El Festival Arcu Atlánticu transforma Xixón en Un Mar de llingues

La programación cultural del Festival Arcu Atlánticu, que se celebrará en la ciudad del 25 al 30 de julio próximos, nos propone este año descubrir el variado mapa lingüístico de la costa Atlántica

 Asturies forma parte del corpus cultural e histórico Atlántico, mar que siempre ha sido su principal vía de comunicación con otros pueblos, con los que además comparte profundas raíces. Las barreras geográficas y culturales con las civilizaciones del interior volcaron a estos pueblos hacia el mar, generando un intercambio y una comunicación constante que permite identificarlos, aún hoy en día, como una unidad.

 Dedicando cada día a una lengua o familia de ellas el Festival Arcu Atlánticu propone un acercamiento a los territorios y a las situaciones que viven las Un Mar de llingues europeas atlánticas, que conviven con las grandes lenguas de comunicación internacional como el francés o el inglés, sobreviviendo  a siglos de homogeneización cultural y lingüística. Se quiere resaltar así la especificidad cultural del Arco Atlántico, así como la de cada uno de los territorios que lo componen, cuyo elemento más destacado es precisamente la existencia de lenguas propias.

 

Llingües europees

 Lenguas como el bretón, el occitano, el euskera, el Gallego, el frisón holandés, el bajo sajón alemán, el galés, el gaélico escocés o el gaélico irlandés  comparten problemática con el asturiano. Muchas de ellas, como ocurre con nuestro idioma, son lenguas minorizadas; todas son como mínimo “minoritarias”  pero perviven en sus respectivas nacionalidades gracias al sentimiento identitario de sus hablantes, que luchan por mantener su cultura y raíces.

 El Festival Arcu Atlánticu de Xixón es un evento cultural que nace en 2012 y que aspira a ser un proyecto integrador y polifacético que aúne las diferentes áreas culturales y creativas, con la finalidad de establecer una cooperación estable y sostenible con otros territorios del Arcu Atlánticu.                                                             Fonte: infoasturies.com

Alcuentros con dos xeneraciones d'enseñantes

Van falar el miércoles 10 de mayu, a les 19.30 nel salón d'actos del CMI d'El Llano sobre la escolarización n'asturianu.

Nel cursu escolar 1984/85, seis centros pilotu d'Asturies entamaben a poner clase d'asturianu per primer vegada. D'entós p'acá la enseñanza de la llingua asturiana foi xeneralizándose nes escueles, pero entá queden bien de coses por facer. 

Cola presencia d'una mayestra y un mayestru d'asturianu, que representen a dos xeneraciones d'enseñanates, Xose Mª García, ún de los primeros en llevar la llingua a les aules, y Esther Fonseca, más moza, va facese un percorríu per estos más de 30 años d'escolarización n'asturianu.

La charra, que lleva'l nome de 'Trés xeneraciones deprendiendo', va celebrase mañana dende les 19.30 hores nel salón d'actos del CMI El Llano. La entrada ye llibre.

Fonte: YeXixón.com

Oficialidá ye futuru pal asturianu

 

Güei celébrase'l Día de les Lletres Asturianes y un añu más, miles de persones vamos salir a la cai, como dende va más de cuarenta años, pa reclamar futuru pa la llingua asturiana. Anque se dieron pasos alantre importantes que meyoraron la percepción social del idioma, como la tímida presencia nel sistema educativu o nos medios de comunicación, lo cierto ye que los estudios siguen falando d'una perda de falantes que va llevanos a la estinción del asturianu en menos tiempu del que pensamos.

 

Ye la hora d'actuar, de tomar midíes que vayan más allá del simbólicu apoyu al asturianu que se fai en díes como esti. Les instituciones internacionales lleven décades avisando, la UNESCO, el Conseyu d'Europa... Paez que fuera ta más claro qué ye lo qu'hai que faer col asturianu o que dalgunos quieren más nun sentir estes recomendaciones d'organismos internacionales. Y les asturianes y asturianos, como responsables del curiáu de la llingua asturiana y del gallego-asturianu, somos los guardianes d'un patrimoniu inmaterial que ye de tola humanidá, tócanos mantenelu vivu y proyeutalu hacia'l futuru, polo que tenemos que faer que los responsables políticos sientan estes reivindicaciones.

 

Nun valen escuses, los nuesos políticos saben qué hai que faer. Nun tenemos más que mirar a los nuesos vecinos gallegos pa ver como unes polítiques actives de promoción y normalización del idioma son quien a faer muncho pa revertir un procesu de sustitución llingüística como'l que vivimos n'Asturies.

