Piden creyar puestos específicos de profesor d'asturianu

El Grupu Parllamentariu del Bloque por Asturies presentó una moción na Xunta Xeneral pa que'l parllamentu autonómicu solicite al Ministeriu d'Educación la creyación de puestos específicos de profesor de llingua asturiana.
L’oxetivu ta nel enseñu de primaria y secundaria, con profesoráu escoyíu por concursu públicu. Sedría una midida transitoria hasta que s'aprobare la especialidá docente, aspeutu que tamién demanda la propuesta. El parllamentariu de la organización, Roberto Colunga, y el voceru del Bloque, Rafael Palacios, ufiertaron una rueda prensa pa presentar esta moción, que surde tres la sentencia del Tribunal Superior de Xusticia d'Asturies qu'anula la ratio mínima d'alumnos pa creyar grupos de llingua asturiana na Educación Secundaria, establecida hasta agora n'ocho.

Palacios negó que l'aplicación d'esti fallu conlleve un espilfarru económicu, como caltuvo ayeri'l conseyeru d'Educación, Herminio Sastre, mientres la so comparencencia na comisión de la so cartera. Normalizar la situaciónLa propuesta fai una llarga esposición d'argumentos llegales y xurídicos, ente los que destaca la LOE y la Llei de Promoción y Uso del Asturianu, pa pidir la creyación de la especialidá de llingua asturiana. Colunga recordó que "tenemos más de 200 profesores de llingua, y más de 20.000 alumnos dando clas d'asturianu, ye'l momentu de normalizar esta situación", señaló. Asina, recordó que correspuende al Gobiernu asturianu facer esta solicitú al Estáu. Mientres llega'l momentu d'aprobase la especialidá, y de manera transitoria, el Bloque pide la provisión de puestos de profesor de llingua asturiana. Talos puestos cubriríense, "al traviés de les RPT del personal docente puestos específicos destinaos a la impartición de la llingua asturiana, conforme al artículu 30 de la Llei 3/1985, de 26 d'avientu, d'ordenación de la función pública de l'Alministración".

Convocaríense asina bolses de trabayu que, al contrario de les que yá existen, sedríen esclusives de Llingua Asturiana y dexaríen a los docentes d'esta materia n'igualdá de condiciones col restu. Entrugaos pola argumentación del Conseyeru, según la qu'esiste un informe del Estáu qu'impide la creyación de la especialidá, dambos representantes del Bloque foron tayantes: "ye falso". "Esi documentu", señaló Colunga, "lo único que diz ye que tien que ser la Comunidá Autónoma la que pida la creyación de la especialidá".

Ratio

Palacios negó, pela so parte, que l'anulación de la ratio d'ocho alumnos, y l'aplicación d'estes midíes suponga un "espilfarru". "Va ser una fonte de xeneración de puestos de trabayu, y tolo que tenga que ver con inversión en cultura y educación nun pue ser un espilfarru", señaló. Negó amás que la sentencia seya "recurrible", énte la intención del conseyeru de recurrir. "Lo que ye recurrible ye la propia llei", añedió. Amás, satisfízose porque la sentencia acabe con "la picaresca". "En munchos institutos llamaba dalgún padre preguntando pola asignatura de llingua, y contestáben-y que'l so fíu nun se podría matricular porque sólo taba él, y al siguiente que llamaba volvíen a dici-y lo mesmo, y asina socesivamente", acabó.

Fonte: Asturies.com