El taller ‘Traxinando n’Avilés’ vive en Los Canapés la sesión última

Programa "Traxinando n'Avilés"

 Esti vienres va celebrase la sesión última de l’actividá ‘Traxinando n’Avilés’ sobre indumentaria tradicional que vien impartiendo Susana Sela. Ésta va tener llugar na biblioteca del Centru Sociocultural de Los Canapés y ta destinada a neños y neños d’ente 5 y 10 años, con participación de baldre previo acute de plaza.

 La escritora, poeta y investigadora na etnografía asturiana respuende a la entruga ‘¿Cómo se vistíen homes y muyeres enantes?’ al traviés de les histories d’Oneta, una neña con muncho que contar. Una forma perprestosa d’averar los traxes tradicionalesa a la reciella.

 La sesión, d’hora y media de llargor, va comenzar a les 17.30 hores. Esta actividá, entamada pola Estaya de la Llingua, ye de baldre, anque resulta necesario acutar plaza en Los Canapés al tar les places llendaes a venti neños y neñes.                Fonte: asturies.com

El Festival Escenines pala Reciella entama’l 27 cola presentación del CD “Bestiariu”

El Festival de Teatru Infantil y Xuvenil n’asturianu organizáu pola asociación “Reciella, families pol asturianu” va desenvolvese dende’l día 27 col sofitu del Ayuntamientu de Xixón, la Caxa Rural y el C.P. Xovellanos onde tienen llugar les representaciones. El Festival entama esti añu cola presentación del CD Bestiariu.

El programa arranca esti domingu 27 d’avientu a les 12.00 hores col conciertu presentación del CD recopilatoriu “Bestiariu”, que ya tien na rede un adelantu del discu y pal que yá ta confirmada la presencia de casi toles bandes , con entrada gratuita como toles actividaes d’Escenines.

El miércoles 30 d’avientu, a les 19 hores, representarase la obra “Grana de cardamomu” d’El Callejón del gato. Y el sábadu 2 de xineru, a les 12 hores asocederá lo mesmo cola obra “Arriba’l periscopiu” d’Higiénico Papel.

El llunes 4 de xineru, a les 19 hores, pesllarase la programación d’esti Festival de l’Asociación Reciella, con “Xuan Soldáu” del actor y monologuista Carlos Alba “Cellero”.

Fonte: Asturnews

L'agua nun pudo cola reciella

Una imaxe del tendayu del Muséu del Pueblu d’Asturies na tarde d’ayeri. (del domingu) Semeya de Jana Suárez

 El lloviu que cayó de manera intermitente esti domingu en Xixón nun tornó la gana de diversión de los neños y neñes qu’acudieron coles sos families al III Día de la Reciella. Los xuegos, la música y la gastronomía foron protagonistes.

 Les posibilidaes que da’l Tendayu del Muséu del Pueblu d’Asturies permitieron treslladar dientro dalgunes de les actividaes previstes y camudar delles de les actividaes d'horariu cuando l’agua fixo actu de presencia obligando a entamar la xornada con más de media hora de retrasu.

 Finalmente cuando entamó a escamplar, abrió la programación el dúu Mestura, con un conciertu participativu nel q ue los asistentes pudieron esfrutar de los temes del CD Pallabres de Carambelu.

 Depués, cuando apaecía en cielu una lluga, y yá colos xuegos tradicionales de l'Asociación Cultural Esbilla y el pintacares en marcha, Lluis Nel Estrada, de 40 Primaveres, conduxo un taller sobre los quesos del país qu'apurrió el comerciu La Gijonesa.

Superllingua       En pasando la posa pa la xinta entamaron les actividaes de la tarde, cola Gynkana a la que convidó'l superhéroe Superllingua que llevó a neños y neñes per tol muséu, enseñándo-yos les lletres y tres de la que toos y toes les participantes tuvieron un regalu.

 Y, ya col pintacares otra vegada en marcha foi'l turnu de la Escuela de Música Tradicional La Quintana, qu'entamaron alredor de les 17.00 col conciertín de Serie2, un grupu formáu por alumnáu de la escuela, al que siguió l'actividá Xugando con Música, pa rematar, tres d'una rifa de productos infantiles, con un conciertu de los profesores de la escuela.

 La Oficina de Normalización Llingüística de Xixón, la TPA, el Centru Social Sestaferia y Asturies.com foron delles de les entidaes que collaboraron pa qu’esta xornada tornara a ser un éxitu y, lo más importante, permitiera a la reciella’l disfrutar d’un día de diversión en llingua asturiana.