 

Pero n'Asturies nun cuerre peligru namás un patrimoniu cultural y llingüísticu. La falta d'oficialidá conviértenos a los falantes d'asturianu en ciudadanos de segunda, con menos drechos civiles que les persones que deciden o a les que nun-yos queda más remediu qu'espresase en castellán. La oficialidá ye la ferramienta que pue garantizar un cambiu nesti tratu desigual, antidemocráticu, anticonstitucional y que ye dificil d'entender dempués de más de trenta años d'oficialidá del restu de les llingües del estáu. 

 

Anque la responsabilidá principal de la situación del asturianu ye de los nuesos gobernantes, yá qu'ellos tienen les ferramientes necesaries pa camudala, la ciudadanía tien tamién que faer más, tenemos que llevar la oficialidá al nuesu día a día, reclamando mayor presencia del asturianu en tolos ámbitos, pero tamién faciendo usu del idioma, deprendiéndolu si nun lo sabemos, llevándolu a los nuesos trabayos, empreses, asociaciones y families. Porque oficialidá ye futuru y el futuru del asturianu depende de nós. 

 

Inaciu Galán y González

Presidente d'Iniciativa pol Asturianu

Fonte: El Comercio

Oríxenes, xunidá y diversidá

Xuan Porta

Europa foi nomada asina per primer vegada fai 3000 años. De mou que ye muncho más antigua que les sos naciones. La so xunión caltendría la fuercia del continente y la so diversidá. Europa, amás exerció del so orixe un focu universalizante empobináu al xéneru humanu. Tampoco nun ye un aparatu modernu, económicu o políticu, sinón que ye un idegal milenariu dende l’antigua Grecia. Atoparemos a Europa faciendo por ella, non nel sen del mercáu sinón nel de los sos xenios universales.

El primeru que punxo’l nome a Europa foi’l griegu Hesíodu nel añu 900 enantes de la nuesa era. Afitó que yera una diosa oceánida. Y el primer argumentu como xunidá y sentíu d’europeos que la defenden foi na dómina del Imperiu carolinxu, col que’l Reinu d’Asturies caltuvo rellaciones.

La llingua asturiana ye milenaria. Surdida del estáu más antiguu de la Península Ibérica. La xunidá na diversidá europea de la que somos parte entá nun se respeta nesti llau del continente. Entá nun se cumplen  los drechos llingüísticos que puxen pola oficialidá del nuesu idioma, nuna nidia discriminación coles otres autonomíes con llingües propies.

Europa apúrremos ferramientes como la Carta Europea de les Llingües Rexonales o Minoritaries. N’Europa hai 40 millones de falantes de les 30 llingües minorizaes na Xunión Europea según la UNESCO. Nesta carta nel so artículo 7, reconozse’l drechu “d’una aición resuelta pal fomentu de les llingües minoritaries col envís de salvaguardales”, asina como “la facilitación y fomentu del emplegu oral y escritu na vida pública y privada”, “la provisión de formes y medios afayadizos d’enseñu  y estudiu de les llingües minoritaries en tolos niveles”.

La Declaración Universal de los Drechos Humanos o la Declaración Universal de los Drechos Llingüísticos tamién protexen a les llingües minorizaes. Asina la primera diz nel so artículu 19 que “tou individuu tien drechu a la llibertá d’opinión y espresión” mentes que la segunda reconoz en detalle’l significáu de falar na llingua propia de les comunidaes minorizaes.

Europa encamienta al gobiernu asturianu dende múltiples instancies (como la de recién d’ELEN), a la Declaración d’oficialidá del asturianu, preséu fundamental pa la so sobrevivencia. La Xunta Xeneral cumpliría meyor la so función si nun se prohibiera l’usu de la nuesa llingua na so sé y atendiera al llema: seyamos más europeos respetando los nuesos drechos como asturianos, cultural y llingüísticamente.

Xuntemos d’esti mou, en mayu,  la cellebración del Día d’Europa col Día de les Lletres Asturianes, qu’estrena Premiu Nacional de Lliteratura Asturiana, nuna pallabra: Oficialidá.

Fonte: La Voz de Asturias

‘Fálame’ va llevar les cámares de TPA a colexos pa que los escolinos s'espresen n’asturianu

La primer temporada de ‘Fálame’ va consistir en 26 visites a centros educativos del país pa que los escolinos y escolines s’espresen en llingua asturiana o gallego-asturiano. Pese a que’l conseyu d’alministración de RTPA tenía avisu del estrenu d’esti programa infantil pal domingu, la so primer emisión va retrasase finalmente.

