Los V Cursos d’Asturianu en Xixón entreguen diplomes al mediu centenar d’alumnos matriculaos

L’Academia de la Llingua Asturiana, Iniciativa pol Asturianu y el Conceyu Universitariu pol Asturianu celebren la entrega de diplomes de la V Edición del Cursu d’Asturianu en Xixón

Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos de los V Cursos d’Asturianu en Xixón esti miércoles 10 d’avientu a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, que van dar llectura a dellos testos, xunto a miembros d’Iniciativa pol Asturianu, el CUPA y l’Academia de la Llingua Asturiana.

El programa de los V Cursos incluyó dos itinerarios nesta ocasión, un nivel básicu y un nivel II, participando al rodiu de 50 alumnos ente’l sistema presencial y los alumnos que lu ficieron dende fuera d’Asturies a distancia.

Nesta ocasión y como ye vezu, cuntóse con alumnos de fuera d’Asturies, nel presencial, como un alumnu colombianu que lleva años viviendo n’Asturies y quixo averase al estudiu del asturianu. Esti alumnu va ser unu de los que llea un testu cuntando la so esperiencia nel actu d’entrega de diplomes. Amás, siguen el cursu munchos asturianos emigraos por razones de trabayu fuera d’Asturies y persones interesaes na conocencia del asturianu d’otros países del mundu, que tienen nos cursos a distancia la manera de deprender más del asturianu.

Fonte: Infoasturies

Inaugúrase la quinta edición de los Cursos d'Asturianu en Xixón con un importante crecimientu de la matriculación a distancia

La inauguración va tar abierta a la prensa, permitiéndose les semeyes y recibiendo a fotógrafos y redactores

   Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) entamen la que ye yá la quinta edición de los Cursos d’Asturianu en Xixón esti llunes 6 d’ochobre dende les 17 hores, nel Conseyu de la Mocedá de Xixón (Avenida Manuel Llaneza 68, baxu). Na inauguración de los cursos van participar, xunto a los alumnos, Pablo Xuan Manzano, miembru de l’Academia de la Llingua Asturiana, Javier Cubero, del Conceyu Universitariu pol Asturianu ya Inaciu Galán, presidente d’Iniciativa pol Asturianu.

   Iniciativa pol Asturianu valora mui positivamente esta esperiencia formativa que s’entama per quinta ocasión en collaboración cola Academia de la Llingua Asturiana y que tuvo una perbona acoyida, con más de 50 matriculaos. Esti añu, per primer vegada, los alumnos matriculaos a distancia superen a los presenciales, por mor de la dispersión d’alumnos per conceyos d’Asturies y l’interés d’emigraos que tán trabayando fuera d’Asturies, amás de delles persones que nun siendo asturianos tán interesaos por conocer y deprender la nuesa llingua. Los cursos cunten con 36 hores llectives y van celebrase los llunes y miércoles pela tarde.                                                                                           Fonte: Asturnews.com

La Universidá d'Uviéu vuelve dexar de llau la llingua asturiana

Universidá d'Uviéu,  campus Viesques,  Xixón

   La Universidá d’Uviéu vieno acabante dexar de llau la llingua asturiana otra vuelta abriendo una páxina en catalán, euskera y gallegu, pero non n’asturianu. Trátase del serviciu pa la consulta del archivu hestóricu de la entidá al traviés d’internet, onde puen escoyese delles llingües pa facelo, pero non l'asturiana, incumpliendo nuevamente la institución asturiana los sos Estatutos. La denuncia facíala esti martes el Conceyu Universitariu pol Asturianu.

   La Universidá d’Uviéu anunciaba güei al traviés del so boletín diariu d’información “DUO”, la puesta en marcha d’un serviciu pa la consulta del archivu hestóricu de la entidá al traviés d’internet. Esti nuevu serviciu permite la consulta en catalán, gallegu, vascu y castellán, pero non n’asturianu.

   Pal Conceyu Universitariu pol Asturianu "ye bien llamativo que la Universidá d’Uviéu ufra esti serviciu en toles llingües del estáu español menos na llingua propia d’Asturies, protexida polos propios estatutos de la universidá asturiana".

Universidá d'Uviéu,  Escuela Politécnica,   Mieres

   Por ello, solicitaben esti mesmu martes pela mañana al Rector, Vicente Gotor, al traviés d'una carta unviada darréu, "qu’esti programa recueya tamién la posibilidá d’usar l’asturianu, como col restu de les llingües, y cumpla asina cola normativa de la Universidá d’Uviéu que recueye espresamente que naide podrá ser discrimináu pol usu del asturianu na Universidá, pa lo que ye preciso, y con un costu cero, qu’esti tipu de ferramientes tean disponibles n’asturianu."                     Fonte: Asturnews

Más información: Páxina del Archivu de la Universidá

Entregáronse los diplomes de los IV Cursos d'Asturianu en Xixón

   L'académica de númberu, Marta Mori d'Arriba, el presidente d'Iniciativa pol Asturianu, Inaciu Galán, y un representante del Conceyu Universitariu pol Asturianu, pesllaron oficialmente’l programa d’actividaes de los IV Cursos d'Asturianu en Xixón, entamaos por Iniciativa pol Asturianu, el Conceyu Universitariu pol Asturianu y l'Academia de la Llingua Asturiana. L’actu tuvo llugar esti xueves 26 de xunu a les 19 hores, nel Salón d'Actos del Conseyu la Mocedá de Xixón.

   Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) entregaben ayeri los diplomes acreitativos de los IV Cursos d’Asturianu en Xixón, cola participación de los alumnos, que dieron llectura a dellos testos, l'académica de númberu y profesora de la Universidá d’Uviéu, Marta Mori d'Arriba, el presidente d'Iniciativa pol Asturianu y director de los Cursos, Inaciu Galán, y Javier Cubero, representante del CUPA.

   El programa de los IV Cursos incluyó dos itinerarios nesta ocasión, un nivel básicu y un nivel II, participando más de cuarenta alumnos ente’l sistema presencial y los alumnos que lu ficieron dende fuera d’Asturies a distancia.

   Los organizadores valoren mui positivamente esta esperiencia formativa que llega yá a la so cuarta edición, con más de 150 alumnos que pasaron peles aules de los mesmos dende l’añu 2011, cuando se punxeron en marcha. Nesta ocasión cuntóse con alumnos de fuera d’Asturies, nel presencial, como una alumna gallega que ta estudiando na Universidá d’Uviéu y quería volver pa la so tierra conociendo la llingua d’Asturies, amás d’otros alumnos dende Paraguái o Méxicu, onde cuatro miembros d’estremaes xeneraciones d’una familia de descendientes d’asturianos, siguieron el cursu pa deprender la llingua de los sos antepasaos. Ye vezu yá qu’asturianos emigraos más recién, por causes llaborales, sigan esti cursu dende otros puntos del mundu enteru.

   Nos dos cursos de nivel básicu y nivel II participaron esti añu más de cuarenta persones, ente presencial y a distancia. A lo llargo del actu, entregaronse los diplomes y hebo intervenciones de dellos alumnos falando de la so esperiencia y de la so visión de la situación de la llingua asturiana, celebrando darréu un pinchéu nes mesmes instalaciones del Conseyu.

   L'ésitu de la convocatoria garantiza qu'a la vuelta'l branu vuelva a convocase la que sedrá la quinta edición de los Cursos d'Asturianu en Xixón.
Fonte: Asturnews

El Defensor del Universitariu recomienda a Gotor cambios nel Reglamentu d'usu del asturianu

 

Ramón Durán, Defensor del Universitariu 

   Ramón Durán, Defensor del Universitariu de la Universidá d’Uviéu, unvió una carta al rector Gotor na que recomienda cambios nel Reglamentu sobre presentación d’escritos n'asturianu nel Rexistru. Tamién suxer cursos pa funcionarios.

   La carta, fechada’l 4 de marzu y dada a conocer ayeri pol Conceyu Universitariu pol Asturianu (CUPA) y Iniciativa pol Asturianu, ye’l resultáu de la reunión caltenida por Durán con representantes d’estos dos coleutivos tres el casu de represesión llingüística que vivió un alumnu de la Facultá de Formación del Profesoráu nel mes de payares a lo poco de presentar un escritu nel so idioma maternu en Secretaría. Nella, basándose na sentencia firme del Tribunal Superior de Xusticia d’Asturies del 2010 que declaraba insuficiente, alcordies a la Llei d’Usu y Promoción del Bable/Asturianu, la regulación del idioma na institución universitaria, recomienda al rector Vicente Gotor la reforma del “Alcuerdu 28/05/2009 del Conseyu de Gobiernu, pol que s’aprueba’l Reglamentu sobre presentación y recepción d’escritos en bable/asturianu nel Rexistru de la Universidá d’Uviéu”. Asina, encamienta a qu’esta norma nun diferencie ente documentos en castellanu o n’asturianu.

   Nesti puntu, la falta d’oficialidá torna, otra vuelta más, a dexar indefenses a les persones falantes d’asturianu pol fechu de que’l funcionariáu nun ta obligáu a tener conocencia del idioma, lo que lleva a Durán a reconocer que’l mou únicu posible de proceder podría provocar un “perxuiciu” al interesáu. Esta situación dase pol fechu de que la llexislación nun obliga a presentar xunto col escritu n’asturianu una traducción al castellanu, polo que’l funcionariu presente, nel casu de nun entender el testu, debería de facer usu del organismu de traducción. “Como ye lóxico, mientres dichu trámite de traducción se resuelve, debería entendese suspendíu’l plazu pa la Resolución definitiva del asuntu. Según resulta evidente, dichu modu de proceder pue implicar un perxuiciu al alministráu, del que debería ser alvertíu, por si de forma llibre desea asumir el retrasu inevitable”, apunta. Al respeuto, el Defensor del Universitariu recomienda “mui vivamente” la renovación del ‘Conveniu Marcu de Collaboración ente l’Alministración del Principáu d’Asturies y la Universidá d’Uviéu pa la traducción asturianu/castellanu de los escritos y documentos que se presenten nel Rexistru Xeneral o los Rexistros Auxiliares de la Universidá d’Uviéu’ del 18 de xunu del 2009.

Los incumplimientos de Gotor .    Por último, Durán encamienta a Gotor l’entamu de cursos de formación n’asturianu “pa que cuantos funcionarios de la nuesa universidá amuesen interés en siguilos, puedan facelo”. “Dende’l Conceyu Universitariu pol Asturianu ya Iniciativa pol Asturianu felicitamos al Defensor Universitariu por estes solicitúes feches al rector y aprovechamos pa recordar los munchos incumplimientos que vien acumulando Vicente Gotor no que cinca a los pasos que firmó col Conceyu Universitariu pol Asturianu pa dar a lo llargo del so mandatu actual: llogotipu billingüe pa la Universidá d’Uviéu, reglamentu pa la rotulación d’instalaciones n’asturianu y otres cuestiones que tendríen que se tener puesto en marcha acordies colos plazos firmaos por Gotor”, recuerden los dos coleutivos nun comunicáu.          Fonte:  Asturies.com