ALSA emplega dellos topónimos billingües na so páxina web

Pablo R. Guardado
La empresa d’orixe asturianu ALSA yá utiliza dalgunos topónimos bilingües na so páxina web, anque sigue ensin ufrir l’asturianu ente los idiomes a escoyer. Esti avance pequeñu llega tres una iniciativa del usuariu Vítor Suárez.

El responsable del blogue ‘Fueya en blanco’ –y na actualidá miembru de la xunta promotora d’Iniciativa pol Asturianu– consiguió en setiembre’l compromisu de la empresa pa incorporar la toponimia tradicional a la páxina web de la empresa. Meses depués, ALSA introduxo nel llistáu de destinos dalgunos nomes asturianos de ciudaes y pueblos, anque xunto cola denomación en castellanu. Iniciativa pol Asturianu asoleyó güei una nota de prensa na que felicita a la empresa por esti avance pequeñu.

“Como organización que trabaya pola normalización social del asturianu nun podemos quedar ehí y, poro, queremos qu’esta empresa dea un pasu más”, señalen dende’l coleutivu de creyación nueva, que va aconceyar con un responsable del grupu ALSA “pa tresmiti-y una serie de midíes que favoreceríen la normalización del usu del asturianu nes sos rellaciones colos usuarios”. La web d’ALSA sigue ensin utilizar la llingua asturiana na web, onde sí ufre la posibilidá d’escoyer ente’l castellanu, inglés, francés, alemán, catalán, gallegu y eusquera.

Fonte: Asturies.com

ALSA comprométese a emplegar la toponimia n’asturianu

ALSA ta procediendo a adaptar el so sistema pa que n'alsa.es se reseñen los topónimos "en bable y en castellano".

El ciudadanu asturianu Vitor Suárez ta acabante de recibir un compromisu fitu, de la empresa de tresportes Grupo ALSA S.L.U. pal usu de la toponimia asturiana na so páxina web. Esti compromisu vien,"tres d'un mes d'unviu de correos a la empresa y de comunicación colos responsables de la páxina web, al traviés de les redes sociales", esplica Suárez, que, a la fin, tendrá qu'unviar el mesmu'l llistáu de topónimos pa que faigan los cambeos oportunos.
Concretamente'l mensaxe recibíu, asoleyáu nel blogue Fueya en blanco, del que ye responsable Vitor Suárez, foi'l siguiente:

Estimado Vítor:
Por medio de la presente, acusamos recibo de su atenta comunicación y le informamos que, ALSA está procediendo a adaptar su sistema al objeto de que en la web www.alsa.es, se reseñen los topónimos, en bable y en castellano, de las localidades pertenecientes a la Comunidad Autónoma del Principado de Asturias en las que las empresas de ALSA prestan servicios de transporte.
Sin otro particular, agradeciendo su interés.
Atentamente.

Victor Suarez amuésase allegre "pol avance que supón esti fechu pal idioma, yá que se trata d'una de les empreses de tresportes más usaes del país" pero tamién amuesa esmolición pol fechu "de qu'esti avance venga de mano de les quexes y el trabayu d'un usuariu particular y non de la xera d'una Direición de Política Llingüística, inesistente ya ineficaz".

Fonte: Infoasturies

Campaña pol ALSA n'asturianu

Nesti blogue van entamase pequeñes campañes a favor del asturianu. Una cada mes. Fadremos por dar pasos gracies a la presión ciudadana sobre les instituciones y organizaciones de calter priváu. ¿Éches un gabitu? causespolasturianu@gmail.com

FAIGAMOS QU’ALSA USE LA TOPONIMIA OFICIAL YÁ Y TENGA LA SO WEB N’ASTURIANU

LA CAUSA DE MARZU

Esta ye la carta qu’ha mandase a la direición alsa@alsa.es pa reclamar l’usu del asturianu na so web y el cumplimientu nel usu de la toponimia oficial. ----

A la Direición d’ALSA n’Asturies: El Grupu ALSA, que tuvo’l so orixe n’Asturies y caltién llazos bien importantes con esti país, incumple la llei al nun usar la toponimia oficial asturiana, na so web, nos autobuses que circulen per Asturies, paraes del bus, publicidá, etc. Ye un casu bien importante, pues la empresa ye la concesionaria de munches llínies y polo tanto ta faciendo servicios públicos sobre los que tienen la esclusividá. Amás, na so web ufren la posibilidá de poder lleer la información en munches llingües, toles del Estáu español, menos l’asturianu. Reclamamos, poro, al traviés del unvíu d’esti corréu, que cumplan col usu de la toponimia oficial en tolos ámbitos y reclamaos l’usu del asturianu na so páxina web, n’igualdá de concidiciones coles demás llingües.

Fonte: Blogue Doce meses, doce causes pol asturianu