Médula Producciones, responsable de ‘Fálame’, ta nestos momentos grabando los episodios previstos nesta primer entrega, que se van poder ver en TPA a partir de mayu, según preve’l so xerente Carlos Navarro, qu’afirma que la direición del ente nun punxo fecha llende d’entrega de los primeros programes. De momento, yá se finó cola grabación de cinco de los 26 capítulos y en dos selmanes van tar pa emitise, anque s’espera un periodu de promoción previu per parte de la canal.

L’oxetivu del programa, de 30 minutos de llargor, ye’l de divulgar conocimientos llingüísticos d’asturianu, “pero nun va ser una clase de llingua asturiana”, apunta Navarro. “Va tener un componente teóricu, con un apunte de gramática y otru de vocabulariu, pero lo que se busca ye que los escolinos s’espresen na so llingua patrimonial”, afirma’l responsable de Médula Producciones.

Asina, baxo la supervisión de los sos maestros y maestres, van tomar la pallabra pa falar sobre dellos temes propuestos y cosadielles, asina como pa cantar. La música ye, precisamente, otru de los pegoyos de ‘Fálame’, con interpretaciones de cantares en direutu de Pop Piquiñín, grupu d’ésitu ente la reciella.

“En principio va ser una temporada, pero nos prestaría que s’allargara más”, apunta Navarro, que recuerda que Médula foi la empresa que s’encargó de ‘Presta asgaya’, hasta la fecha única programación infantil realizada dafechu pa TPA, de la que s’emitieron 300 capítulos tanto en castellanu como n’asturianu nos primeros años de TPA. Sicasí, nos últimos tiempos los espacios pa los más pequeños de la casa foron nulos, quitando la esperiencia de la serie gallega doblada al asturianu 'Los Bolechas', de la que s'emitieron dos temporaes.

Entovía ensin horariu confirmáu, la emisión de 'Fálame' va producise na mañana de los domingos, mientres que'l sábadu siguiente va repetise l'episodiu de la selmana anterior.

Fonte: asturies.com

Alonso respuende al PP que nun va frenar el plan esperimental pa facer l’asturianu llingua vehicular en Primaria

por Pablo R. Guardado

El PP entrugó esti xueves na Xunta Xeneral pol plan esperimental pa facer l’asturianu llingua vehicular en Primaria, que pretende llevar a los tribunales. El conseyeru Genaro Alonso respondió a los populares que va ponese en marcha’l cursu viniente “sí o sí”.

El responsable d’Educación y Cultura fixo referencia al artículu 9 de la Llei de Promoción y Usu del Bable/Asturianu, qu’afita que “el Principáu d’Asturies, nel exerciciu de les sos competencies, asegurará l’enseñu del bable/asturianu y promoverá’l so usu dientro del sistema educativu, nos términos previstos nel Estatutu d’Autonomía d’Asturies”, calcando no que se refier al fomentu del so usu na Enseñanza y refugando, como denuncia’l Partido Popular (PP), que’l plan esperimental tenga dalgo que ver cola oficialidá. Asina, fundaméntalu en dicha normativa, aprobada baxo’l Gobiernu de Sergio Marques baxó les sigles populares.

Alonso tamién recordó que los escolinos y escolines qu’escueyan la opción de contar con materies en llingua asturiana van facelo de forma voluntaria, echando en cara al PP la so doble vara de midir con respuetu a la llibertá de les familes. D’igual forma, na so intervención confirmó que les árees nes que se van dar los conteníos en llingua asturiana van ser Ciencies Sociales, Educación Física, Plástica y finalmente Ciencies Naturales.

“El centru va escoyer una de les árees y la llingua castellana va ser la llingua d’una de les sos sesiones selmanales”, apuntó Alonso, qu’incidició que’l plan, “pilotu, esperimental y voluntariu”, va tener como oxetivu fundamental “la meyora de la competencia comunicativa d’aquellos alumnos que formen parte del mesmu, asina como la promoción del usu del asturianu dientro del sistema educativu nos términos previstos nel Estatutu y na Llei d’Usu”.

Fonte: Asturies.com

La XDLA acusa a Javier Fernández de vetar l’asturianu dientro del proyeutu de llei de llingües qu’impulsa’l PSOE

La Xunta pola Defensa de la Llingua (XDLA) vieno acabante de denunciar el vetu de la FSA a la llingua asturiana na llei de llingües qu’impulsa’l PSOE, depués de qu’Asturies participara nun alcuentru estatal pa ellaborar una llei de llingües. Los socialistes acaben rexistrar una propuesta de llei que veta l’usu del nuestru idioma.

En mayu del 2016, una delegación asturiana encabezada pol direutor xeneral de Planificación Llingüística y Normalización del Gobiernu d’Asturies, Fernando Padilla, participó en Valencia nel I Seminari de Direccions Generals de Política Lingüística, onde tamién participaron País Vascu, Cataluña, Isles Baleares, Galicia, País Valencianu, Navarra y Aragón. L’oxetivu del alcuentru yera impulsar un borrador de llei estatal de llingües propies pa desarrollar l’artículu 3 de la Constitución.

