Vuelta a Europa pa conocer les comunidaes llingüístiques

La vuelta a Europa en 67 comunidaes llingüístiques.
Emmanuel Le Merlus ye un bretón que ta faciendo un percorríu en bicicleta per toa Europa pa dar a conocer el so idioma y visitar 67 comunidaes llingüístiques, ente elles Asturies.
Le Merlus ye aficionáu al ciclismu y presidente de l’asociación ‘Unatet e liesseurted ar yezhou’ (Xuníos na diversidá llingüística). Salió de la so tierra’l pasáu fin de selmana direición Cornualles, la primera de les 67 comunidaes llingüístiques d’Europa que va visitar.

Depués vendrán les naciones celtes de les Islles Britániques, baxará a Frisia en barcu, pa llueu pasar pelos países escandinavos, centru y sureste del continente... Asina fasta llegar a la Península Iberica sobre l’iviernu, pasando per Galicia, Asturies, País Vascu y Cataluña.
Quier facer 80 quilómetros al día descansando cada seis xornaes, hasta finar en mayu de 2011 en Bélxica, onde conocera a flamencos y valones. Sedrán 1.800 quilómetros al traviés de 24 estaos europeos. Amás, en tolos países va entrevistase con organizaciones vinculaes a la defensa del idioma llariegu.

Pal so viaxe, cunta col sofitu de treces escueles d’inmersión llingüística en bretón, que lu aidaron a xuntar 15.000 de los 18.000 euros que necesita pa facer tol viaxe. Según recueye’l diariu bretón Ouest-France, el más lleíu de tol Estáu, pa Le Merlus la diversidá llingüística ye "una muria de contención pa desaniciar la uniformidá cultural”. Afirma qu'asina quier promocionar la so llingua y conocer otros idiomes minoritarios como'l de so.

Fonte: Asturies.com