L'enfotu de la organización d'esti día d'actividaes infantiles y familiares n'asturianu ye facer normal lo que desgraciadamente nun ye normal n’Asturies; ayudando a cubrir esi déficit que tienen los neños y neñes asturianes al nun tener accesu a asturianu nun periodu tan importante pa la tresmisión xeneracional del idioma.

L'añu de la consolidación  David Guardado, miembru de la directiva de Reciella comentaba durante la xornada que "esti ye l'añu de la consolidación, depués de dos años d'aprendizaxe yá podemos dicir qu'el día de la Reciella ye una cita p'acutar nel entamu de la seronda n'Asturies", y alegrábase de que "el mal tiempu, l'aire y los dos bastiazos que cayeron pela mañana y al mediu día nun impidieren la presencia d'abonda xente y sobre manera de que los neños y neñes lo pasaren 'podre' anque dalgún coló pa casa con una bona pulpera".

 Guardado quixo agradecer especialmente'l so sofitu a tolos collaboradores, que, dixo, "faenlo desinteresandamente y ayúdennos a iguar esos espacios de normalidá que tanta falta nos faen, anque quede munchu camín qu'andar" y recordó que Reciella fai actividaes tol añu pero que'l so llabor "nun pue tapecer que les alministraciones tienen una responsabilidá perimportante na tresmisión interxeneracional del idioma" polo que pidió "un apueste más decidíu a l'alministración nueva pa qu'ente toos y toes podamos asegurar el futuru de la llingua asturiana".

 Una danza prima, alredor de les 19 hores, punxo’l ramu al III Día de la Reciella, una iniciativa que tendrá continuidá dau’l so ésitu añu tres añu. Esta selmana podrán disfrutar n’Asturies.com d’una galería de semeyes coles actividaes d’esta xornada.                                                                    Fonte: asturies.com

La Estaya de la Llingua d’Avilés programa actividaes infantiles a lo llargo del añu en collaboración con Reciella

"La viesca les piruletes"

   Caracol Teatru, col montaxe de marionetes ‘La viesca de piruletes’, va abrir esti vienres el ciclu d’actividaes infantiles ‘La Reciella de la Factoría’. Trátense de seis xornaes a lo llargo del añu entamaes pola Estaya de la Llingua d’Aviés en collaboración con ‘Reciella. Families pol Asturianu’.

   Toles actividaes van tener llugar nel espaciu escénicu de la Factoría Cultural d’Avilés a partir de les 18.30 hores, con entrada llibre. Pola cercanía col Día Internacional de la Llingua Materna (21 de febreru), mañana da comienzu esta programación con dos espectáculos dientro d’un mesmu montaxe de nome ‘La viesca de piruletes’. El primeru, que lleva la mesma denominación, cuenta la historia de Xuana, qu’atopa un cuélebre mientres taba buscando piruletes, polo que llama a Antón pa que l’ayude. Darréu, van representar ‘Musín, musín’, un gatu que ve cómo un mur quita-y l’almuhada y el colchón onde diba a durmir.

   L’eventu siguiente de ‘La Reciella de la Factoría’ va celebrase’l 24 d’abril con ‘¿Doite Mieu?, protagonizáu por dos bruxes representaes por Olga Cuervo y Ana Morán. Completen el programa ‘Retalinos’, de Cuervo y David Varela (12 de xunu); ‘Cuentos grandes pa pies piquiñinos’, de Cuervo (25 de setiembre); ‘Ecolocuentos’, de Carlos Alba ‘Cellero’ (30 d’ochobre); y ‘Runa’, de Nun Tris Teatru (20 de payares).

 Fonte: Asturies.com

El festival d’artes escéniques ‘Escenines pa la Reciella’ ufre cuatro espectáculos esta Navidá

Cartelu de II Escenines pa la Reciella, nel Colexu Públicu Xovellanos de Xixón

    El II ‘Escenines pa la Reciella’ principia esti llunes col cuentacuentos ‘Coses de neños’ que protagoniza Olga Cuervo. Ésta va ser la primer de les cuatro sesiones que ‘Reciella. Families pol Asturianu’ entama estes Navidaes nel salón d’actos del xixonés Colexu Públicu Xovellanos.