Sicasí, sigún denuncia la XDLA, pocos meses depués, el PSOE rexistra nel Congresu de los Diputaos una proposición de llei pa normalizar -esplicitamente- l’usu del catalán, vascu y gallegu na alministración estatal. Quier dicise pala organización de defensa del idioma que “los asturianos quedamos fuera, volvemos ser ciudadanos de segunda ensin los mesmos derechos que’l restu d’habitantes del Estáu”.

Na opinión de la Xunta Pola, “ye de reseñar qu’esti pasu atrás ye una clara amuesa del trabayu en contra de los intereses del nuestru país del presidente de la xestora del PSOE -y presidente d’Asturies a tiempu parcial-, Javier Fernández. Falamos d’una persona que ye famosa por felicitar la navidá a los asturianos en más d’una decena de llingües, pero non nes que tán protexíes pola llexislación autonómica, asturianu y gallego-asturianu. Tamién ye conocíu por usar el diccionariu de l’Academia de la LlinguaAsturiana, obra cumal de la historia de la filoloxía asturiana, como soporte pa llevantar la pantalla del so ordenador. Unes muestres clares de respetu pola nuestra cultura y señes d’identidá”.

Agora, si esta llei sal alantre cola redaición actual, “los ciudanos d’otros territorios billingües van poder dirixise a l’Alministración estatal nel so idioma. Amás, la producción cultural en gallegu, vascu y catalán va recibir ayudes, igual que se va promover la presencia d’estos idiomes nes emisiones de RTVE. Asina, los asturianos y asturianes vamos pagar colos nuestros impuestos l’usu d’otres llingües, pero vamos tener mil problemes pa usar la nuestra en casa”. 

Un asturianu tamién va poder renovar el DNI en Lluanco, n’A Veiga o en Xixón en gallegu, catalán o vascu, pero nun va poder facelo n’asturianu. Amás, va tener mil problemes y va tener que presentar unos cuantos requerimientos pa qu’esti documentu incluya los topónimos oficiales del sitiu onde vive.

Too ello “gracies al PSOE, un partíu qu’en Madrid afirma que l’afitamientu de cualquiera de les llingües españoles nun va en detrimentu de les otres, pero qu’equí -cola complicidá o pasividá de los demás grupos representaos na Xunta Xeneral-, nun usa la toponimia asturiana nos documentos oficiales, recorta a lo mínimo les ayudes a la industria de la llingua -un sector que xenera una cantidá importante de puestos de trabayu direutos y indireutos- y mantién la RTPA como ferramienta d’aculturización, en contra de la mesma Llei d’Usu”.

Fonte: Asturnews

Iniciativa pol Asturianu reclama al PSOE que tenga en cuenta al asturianu na so proposición sobre llingües

El PSOE ta trabayando nuna proposición de llei que tien l’envís de da-y puxu a les llingües oficiales del Estáu en tolos ámbitos de l’alministración y  grandes empreses. Poro, Iniciativa pol Asturianu ta reclamando al partíu estatal que la llingua de los asturianos seya tenida en cuenta nesa propuesta llexislativa pues gocia d’un marcu de proteición que nun tien porque ser escluyente pa esta proposición.

La entidá comparte dafechamente la declaración de los autores d’esta proposición de llei, onde se diz testualmente que “El fortalecimientu de cualquiera de les llingües españoles nun va en desterciu de les otres. Nun tien por qué esistir, y ye un erru dicilo neses pallabres, una competición ente llingües, un xuegu de suma cero”.

Cabe traer a l’arcoldanza, la Llei 1/98 del 23 de marzu, d’Usu y Promoción del Asturianu, concretamente nos artículos 1, 2, 3 y 4 del capítulu I de la mesma, onde se diz lliteralmente que: “L’asturianu como llingua tradicional d'Asturies, gociará de proteccion. El Principáu d'Asturies promoverá’l so usu, difusión y enseñu” y qu’amás Tolos ciudadanos tienen derechu a emplegar el bable/asturianu y a esplicase nelli, de pallabra y per escrito [n’alminsitración]”. Polo que’l gobiernu asturianu ta en disposición d’informar y facer cumplir la llei a toles alministraciones comunitaries

Podemos concluyir que la llingua de de la nuesa comunidá gocia d’un marcu de proteición, lo que fai que la sociedá civil asturiana tea en condiciones d’esixir que s’aplique la llei y qu’ésta se tenga en cuenta en casu de que s’amplien les condiciones de la mesma. Nesti sen, Iniciativa pol Asturianu va tar ehí reivindicando esta situación, al empar qu’ufiertando la so collaboración y trabayu en casu de que puedan necesitalo.

