Teatru n'asturianu nos colexos

                                        Ocho compañies llevaron les sos obres a los colexos. 

Nos díes 14 y 16 de xunu desarrollóse l'actividá '¡Y pa rematar, teatru!'. Organizada pola Oficina de Normalización Llingüística de Xixón. Llevó a ocho colexos del conceyu representaciones teatrales n'asturianu nes que participaron unos mil escolinos y escolines.

Les representaciones abarcaron distintes artes escéniques, y fueron: 

•  La neña de les trences al revés  (El Callejón del Gato)
•  L'aire les castañes  (Mar Rojo Producciones)
•  De qué color ye'l sol  (Kamante Teatro)
•  Runa, un mundiu redondu  (Nun Tris)
•  Una hestoria con munchu cuentu  (Trafalgar Títeres)
•  La vendedora de pallabres  (Factoría Norte)
•  El Viaxe de Covaletti  (Higiénico Papel)
•  Hestories detectivesques  (Guayominí Producciones)

Los colexos participantes nesta edición fueron: C.P. Xovellanos, C.P. Los Pericones, C.P. Montiana, C.P. Manuel Martínez Blanco, C.P. Laviada, C.P. El Llano, C.P. Rei Pelayo y C.P. Santa Olaya.                                                                                             Fonte. yexixon.com

El to Nome y Apellíos n'Asturianu

Llingua y Cultura Asturiana. Oficina de Normalización Llingüística.
El to nome y apellíos n'asturianu

 Hasta hai unos años yera obligatorio pa toles persones d'España que'l so nome y los sos apellíos s'inscribieran oficialmente na so forma castellana. Les formes correspondientes en catalán, en gallegu o n'asturianu emplegábense a diario na fala, pero nun podíen escribise nos documentos y diben, poco a poco, perdiéndose.

 Agora la llei reconoz la diversidá llingüística d'España y permite que los nomes y apellíos de la xente recueyan esa riqueza cultural.

 N'Asturies tamos a tiempu de recuperar los nuesos nomes y apellíos tradicionales y, con ellos, la memoria de los homes y muyeres que poblaron esta tierra nes xeneraciones pasaes.
Fonte: llingua.gijon.es

Setiembre va ser mitolóxicu na Cuenca’l Nalón

La Conceyalía de Cultura de Samartín del Rei Aurelio al traviés de la so Oficina de Normalización Llingüística va dedicar esti mes a promover la mitoloxía asturiana a traviés d’estremaes actividaes, coincidiendo l’entamu de la programación cola Feria de Muestres y Esposiciones FEMEX que se celebra la primer fin de selmana de setiembre nel conceyu.

L’entamu del programa coincide cola Feria de Muestres y Esposiciones FEMEX que se celebra esta próxima fin de selmana y onde a partir del vienres 4 y hasta’l domingu 6 va poder visitase la esposición “Mitos asturianos” del dibuxante llangreanu Javier Iván Villa Vilchez. Nella van poder vese dalgunos de los personaxes mitolóxicos asturianos más populares, dende’l trasgu al busgosu o la xana, ente otros munchos.

La esposición, amás, ta acompañada por dellos testos onde s’espliquen les carauterístiques d’estos personaxes, y cuenta con distintos xuegos destinaos a toles edaes pa que la xente se pueda acercar a esta temática d’un mou cenciellu y afayadizu. Esta mesma esposición va poder visitase dempués a lo llargo de tol mes de setiembre na Casona del Bravial de Blimea, de llunes a vienres n’horariu de 9 a 13 h.

Les actividaes siguen el día 23 de setiembre a les 7 la tarde nel mentáu centru cultural. Esi día l’etnógrafu, dibuxante y escritorAlberto Álvarez Peña va ufiertar una charra en Blimeap’averanos al orixe y les carauterístiques de los diferentes seres fantásticos que configuren la tradición mitolóxica asturiana.

Amás, a lo llargo de tol mes les páxines de facebook y twitter de la Oficina de Normalización Llingüística del conceyu van tar dedicaes a esta temática, ufiertando información, materiales, xuegos y actividaes que se van poder descargar de baldre.

Donte: Asturnews

La Oficina de Normalización de Xixón entama una campaña destinada a les Escueles Infantiles

Los neños y neñes de 0 a 3 años y de los primeros cursos d’Infantil son los destinatarios de la campaña próxima de la Oficina de Normalización Llingüística de Xixón. Trátase de ‘¿En qué fales tu?’ y consiste nel deprendizaxe del idioma al traviés d’un xuegu con un muñecu. La iniciativa va complementase col trabayu col cartafueyu pa les families ‘Fála-yos’.

Carlos Alba ‘Cellero’ va ser el responsable de caúna de les sesiones previstes a lo llargo de marzu nes doce Escueles Infantiles del conceyu. La idea ye la creación d’un personaxe “con un muñecu que namás fale asturianu y namás entienda asturianu. Invanta-y una historia prestosa al muñecu y una función que faiga qu’a los neños y neñes-yos interese usar l’asturianu pa falar con él”, espliquen dende’l serviciu de normalización. “Nestos años de la vida d’un neñu/a l’adquisición llingüística ye más fácil, yá que les persones tenemos de piquiñinos abonda capacidá p’asimilar los soníos qu’escuchamos. La capacidá amenorga según pasa’l tiempu, polo que lo meyor ye entamar cuanto primero”, añaden.

