El Día Internacional de la Llingua Materna (21 de febreru) y el cuartu aniversariu como centru cultural de la Casona del Bravial converxen nuna muestra sobre’l Castiellu de Blimea. Ésta inaugúrase'l xueves y cuenta con tola información n’asturianu.
El Castiellu de Blimea trátase d’un edificiu mui lligáu a la propia Casona del Bravial, yá que descendientes de la familia qu’habitara l'actual centru cultural blimeín ente los sieglos XI y XII, los Fernández Miranda, procedentes de Quirós, treslladáronse a esti inmueble nel 1496. Naquél momentu conocíase como la casona de La Cabezá y nun sería hasta sieglos más tarde cuando, depués de que’l vizconde de Campogrande diera forma al edificiu nel 1897 pa revivir glories medievales vieyes, pasara a conocese como’l Castiellu de Blimea.
Cartelu de "El Castiellu de Blimea"
Los munchos años de vida de la edificación y detalles del so pasáu van poder conocese agora al traviés de la llingua asturiana gracies a la muestra ‘El Castiellu de Blimea. Historia, lleendes, abandonu...’. Ésta fai “un percorríu pela historia del edificiu y les families que lu habitaron basándose en datos bibliográficos, documentos antiguos y semeyes, esplica’l responsable del Oficina de Normalización Llingüística de Samartín del Rei Aurelio, Hugo Cortina, qu’añade que la esposición “pretende ser un homenaxe a un edificiu que tovía recuerden con munchu ciñu los vecinos de Blimea, y una manera de dexar constancia del so valor históricu”.
La conceyala de Cultura, Gema Suárez Torre, va acompañar mañana a la responsable de recoyer y escoyer los materiales de la muestra, la historiadora Belén González Collado, nun actu abiertu que va principiar a les 19 hores y que va servir d’inauguración de la esposición. ‘El Castiellu de Blimea. Historia, lleendes, abandonu...’ va poder visitase hasta’l 7 de marzu, de llunes a vienres, n’horariu de 9 a 13 hores. Ésta va ser la primer de les actividaes previstes pol Conceyu de Samartín al rodiu del Día Internacional de la Llingua Materna, ente les que destaca un taller esplicativu d’edición de la Uiquipedia n’asturianu’l mesmu 21 de febreru.
Fonte: Asturies.com