Fonte: Iniciativa pol Asturianu

Asoléyase’l númberu 16 de la Revista de Filoloxía Asturiana

El Seminariu de Filoloxía Asturiana ta acabante d’asoleyar un númberu nuevu de la Revista de Filoloxía Asturiana, el 16, correspondiente al 2016. Editáu por Trabe, tamién se pue consultar al traviés de la plataforma Reunido de la Universidá d'Uviéu.

Esta espublización añal recueye artículos d'investigación nuevos, notes, cróniques y otros conteníos nes so páxines. Na primer estaya, atopamos cinco estudios, sobre la ‘Caracterización funcional de la interxección: a propósitu de delles interxecciones del asturianu’, d’Alfredo Álvarez Menéndez; ‘El neutro de materia en asturiano: Un acercamiento sintáctico al fenómeno en cuanto a la especificidad, genericidad y la posición del adjetivo’, de Matthew J. Burner; ‘El paisaxe solidariu: léxicu y toponimia comuñera’, de Xulio Concepción; ‘{Tener/llevar} + participio en el castellano de los Siglos de Oro y algunas notas interlingüísticas’, de Patricia Fernández Martín; y ‘Diálogos políticos de los años trenta’, de Rafael Rodríguez Valdés.

Les notes d’Enrique Pato y Iván Cueves ‘Notas sobre los infinitivos en -e (vendere) en la historia de la lengua’ y ‘Bibliografía 2012’, de manera respeutiva, y la necrolóxica ‘Juan Ignacio Ruiz de la Peña (1941-2016). Memoria de un asturianista’, obra de José A. Álvarez Castrillón, siguen a estos trabayos. Por último, enantes de la crónica que zarra la revista, inclúinse les reseñes ‘La traducción. Nuevos planteamientos teórico-metodológicos’, de María Azucena Penas, por Fernández Martín; ‘Esbozo del Diccionario de bable del centro y oriente de Asturias de José García Peláez ‘Pepín de Pría’’, de Beatriz Hernán-Gómez, a cargu de Xulio Viejo; ‘Palabras y cosas de Bermiego (Quirós) (1950-1961)’, de Manuel Menéndez García, fecha por Franco Nagore; ‘Palabres nueves n’asturianu. Proyectu Observatoriu Asturianu de Neoloxía y Terminoloxía (AsturNeo). Informe de los años 2010, 2011 y 2012’, Ramón d’Andrés, Vanesa Díaz Fanjul y Sara Gutiérrez Rodríguez, comentada por Cristina Bleorţu; y ‘Current Approaches to Limits and Areas in Dialectology’, d’Ernestina Carrilho, Catarina Magro y Xosé Álvarez, redautada por Carlota de Benito.
Fonte: asturies.com

La segunda entrega de Bestiariu, con dolce animales nuevos, yá se viende

Tres l'esitu de la primer entrega, 'Bestiariu 2', discu producíu por La Fabriquina axunta a 12 nuevos grupos que canten a otros tantos animales. Nacho Vegas, Skama la Rede, ¿Aú? o Herbamora son dalgunos de los participantes.

Son 12 grupos y dolce nuevos animales que van tar presentes en cientos de cases esti Nadal. Bestiariu repite formula na so nueva entrega, pero non participantes, yá que  dende La Fabriquina contactóse con nuevos artistes del ricu y variáu panorama musical asturianu. Nacho Vegas y el Coru al altu la lleva, La Bande, Møna, ¿Aú?, Arma X, Skama la rede, La Bonturné, L@s Electric@s, Lavandera, Herbamora y Elle Belga conformen el llistáu de nuevos artistes y grupos asturianos que dan forma a esta nueva entrega de Bestiariu. Sólo repite Muga y el Corín de Reciella, el proyeutu musical qu'axunta a los impulsores d'esta iniciativa y al coru de l'asociación Reciella.

Y l’oxetivu de 'Bestiariu 2' ye, otra vuelta, averar la música a lo más pequeño de la casa, pero tamién a les sos families utilizando l'asturianu como llingua vehicular. Asina, con una temática prestosa pa los pequeños de la casa, los animales sirven de filu conductor nun discu que transita per dellos estilos musicales; los mesmos de cada banda y autor, a los que dende La Fabriquina propúnxose-yos participar en Bestiariu con dos úniques condiciones: cantar a un animal y faelo n'asturianu.