El complementu a ‘¿En qué fales tu?’ ye "Les ventayes del billingüismu n'Asturies/ Fála-yos. La llingua materna nell contestu global", un cartafueyu asoleyáu l’añu pasáu por ‘Reciella. Families pol Asturianu’ y la Oficina de Normalización Llingüística de Xixón destináu a les families de los pequeños. Nél, a lo llargo de diez fueyes, esplíquense dellos apuntes sobre la llingua asturiana y detállase cómo se pue consolidar l’aprendimientu y usu del asturianu ente los neños y neñes.

Fonte: Asturies.com

La Oficina de Normalización Llingüística de Xixón edita un trípticu pa dar a conocer a los escolinos la importancia de los idiomes minoritarios

Trípticu "Dos son más qu'un, meyor sumar"

   Con motivu de les celebraciones al rodiu del Día Internacional de la Llingua Materna, la Oficina de Normalización Llingüística de Xixón editó un trípticu pa dar a conocer a los escolinos la importancia de los idiomes minoritarios d’Europa. Ésti lleva’l nome de ‘Dos son más qu’ún, meyor sumar’.

   Tolos centros educativos de Xixón pudieron trabayar con esti material que, como indica’l so títulu, tamién pretende concienciar a los neños y neñes de “la necesidá de nun escaecer la nuesa llingua materna, non en contraposición al castellán, sinón en convivencia”. Per un llau, el trípticu trai una esplicación breve del motivu de celebrar el Día Internacional de la Llingua Materna’l 21 de febrero, asina como la lletra de "El cantar del vasu", iniciativa de Xuncir que ta siendo too un ésitu nes redes sociales y ente los escolinos, como amuesen les casi 25.000 reproducciones que lleva dende la so espublización en YouTube’l 9 de xineru.

   Completen el material dellos xuegos cola fin de que los guaḥes puedan conocer otres llingües minoritaries europées y cómo se dicen los díes de la selmana en dalgunos d’esos idiomes. Tamién hai ún dedicáu a la toponimia de les parroquies de Xixón, temática a la que la Oficina de Normalización Llingüística dedicó’l calendariu d’esti añu. Otra manera, dende esti muérganu informen que la Rede Municipal de Biblioteques de Xixón dispón d’una ‘Guía de llectura’ n’asturianu recomendada pa neños y neñes con una esbilla de los títulos disponibles nelles.                                                  Fonte: Asturies.com

La Casona del Bravial acueye una esposición en llingua asturiana sobre'l Castiellu de Blimea

    El Día Internacional de la Llingua Materna (21 de febreru) y el cuartu aniversariu como centru cultural de la Casona del Bravial converxen nuna muestra sobre’l Castiellu de Blimea. Ésta inaugúrase'l xueves y cuenta con tola información n’asturianu.

   El Castiellu de Blimea trátase d’un edificiu mui lligáu a la propia Casona del Bravial, yá que descendientes de la familia qu’habitara l'actual centru cultural blimeín ente los sieglos XI y XII, los Fernández Miranda, procedentes de Quirós, treslladáronse a esti inmueble nel 1496. Naquél momentu conocíase como la casona de La Cabezá y nun sería hasta sieglos más tarde cuando, depués de que’l vizconde de Campogrande diera forma al edificiu nel 1897 pa revivir glories medievales vieyes, pasara a conocese como’l Castiellu de Blimea.

Cartelu de "El Castiellu de Blimea"

   Los munchos años de vida de la edificación y detalles del so pasáu van poder conocese agora al traviés de la llingua asturiana gracies a la muestra ‘El Castiellu de Blimea. Historia, lleendes, abandonu...’. Ésta fai “un percorríu pela historia del edificiu y les families que lu habitaron basándose en datos bibliográficos, documentos antiguos y semeyes, esplica’l responsable del Oficina de Normalización Llingüística de Samartín del Rei Aurelio, Hugo Cortina, qu’añade que la esposición “pretende ser un homenaxe a un edificiu que tovía recuerden con munchu ciñu los vecinos de Blimea, y una manera de dexar constancia del so valor históricu”.

   La conceyala de Cultura, Gema Suárez Torre, va acompañar mañana a la responsable de recoyer y escoyer los materiales de la muestra, la historiadora Belén González Collado, nun actu abiertu que va principiar a les 19 hores y que va servir d’inauguración de la esposición. ‘El Castiellu de Blimea. Historia, lleendes, abandonu...’ va poder visitase hasta’l 7 de marzu, de llunes a vienres, n’horariu de 9 a 13 hores. Ésta va ser la primer de les actividaes previstes pol Conceyu de Samartín al rodiu del Día Internacional de la Llingua Materna, ente les que destaca un taller esplicativu d’edición de la Uiquipedia n’asturianu’l mesmu 21 de febreru. 

Fonte: Asturies.com