapia y la illegalidá de la xuntanza de grupos con ratios d’alumnáu de más de 25 alumnos en Primaria”.

Son casos como los de les Escueles Llerón-Clarín y Aniceto Sela de Mieres, onde l’alumnáu d’Educación Infantil (E.I.) venía recibiendo clases d’Asturianu dende hai cuantayá (nel Llerón-Clarín yá fue centru pilotu na implantación de l’asignatura d’asturianu nel añu 1984) y esti cursu tovía nun les reciben.

SUATEA y la Comunidá Educativa d’estos centros lleven reclamando dende primeros de cursu que s’amplie’l contratu del profesor d’Asturianu a xornada completa pa poder siguir impartiendo esta asignatura n’E.I: “Sangrante ya illegal (la llexislación vixente establez una ratio máxima de 25 alumnos pa grupos de Primaria), ye tamién el casu del Colexu La Vallina de Lluanco onde un profesor d’Asturianu, contratáu a media xornada, imparte clases nun grupu de primeru y otru de terceru de Primaria con 30 alumnos y alumnes, consecuencia de la xuntanza de dos del mesmu nivel. Lo mesmo pasa con otru grupu de sestu con 28 alumnos. La Dirección del centru, igual qu’esti sindicatu, pidieron cuantayá l’ampliación a xornada completa del profesor pa poder desdoblar estos grupos y atender, cola calidá a la que tien derechu, a esti alumnáu”.

Asina, en viendo “la inacción flagrante de la Conseyería d’Educación y Cultura, del Serviciu de Planificación Llingüística y del Gobiernu del PSOE énte estos fechos acontecíos al entamu del supuestu camín de la Normalización Llingüística nel ámbitu educativu, nun mos queda otra que pidir un cambiu de rumbu de 180 graos si se quier cumplir col mandáu de la Xunta Xeneral del Principáu y colos derechos llingüísticos del alumnáu”.                                                                     Fonte: asturnews.com

La XDLA reclama doblaxes d’Asterix a la RTPA na apaición de la nueva aventura

 La XDLA atalanta que’l doblaxe “valdría pa visibilizar los alcuerdos parllamentarios sobre l’asturianu y el cumplimientu de los mesmos polos xestores del mediu públicu”

  Nuna nota de prensa asoleyada esti xueves, la Xunta pola Defensa de la Llingua Asturiana (XDLA) fai alcordanza de qu’hai dos años publicarase Astérix na tierra los pictos, “un álbum que vendió en poques selmanes 2.500 exemplares y que se convirtió nun fenómenu lliterariu dientro de les lletres asturianes”. Y nesi tiempu, la Xunta pola Defensa de la Llingua Asturiana “solicitó a la daquella Dirección Xeneral de Política Llingüística y a RTPA que collaboraren pa facer el doblaxe al nuestru idioma de les películes protagonizaes pol héroe galu, un llabor que diba responder al compromisu de llevar l’asturianu al mayor públicu posible, sobre too a lo más mozo. Güei, dos años más tarde y depués de que la nuestra petición nun la atendiera nenguna de les dos instancies, volvemos solicitar lo mesmo a la Direición Xeneral de Planificación Llingüística y Normalización y a la RTPA”.

  La organización recuerda que les televisiones autonómiques agrupaes na organización FORTA, ente les que ta la TPA, “tienen los drechos d’emisión de les películes d’animación que protagonizó l’héroe galu a lo llargo d’estos años, qu’amás repítenles davezu en feches señalaes, como’l branu y navidá, por mor del so éxitu. Mesmamente, les últimes películes d’Astérix llegaron a estrenase nos cines en vascu y catalán, mentes qu’en Galicia una campaña fecha a comuña ente TVG y la Secretaría Xeral de Política Lingüística permitió la edición en DVD de delles películes infantiles doblaes, ente les que taben dalgunes protagonizaes por esti personaxe tan conocíu del cómic francés”.

  Esta solicitú coincide cola espublización d’otros dos álbumes n’asturianu d’Astérix nesti xueves d’ochobre, la nueva aventura “El papiru de César” y la torna de la segunda aventura del galo, “La faceta d’Oru”, lo que pala organización civil asturianista “da bona cuenta del so respaldu social- y podría interpretase como’l primer pasu pa visibilizar el cumplimientu del alcuerdu d’investidura ente PSOE y IX, que diz que RTPA tien qu’aumentar los sos conteníos en llingua asturiana, y del mesmu plan de dignificación del asturianu, aprobáu apocayá col consensu d’una parte importante del arcu parllamentariu y que, con unos términos menos esplícitos, vien a dicir lo meso”. Na opinión de la xunta “desdexar una iniciativa asina namás pue entendese como dexar en papel moyao lo pactao, amás de ser una muestra más de los prexuicios del equipu de dirección actual de RTPA y de lo necesario del cambiu: el compromisu mínimu de cumplir cola llexislación tien que ser un motivu sine qua non pa dirixir RTPA, non como hasta ágora”.

  Hai que tener en cuenta que la cadena, como emisora pública que ye, “tien la obligación d’atender a les minoríes, protexer a los neños, educar a l’audiencia y promocionar el nuestru idioma, funciones que se cumplen cola emisión d’un productu asina. Sicasí, como ya se señaló nel Informe sobre la necesidá d’una programación infantil en TPA, la nuestra televisión ye la única cadena europea d’una comunidá billingüe que nun emite programación pa los más pequeños na llingua propia, polo qu’actualmente nun ta cumpliendo colos sos mandaos llegales. Too esto a pesar del éxitu y les espectatives que xeneraron esperiencies como’l doblaxe al asturianu de la serie infantil Los Bolechas, que nun tuvo continuidá desque s’emitieron los 26 capítulos de la primer temporada”.                                                                                                                               Fonte: asturnews.com

IX plantega na Xunta un Plan de Dignificación de la Llingua Asturiana

Los finxos del plan pasen pola creación del Grau en llingua asturiana na Universidá, garantizar la ufierta de la enseñanza nos centros alcordaos y la emisión n’asturianu d’un 30% de la programación de la TPA.

El grupu parlamentariu d’IX va llevar al plenu d’esta selmana na Xunta Xeneral una Proposición Non de Llei sobre dignificación del asturianu, nes instituciones, medios de comunicación y toponimia porque, a xuiciu de Gaspar Llamazares, voceru parlamentariu na Xunta, inda hai un desenvolvimientu que faer cola actual llei del asturianu, la Llei d’Usu y Promoción.

La Proposición Non de Llei inclúi una batería de puntos nos que demanda dende rematar la negociación col MEC pa reconocer la especialidá docente de la llingua y el gallego-asturianu en Primaria y Secundaria, a impulsar la creación del Grau en llingua asturiana na Universidá d’Uviéu, ensin escaecer otres cuestiones básiques como garantizar la ufierta de la enseñanza nos centros alcordaos, la emisión n’asturianu d’un 30% de la programación de la TPA, o la progresiva implantación del asturianu nel BOPA, ente otres cuestiones.

Coles mesmes, y tamién a instancies d’IX, pondrase en marcha la comisión parlamentaria pa estudiar la situación actual de la llingua asturiana y les posibles reformes que dexen el caltenimientu y el futuru de la llingua. La comisión va tar formada por dos miembros de cada grupu parlamentario y presidíu pola diputada d’IX Concha Masa.

Fonte: Asturnews