Quien escuche esti 'Bestiariu 2', un CD pensáu non sólo pa neños y neñes, sinón pa tola familia, va atopar un hipopótamu que nun quier compartir, una raposa vegana, un tamarín que nos gustaría ver per Xixón, una mona que suaña dientro d'una xaula, una xatina cola que podemos practicar el soníu de la x, un gatu que vive nun país hostil, un cámbaru folixeru, una xaronca mal encarada que quier esnalar, un perezosu arguyosu, unes caparines en peligru, un cuscupín que paez un felpudu o una lluciérnaga que va faenos llegar a bon puertu.

Cola mayoría de les sos temes grabáu en Sonidopolis, y cola producción musical, amás de los artistes, de Pedro Vigil, 'Bestiariu 2', editáu en formatu digipack por Araz.net –empresa editora tamién d'Asturies.com– , vuelve cuntar colos diseños de Marco Recuero que recrea na portada y el llibretu con una personalidá bien característica caún de los animales.

Tres l'ésitu de Bestiariu el pasáu 2015, La Fabriquina en 2016 vuelve apostar por esti proyectu que yá nacía con vocación de coleición y col que s'amplía la familia d'animales a 22: 10 de 'Bestiariu' y 12 de 'Bestiariu' 2.

Fonte: Asturies.com

Aporta la Navidá y con ella tornen les ‘Escenines pa la Reciella’

Lleguen les fiestes navidiegues y, per cuartu añu, el ciclu ‘Escenines pa la Reciella’ protagoniza los eventos infantiles previstos pa estos díes nel país. ‘Reciella. Families pol Asturianu’ amplía nesta edición les actividaes que se celebren en Xixón a cinco, dos d’elles con sede nel Antiguu Institutu.

El conciertu-presentación de ‘Bestiariu 2’, discu producíu por La Fabriquina y editáu por Araz.net –empresa tamién editora d’Asturies.com– qu’inclúi doce temes nuevos d’otres tantes bandes asturianes, siguiendo l’ésitu del primer ‘Bestiariu’, va abir ‘Escenines pa la Reciella’ el llunes 26. Va ser al meudía nel salón d’actos del Colexu Públicu Xovellanos.

La segunda cita va ser tamién músical, cola presentación de la versión n’asturianu de ‘Pulgarina’. Va celebrase a les 19 hores del xueves 29 nel salón d’actos del Centru de Cultura Antiguu Institutu y va contar cola actuación d’Alicia Álvarez, que va interpretar los temes d’esti discu-llibru editáu tamién por Araz.

El teatru, mentes, va protagonizar les trés actividaes restantes. ‘Retalinos’, d’Olga Cuervo y David Varela, va representase’l llunes 2 de xineru a les 12 hores (Antiguu Institutu), siendo’l turnu de ‘Una casa’, d’Higiénico Papel, el día siguienta a les 19 hores (CP Xovellanos). Va poner el ramu al tercer ‘Escenines pa la Reciella’ la obra ‘Runa’, de Nun Tris, el miércoles 4 a les 19 hores (CP Xovellanos).

La entrada a los cinco eventos del ciclu entamáu por Reciella ye de baldre hasta completar l’aforu de les sales.

Fonte: asturies.com

TPA va entamar a emitir partíos de fútbol n’asturianu de forma periódica

Esti domingu va producise la primer emisión d’un partíu de fútbol n’asturianu en TPA. Va ser el Lealtad-Coruxo de Segunda División B, choque que van comentar Miguel Fernandi y Nacio González y que va ser el primeru de munchos, yá que la intención de la direición xeneral del ente ye la de retresmitir al menos un alcuentru al mes.

El partíu programáu al meudía en Les Caleyes va pasar a la historia por ser el primeru que la televisión pública va emitir en llingua asturiana nos sos diez años de vida. Fernandi va ser l’encargáu de llevar el pesu de la retresmisión col acompañamientu nos comentarios de González, col que yá coincidiera en Radio Sele nos partíos del Uviéu.

“Ye un acontecimientu más que simbólicu, yá que la idea ye la de facer al menos un partíu al mes del Lealtad y del Caudal”, esto ye, los dos equipos del país que militen en Segunda División B, esplica Fernandi, que nun descarta que tamién se pudiera emitir n’asturianu dalgún de Tercera División, dependiente d’otra productora. Nesi sen, nun se pueden sumar a esta iniciativa los alcuentros del Sporting y l’Uviéu pol fechu de que RTPA nun tien los derechos de retresmisión de la LFP.