   Toles actividaes van desendolcase a les 19 hores y pretenden ser una amuesa de los espectáculos infantiles más destacaos que se tán faciendo anguaño n’Asturies na nuesa llingua: dos cuentacuentos, un teatru de solombres acompañáu de música y una obra de teatru en forma monólogu. Nel primeru, el d’esta tarde, los neños y neñes van poder disfrutar de los cuentos más populares de Cuervo, mentes que’l vienres el turnu va ser pa El Turnebís del Tribilín y la so obra de teatru de solombres ‘El cuélebre de San Llorienzo y otres histories’. El ciclu va continuar el martes 30, colos ‘Ecolocuentos’ de Carlos Alba ‘Cellero’, pa depués poner el ramu’l vienres 2 de xineru col espectáculu ‘Árbol’ de la Compañía Higiénico Papel.

   Reciella, premiada recién col Pegollu de los XXX Premios Andrés Solar pola so llabor escelente p’afitar la tresmisión xeneracional del asturianu, pretende con esta iniciativa que “los neños asturfalantes, asina como los que tienen interés y curiosidá por aprender l'idioma, tengan la oportunidá d'asistir a actividaes qu'utilicen la llingua asturiana con normalidá fuera del ámbitu escolar”. Asina, ufren estes cuatro sesiones que destaquen pol rexistru llingüísticu seriu y correutu de tolos artistes y compañíes, dalgo mui importante nel procesu de formación de los neños y neñes. ‘Escenines pa la Reciella’ cuenta col sofitu económicu del Conceyu de Xixón y de Caxa Rural. Fonte: asturies.com

Xixón presenta "Les ventayes del billingüismu n'Asturies"

Básase nel desendolcu de bebé cuentos y delles otres actividaes nes escueles infantiles La Oficina de Normalización Llingüística del Ayuntamientu de Xixón prepara la campaña “Les ventayes del billingüismu n’Asturies” empobinada a neños de cero a tres años con motivu del Día Internacional del Idioma Maternu que se celebra el 21 de febreru tolos años. La campaña ta basada nel desendolcu de bebé cuentos y delles otres actividaes nes escueles infantiles. La Oficina de Normalización Llingüística del Ayuntamientu de Xixón venía organizando demientres ocho años consecutivos actividaes al rodiu d’esti día nos centros escolares d’Educación Primaria del Conceyu Xixón. Como los oxetivos d’esta celebración de siempres serán l’espardimientu de la riqueza y diversidá llingüística del planeta en toles sos estayes, entamando pola propia, l’asturianu, esti añu queríaen diversificar les actividaes al rodiu d’esta celebración y tomala como pretestu pa entamar una nueva campaña: “Les ventayes del billingüismu n’Asturies”. La intención ye desarrollar esta campaña ness Escuelas Infantiles de 0-3 años de Xixón, pola consideranza de que los primeros años de la vida d’un neñu y una neña son un momentu ideal pa l’adquisición llingüística, porque les persones tenemos de piquiñinos abonda capacidá p’asimilar los soníos qu’escuchamos. La capacidá amenorga según pasa’l tiempu, polo que lo meyor ye entamar cuanto primero. D’otru llau, Asturies ye’l llugar onde vive la mayor parte de la comunidá de falantes d’una llingua qu’apaez nel catálogu de llingües en peligru de la UNESCO. Anque se calcula que nel mundu hai más de 6.000 idiomes, tamién ye probable que la metá d’estos desapaezan, esto ye, que naide los use, enantes de qu’acabe’l sieglu. Les llingües con comunidaes pequeñes de falantes y ensin presencia en contestos formales, son muncho más sensibles a la desapaición. La Carta Europea de les Llingües Minoritaries, señala espresamente al asturianu como una de les llingües que tienen qu’apoyase y difundise, polo que’l so usu como se vien faciendo dende hai sieglos, de xeneración en xeneración, ye la más importante garantía de supervivencia. Tresmitiéndola, usándola, tamos faciendo una importante aportación a la riqueza y diversidá cultural de la humanidá. Estes, ente otres, son les que s'empleguen na nota de prensa del serviciu de normalización llingüística pa xustificar la campaña que pretenden aniciar. La idega ye facela pública a lo llargo les dos selmanes vinientes, presentando un cartafueyu informativu pa les families, que la Oficina de Normalización Llingüística de la FMCEUP editó conxuntamente cola Asociación La Reciella, families pol Asturianu, y que sirve de base pa fomentar el billingüismu y la tresmisión de la llingua asturiana n’edaes tempranes. Nel actu de presentación que se ta preparando tarán presentes el Conceyal d’Educación, Cultura, Mocedá y Festexos, Carlos Rubiera Tuya, el nuevu Responsable de la Oficina de Normalización Llingüística, Xuan Nel Sáez Hernández, y un componente de la Asociación La Reciella, families pol asturianu. Fonte: Asturnews