Cuervo va poner un cuentacuentos sobre The Beatles

 La reciella que s’avere’l domingu al Centru Municipal Integráu Pumarín-Xixón Sur va poder disfrutar del cuentu ‘Aquel viaxe estraordinariu (camudó al home solitariu)’ sobre The Beatles. Olga Cuervo va encargase de contar esti testu de Lucía Tejerina.

 La cita va tener llugar a les 11.30 hores nes aules 6-7 dientro de la programación de la IV Feria del Llibru Infantil y Xuvenil que se va celebrar en Xixón ente’l vienres y el domingu. Cuervo va rellatar esta historia pa neños y neñes que ye un homenaxe al grupu de música inglés The Beatles.

 D’igual forma tolos asistentes a esta actividá de baldre al rodiu del llibru editáu por Impronta y la Oficina de Normalización Llingüística de Xixón, va completase con una esposición rellativa al mesmu. María Díaz Perera encargóse de toles ilustraciones de la obra.

 Otra manera, dientro de la programación prevista pa estos trés díes, tamién va haber güecu pa la presentación d’un llibru en llingua asturiana. Trátase del cuentu ‘Don Quixote y la Princesa del Arbeyu’ (Impronta), llibru de Carlos González Espina y Alicia Varela, que va tener llugar na sala d’esposiciones el sábadu a les 12.30 hores.                Fonte: yexixon.com

La Reciella de La Factoría: 'Moliniellu'

Cartelu de La Reciella de La Factoría "Moliniellu"

A cargu d'Olga Cuervo: "Cuentos que falen de moliniellos de vientu, de café y de música. Espectáculu pa ver y escuchar".

A les 19 hores nel espaciu escénicu de la Factoría Cultural d'Avilés.

Entrada llibre.

Entama la Estaya de la Llingua d'Avilés en collaboración con 'Reciella. Families pol Asturianu'.

Fecha:  Vienres, 10/21/2016                                                              Fonte: asturies.com

El festival d’artes escéniques ‘Escenines pa la Reciella’ ufre cuatro espectáculos esta Navidá

Cartelu de II Escenines pa la Reciella, nel Colexu Públicu Xovellanos de Xixón

    El II ‘Escenines pa la Reciella’ principia esti llunes col cuentacuentos ‘Coses de neños’ que protagoniza Olga Cuervo. Ésta va ser la primer de les cuatro sesiones que ‘Reciella. Families pol Asturianu’ entama estes Navidaes nel salón d’actos del xixonés Colexu Públicu Xovellanos.

   Toles actividaes van desendolcase a les 19 hores y pretenden ser una amuesa de los espectáculos infantiles más destacaos que se tán faciendo anguaño n’Asturies na nuesa llingua: dos cuentacuentos, un teatru de solombres acompañáu de música y una obra de teatru en forma monólogu. Nel primeru, el d’esta tarde, los neños y neñes van poder disfrutar de los cuentos más populares de Cuervo, mentes que’l vienres el turnu va ser pa El Turnebís del Tribilín y la so obra de teatru de solombres ‘El cuélebre de San Llorienzo y otres histories’. El ciclu va continuar el martes 30, colos ‘Ecolocuentos’ de Carlos Alba ‘Cellero’, pa depués poner el ramu’l vienres 2 de xineru col espectáculu ‘Árbol’ de la Compañía Higiénico Papel.

   Reciella, premiada recién col Pegollu de los XXX Premios Andrés Solar pola so llabor escelente p’afitar la tresmisión xeneracional del asturianu, pretende con esta iniciativa que “los neños asturfalantes, asina como los que tienen interés y curiosidá por aprender l'idioma, tengan la oportunidá d'asistir a actividaes qu'utilicen la llingua asturiana con normalidá fuera del ámbitu escolar”. Asina, ufren estes cuatro sesiones que destaquen pol rexistru llingüísticu seriu y correutu de tolos artistes y compañíes, dalgo mui importante nel procesu de formación de los neños y neñes. ‘Escenines pa la Reciella’ cuenta col sofitu económicu del Conceyu de Xixón y de Caxa Rural. Fonte: asturies.com

Reciella y Estaya de la Llingua: cuentacuentos n'asturianu n'Avilés

Reciella organiza una sesión de cuentacuentos n'Avilés

Reciella asociación de families pol asturianu

   Reciella, asociación de families pol asturianu y la Estaya de la Llingua d'Avilés organicen un Cuentacuentos en Valdecarzana embaxo'l títulu "Xelaos de Cuentu". L'actriz Olga Cuervo sedrá la encargada de poner n'escena los cuentos nel Palaciu de Valdecarzana, esti vienres 14 a les 19:30 hores.

  Fonte:  Asturnews.