40 años de retrasu

La direición xeneral de RTPA y la Direición Xeneral de Planificación Llingüística y Normalización son les impulsores d’esta iniciativa, pa lo que confiaron nel llabor de Fernandi, trabayador de la radio pública, que debuta asina nuna retresmisión televisiva. “Toi mui contentu por tener esta oportunidá histórica”, destaca’l lluanquín, qu’afirma que’l fechu de que se pueda ver na TPA un partíu de fútbol n’asturianu “ye un pasu mui importante pa la normalización del idioma, como sería tamién informativu”, anque apunta “que vien con 40 años de retrasu”, comparándolo coles emisiones en llingua propia de les otres autonómiques.

El partíu ente’l Lealtad y el Coruxo va disputase a les 12 hores del domingu. El conxuntu maliayu vien cargáu de moral tres la victoria por 2-3 col Somozas, partíu que-y valió p’asentase nuna cómoda décima posición, a cinco puntos de los puestos de peligru. Un trunfu énte’l conxuntu gallegu en Les Caleyes serviría a los de Roberto Aguirre p’alcanzar na tabla al Coruxo, que suma 25 puntos, y roblar asina una gran primer vuelta.

Fonte: asturies.com

'Pulgarina' d'Alicia Álvarez en conciertu dientro del ciclu Escenines

Alicia Álvarez va presentar el so llibru-discu 'Pulgarina' na so versión n'asturianu'l Xueves 29 d'avientu nel Antiguu Institutu a les 19:00. 

PULGARINA ye un llibru-discu d'Alicia Álvarez (Pauline en la Playa) ilustráu por Alicia Varela.

El llibru -formatu tapa dura y de 23 x 27cm- va acompañáu por un CD con siete composiciones de pop intimista y melancólicu interpretaos y compuestos pola autora. La producción musical ye de Daniel Fletcher y el discu foi grabáu nos estudios Supersonic d'Asturies.

Esti llibru-discu cuenta tamién con versión en castellanu y va presentase en conciertu acústicu esti xueves 8 a les 12:30h. nel cafe La Revoltosa de Xixón, y el sábadu 10 a les 19:00h. na FNAC (Intu Asturias).

Fonte: YeXixón.com

L’Arqueolóxicu y el Belles Artes acueyen un proyeutu pilotu de visites guiaes n’asturianu

Adultos y escolinos van poder conocer les artes y la historia del país al traviés de visites guiaes en llingua asturianu a dos de los centros culturales más importantes d’Asturies: el Belles Artes y l’Arqueolóxicu. En principio van celebrase dos xornaes, esti mes y n’avientu, cola intención de da-y continuidá al proyeutu nel 2017.

La Direición Xeneral de Planificación Llingüística y Normalización entama esta iniciativa en collaboración colos dos museos tres la bona experiencia de la Selmana de les Lletres Asturianes, onde yá se fixeron visites guiaes n’asturianu tanto al Arqueolóxicu como al Belles Artes. Esti proyeutu pilotu, enfocáu a escolinos y al públicu xeneral, establez dos feches pa dar a “conocer la nuesa historia y les nuestres artes, n’asturianu”: el día 26 de payares y el 17 d’avientu pal públicu, y los díes 25 de payares y el 16 d'avientu pa escolinos, que nesta ocasión participarán cuatru centros escolares d'Uviéu.

La visita al Muséu Arqueolóxicu va tener llugar a les 11 hores, mentes que la del Belles Artes va principiar a les 12.30 hores, siendo dambes de baldre. La intención de Planificación Llingüística ye dar continuidá a esta iniciativa nel 2017 con itinerarios diferentes, tal y como faen habitualmente en castellanu dambos museos.

Difusión del asturianu “al traviés de la cultura”

La presentación d’esta campaña de visites guiaes n’asturianu fíxose esta mañana nel Muséu Arqueolóxicu d’Asturies, actu nel que tuvo presente’l direutor del centru, Ignacio Alonso, xunto col del Belles Artes, Alfonso Palacio, y Fernando Padilla. El direutor xeneral de Planificación Llingüística y Normalización destacó sobre manera na so intervención la posibilidá qu’ufierta esta iniciativa de “averar a la población asturiana'l mundu del Arte y la Historia de la so tierra emplegando la llingua tradicional”.

Palacio, pela so so parte, emponderó’l proyeutu pilotu pola “difusión, normalización, visibilización y promoción” que permite del asturianu “al traviés de la cultura”. D’igual forma recordó’l compromisu pa col idioma del Belles Artes, señalando la torna al asturianu de la páxina web o la espublización de folletos y del calendariu del muséu n’asturianu, “del que vamos aumentar la tirada nesti 2017”.

L’encargáu d’abrir y zarrar l’actu foi l’anfitrión, Alonso, que felicitó la iniciativa porque permite “una visión non esplotada hasta agora del patrimoniu históricu”, destacando la proximidá qu’aporta la propia llingua a la esplicación de los materiales del Arqueolóxicu.

