Asoleyada la revista Lliteratura númberu 31

LLITERATURA. Revista Lliteraria Asturiana

Lliteratura. Revista lliteraria asturiana. nu 31 (2015) Uviéu, ALLA.
Nueva entrega d’esta revista lliteraria pa celebrar el XXXVI Día de les Lletres Asturianes na que participen en «Narrativa» Mª Esther García López, Miguel Rojo, Inaciu Galán y González, Vicente García Oliva y Xurde Álvarez. En «Poesía» alcontramos testos de Xosé Bolado, Xurde Fernández, Marta Mori, Ricardo Saavedra Fernández-Combarro, Miguel Rodríguez Monteavaro, Sofía Castañón y Naomi Suárez González. Esti númberu tamién recueye un especial dedicáu a María Teresa González a cargu de Xuan Xosé Sánchez Vicente.La seición de «Ensayu» presenta testos de Néstor Villazón y Ramón Cueva. La estaya «Traducción» ufre los trabayos de Inaciu Galán y González y Víctor Suárez Piñero. Zarra’l númberu un «Varia» de Roberto González Quevedo.

Fonte: Academia de la Llingua Asturiana

Política Llingüística asoleya'l llibru del Día de les Ciencies Asturianes

La Direición Xeneral de Política Llingüística entama cada añu'l Día de les Ciencies Asturianes, cola mira de fomentar dende la óptica de la llingua asturiana l'emplegu responsable de la ciencia en beneficiu de la sociedá y nesti caberu añu 2014 y col lema «El viaxe de les palabres pela rede. Los peligros del mundu dixital», les actividaes buscaben tresmitir a la xente mozo que la ciencia ye un patrimoniu común en que la so práctica y en que'l so progresu tien de participar la sociedá al completu. El llibru que recueye toles aportaciones pue descargase yá de baldre. L'enfotu de la xornada yera tamién trabayar reconociendo y incorporando los llogros de la cultura científica y la evolución tecnolóxica y contribuyendo de manera crítica y xenerosa al so desenvolvimientu. El llibru billingüe (asturianu y gallego-asturianu), yá disponible na sección «Descarga de publicaciones» de la web del serviciu de Política Llingüística, recueye los materiales preparaos pal V Día de les Ciencies Asturianes por miembros de los colexos oficiales d'inxenieros n'informática d'Asturies. Fnte: Asturnews

"La Sidra" pon na cai'l so númberu 130

El númberu de La Sidra correspondiente al mes d'ochobre que fai'l númberu 130 yá ta disponible pa la so descarga en pdf, con una bayura conteníos venceyaos a la cultura sidrera y que recueye les sos seiciones de siempre (muyeres del llagar con Eva Trabanco Olmo, l'axenda sidrera, ect..) y dedica-y abondu espaciu a eventos como'l Festival Intercélticu de Lorient del agostu pasáu, el Concursu de Semeyes La Sidra, o el III Concursu Asturianu de Sidre Casero. Esti númeru tamién ufre unos interesantes apuntes sobre la sidre nel conceyu de Piloña y sobre etiquetes históriques. Más información: Númberu 130 de La Sidra Fonte: Asturnews

El celtismu llingüísticu y García Arias protagonicen el númberu 34 de la revista Asturies

La Fundación Belenos vieno acabante d’asoleyar esta selmana pasada'l númberu 34 de la so revista, “Asturies, memoria encesa d’un país”, na qu'amás de les estayes habituales, como Memoria Gráfica d’Asturies, nesta ocasión firmada por Antón Álvarez Sevilla y dedicada a apurrir dellos datos ya imáxenes sobre les nueses races autóctones nun asoleyaos enantes en trabayos de so, y Cartafueyos de Belenos, la espublización recueye trabayos de munchu interés como'l firmáu por García Arias alrodiu del celtismu llingüísticu n'Asturies. La llista d'artículos d'esti númberu 34 entámala "Averamientu a la ecoloxía de los conceyos asturianos del Altu Navia" por Fernando Montes García y síguela "Una reflexón sol celtismu llingüísticu asturianu" de Xosé Lluís García Arias, tres del que pue lleese l'artículu "Afayu d’una estela con decoración castreña n’Antrialgu (Piloña)" por mor de la investigación d'Ástur Paredes, Daniel Cueli Canto y Alberto Álvarez Peña. Completen esti númeru dellos otros artículos como "El guerreru durmiente" d'Alberto Álvarez Peña; "El palu: un arma na tradición asturiana" de Gausón Fernande Gutierri, "Catalogar pa protexer: el padremuñu etnográficu del conceyu de Cabrales" de Diego Ruiz de la Peña Ruiz y Alberto Álvarez Uría y "El “Celta o Astur”, una escultura de Folgueras" de Lluis Portal Hevia. El caberu de los artículos col que se pieslla'l númberu ye "Cill Áirne: trenta años d’un viaxe iniciáticu a la verde Erín" firmáu por Ignaciu Llope. La revista va distribuyise ente los suscriptores nos prósimos díes y yá se pue mercar nes llibreríes Ojanguren (Uviéu), Paradiso (Xixón) y Rima (L’Infiestu). Fonte: Asturnews

L'ALLA asoleya la 5ª edición d'El Principín

L'Academia de la Llingua Asturiana asoleya la quinta edición de la torna a la nuesa llingua d'esti clásicu lliterariu. Dende l'Academia de la Llingua Asturiana anunciaron la espublización d'una nueva edición, la quinta yá, d' "El Principín", torna a la llingua asturiana del clásicu lliterariu vertíu a la nuesa llingua por Xose Lluis García Arias, cola collaboración de M. Suárez Estrada. Esta obra d'Antoine de Saint-Exupéry -Le Petit Prince, na so edición orixinal-, ye una novela curtia espublizada en 1943, y de gran rellevancia cola so versión en decenes de llingües a lo llargo del mundu. La torna a la llingua asturiana foi asoleyada per primer vegada en 1983, polo que 30 años depués de la so primer edición, l'Academia de la Llingua quixo rescatar un trabayu lliterariu que yá ta disponible pa la so merca en llibreríes. "El Principín" ye una de les obres que componen la coleición "Escolín", editada pola institución académica asturiana. Fonte: Infoasturies