El periodista Paco Álvarez ganador del XXXVI Xosefa Xovellanos de novela n'asturianu
El fallu del XXXVI Xosefa Xovellanos de novela y del XXI Máximo Fuertes Acevedo d’ensayu completaron los Premios Lliterarios 2015. El primeru foi pa Francisco Álvarez por ‘Lluvia d’agostu’, mentes que’l segundu llevólu José Ángel Gayol con ‘Vértigu. L’atracción del abismu na sociedá contemporánea’.
El xuráu del gallardón más veteranu, el de novela, formáu polos escritores Miguel Barrero, Elisabet Felgueroso, Antón García y Pilar Sánchez Vicente, y la filóloga Lourdes Álvarez, baxo la presidencia de Fernando Padilla, direutor xeneral de Planificación Llingüística y Normalización, decidióse por unanimidá pola novela d’Alvarez ente los cinco trabayos finalistes destacando la so “estructura, la trama y desenllaz narrativu qu'inducen a la llectura continua de la obra, xunta col manexu de fontes d’información y documentación qu’aporten verosimilitú a la historia narrada”. El periodista xixonés presentóla baxo l’alcuñu d’Andreas Corfú.
‘Lluvia d’agostu’ trata sobre la vida y muerte de Buenaventura Durruti, percorriendu un periodu de tiempu que va dende los años 20 a los 80 del sieglu pasáu. Ésta ta ambientada en dellos escenarios, como Asturies (Xixón, Uviéu y les cuenques), Moscú, Breizh, París o Bruxeles, y tien como filu conductor a un periodista. Trátase de la primer novela d’Álvarez.
El poeta José Ángel Gayol ganador del XXI Máximo Fuertes Acevedo.
De la poesía al ensayu Gayol repite nos Premios Lliterarios tres ganar nel 2012 el XVIII Premiu Xuan María Acebal de poesía con ‘El llibru de les coses misterioses’. Nesta ocasión el mierense lleva’l gallardón trabayando l’ensayu gracies al testu ‘Vértigu. L’atracción del abismu na sociedá contemporánea’.
El xuráu formáu polos escritores y investigadores Ramón d’Andrés Díaz, Damián Barreiro Maceiras, Elena de Lorenzo Álvarez, Marta Mori de Arriba y Luis Casteleiro Oliveros, y presidíu tamién por Padilla, escoyó por mayoría’l so testu, presentáu baxo’l nomatu d’Emmanuel Bove. “El so planteamientu modernu, la so estructura novedosa y l’harmonización de narración y xéneru ensayísticu con un llinguaxe áxil” motivó esti fallu, según espresa l’acta del gallardón.
Restu de premiaos Con estos dos fallos complétase la rellación de ganadores de los premios que concede la Conseyería d’Educación y Cultura, valoraos caún d’ellos en 3.000 euros. Enantes Ruma Barbero algamó'l VII Premiu Alfonso Iglesias de cómic por 'El viaxe a la lluz'; Vicente García Oliva'l VIII Premiu María Xosefa Canellada de lliteratura infantil y xuvenil con ‘Fontenebrosa III: el final’; y Antón García’l XXI Premiu Xuan María Acebal de poesía por ‘Ferralla’. Fonte: asturies.com
Norabona a los premiaos.
ResponderEliminarL'añu lliterariu asturianu va rematar de la meyor manera posible.
ResponderEliminar