Na semeya, Alonso, Padilla y Palacio.

Fonte: Asturies.com

IX plantega l’asturianu como prioridá nel presupuestu

IX plantega les sos prioridaes al executivu asturianu pa la ellaboración del presupuestu y esixe una xunta tripartita pa garantizar que’l presupuestu tenga mayoría de votos na cámara asturiana.  

IX solicitó esti llunes una xunta tripartita, na que tea presente Podemos, pa ver el proyeutu enantes de la so presentación na Xunta Xeneral. Les prioridaes d’IX, como yá manifestó la coalición, tán centraes nel salariu social y el rescate social, la educación de 0 a 3 años y el contratu programa cola Universidá, y na salú pública y la salú mental, el mediu ambiente, la igualdá de xéneru, l’asturianu y la cooperación al desenvolvimientu.

Nesta xunta, de daqué más de dos hores que sirvió pa oldear posiciones, IX volvió amosar la so disponibilidá a solucionar l’erru de saltu y a ameyorar l’impuestu de patrimoniu, la llucha anti fraude y establecer impuestos ambientales, de manera que la recaldación calténgase y ameyórese la xusticia fiscal. Nesti sentíu, IX espera que se materialice una xunta de los trés partíos y si nesta produz un acercamientu, y namái si hai certidume de mayoría, el  grupu parllamentariu d’IX va poner en manos de la dirección de la coalición la decisión final.
Fonte: Asturnews

DÍA EUROPÉU DE LES LLINGÜES: OFICIALIDÁ

OFICIALIDÁ

Fonte: Iniciativa pol Asturianu

La novena d'Europa

Xuan Porta
El catalán ye la novena llingua de la Xunión Europea y entá nun tien calter oficial na mesma. Dicen que si Andorra entrara nel club comunitariu yá taría llograo automáticamente al ser un estáu miembru. Pero pa la oficialidá n’Europa sedría enforma con qu’España lo demandare, yá que’l catalán ye llingua cooficial de parte del territoriu. Nesti casu tamién habría de pidilo pal eusquera y pal gallegu. Poro, l’asturianu y l’aragonés tendríen entá más sides pa desixir la so cooficialidá.

La llingua catalana fálase nun área de 68.000 km2, nos cualos viven unos 13.529.000 de persones. D’elles saben falala 9.119000 y la pescancien 11.011.000 persones. Anguaño, ta dividida en siete territorios distribuyíos en cuatro estaos: Andorra, España, Francia ya Itàlia. Los estatutos de Cataluña (1979) y de les Islles Baleares (1983) reconocen el catalán como la llingua propia d’estos territorios y la declaren llingua oficial xuntamente col castellanu, y tamién lo fizo, cola denomación llegal de valencianu, el de la Comunidá Valenciana (1982). Amás, la Constitución d’Andorra (1993) establez que’l catalán ye la llingua oficial del Estáu. Asinamesmo, los parllamentos autónomos de Cataluña, les Islles Baleares y la Comunidá Valenciana aprobaren lleis de sofitu a la llingua catalana, que la introduxeren na escuela, l’alministració y los medios de comunicación institucionales. Tamién creáronse medios de comunicación como TV3 y Catalunya Ràdio en Cataluña, IB3 nes Islles Baleares o la Canal 9 en Valencia, y un gran númberu de radios y televisiones llocales, amás de recuperar presencia na prensa. La edición en llingua catalana aportó a cotes mui altes de títulos editaos, miles, con un total de millones d’exemplares. En rellación coles llingües oficiales de la Xunión Europea, Cataluña, Islles Balears y Comunidá Valenciana, (onde ye oficial) tienen más población que los territorios en que son oficiales ocho de les llingües oficiales na Xunión Europea. Si namái consideramos  el númberu de persones que saben falalu, el catalán ye más faláu n’Europa que’l portuguès, el checu, l’húngaru, el suecu, el búlgaru, el danès, l’eslovacu, el finès, el croata, el gaélicu irlandès, el lituanu, el letón, l’eslovenu, l’estoniu y el maltès. Poro, ye la llingua minorizada con más falantes d’Europa. Rique un estatus d’oficialidá na Xunión Europea a pola mor de la so entidá. L’asturianu fálase nun territoriu con más falantes que dos estaos miembros: Luxemburgu y  Malta. Poro, amerita la so oficialidá nel estáu español y también na Xunión Europea, al mesmu nivel que tean les llingües cooficiales d’España. Onde 4 de cada 10 ciudadanos viven en comunidaes autónomes con más d’una llingua oficial. 

La bayura de les llingües tien que tar n’ayén a los alderiques políticos. Son patrimoniu cultural pa valorizar ente toos. Fonte: La Voz de Asturias