Marxinación del idioma na TPA

La Xunta pola Llingua critica que la TPA diera más prioridá a la 'caravana del amor' qu'al Conciertu pola Oficialidá

Foto: EUROPA PRESS UVIÉU

   La Xunta pola Defensa de la Llingua Asturiana criticó esti vienres duramente la "escasa" atención informativa que prestó la televisión autonómica TPA al Conciertu pola Oficialidá, que'l sábado pasáu celebró la so XXV edición. Concretamente, llamenta qu'eventos como la primer misa del Obispu auxiliar o la 'caravana del amor' en Piloña tuvieren más ecu nel ente públicu que la folixa musical reivindicativa qu'organiza esta asociación.

   Al través d'una nota de prensa, la Xunta acusó de la TPA una vez más de marxinar a la llingua asturiana y a los actos con ella relacionaos. Asina, recuerda que la edición del Conciertu, celebrada'l pasáu 8 de xunu foi un "éxitu", y sicasí namás mereció "unos segundos" nel informativu del domingu.

   "Y yá nun ye namás la cita d'esti sábadu. Asina, el 4 de xunu, nengún equipu de la televisión autonómica acudió a cubrir la inauguración de la esposición sobre los 25 años del Conciertu pola Oficialidá, actu col que la XDLA aprovechó pa homenaxar a los más de 70 grupos que pasaran pel conciertu. Tampoco nun acudió la televisión que dicía ser 'reflexu d'Asturies' a la rueda de prensa que se fizo'l vienres 7 pa presentar la edición que fixo'l mediu sieglu", añade'l comunicáu.

   Según la Xunta, "nun ye la primer vez que la TPA da un tratu marxinal a feches señalaes nel calendariu de la reivindicación llingüística. Asina, el 3 de mayu, Día de les Lletres Asturianes, la manifestación pola oficialidá del asturianu _a la qu'acudieron unes 3.000 persones_ y la Xunta Estraordinaria de l'Academia de la Llingua namás ocuparon un minutu en total al final del informativu".

   La organización critica que "los actos qu'entamó la sociedá civil y la máxima institución llingüística del país recibíen el mesmu tratamientu qu'en TPA recibe un certame gastronómicu o un accidente de coche en Burgos, por poner unos exemplos". "La situación choca cola de Galicia y la TVG, que'l 17 de mayu celebró'l Día das Letras Galegas cola retresmitisión en directo del actu de la Real Academia Galega per TVG y Radio Galega. Mentanto, nel TPA Noticias del mediudía del 3 de mayu nun hubo nenguna noticia que recordare que yera'l Día de les Lletres Asturianes", matiza'l comunicáu.

   Sobre'l Conciertu pola Oficialidá, diz que los responsables de la TPA, "consideraron más destacable una "caravana del amor" en Piloña o la primer misa del Obispu Auxiliar, a la qu'acudieron 200 persones _hai que recordar qu'al Conciertu foron 1.500_", mientres qu'un mediu de comunicación catalán decidió dedica-y un reportaxe.

EL CASU DEL "CHALANERU"  Per otru llau, según recuerda la Xunta, el 29 de mayu, depués de que cientos de neños de siete escueles de Mieres entonaren el cantar "Chalaneru" xunto a Chus Pedro pa celebrar el 25 aniversariu del conservatoriu municipal, l'informativu de la TPA afirmaba que los neños interpretaren "una canción más propia de la época de sus padres". Nun nos figuramos a TVE o a la BBC presentando un cantar que forma parte de la memoria colectivu del pueblu español o inglés coles mesmes palabres.

   Del mesmu mou, la XDLA lleva meses denunciando la falta de visibilidá que tien la industria cultural n'asturianu _música y lliteratura fundamentalmente_ nos informativos de la canal pública, mentes sí qu'hai sitiu pa falar de discos d'artistes madrilanos o d'esposiciones que se faen na capital d'España.

Fonte:  Europa Press.

Organicen una esposición colos cartelos de 25 años de Conciertu pola Oficialidá

La XDLA organiza una esposición colos cartelos de 25 años de Conciertu pola Oficialidá

   La selmana anterior a la del Conciertu pola Oficialidá, que va celebrase l'8 de xunu en Xixón, la Xunta pola Defensa de la Llingua Asturiana va entamar n'Uviéu, na Plaza'l Pescáu, una esposición onde van axuntar los cartelos y otros materiales de les 25 ediciones del Conciertu.

   La inauguración va ser el martes 4 de xunu, a les ocho de la tarde, y tán convidaes toles persones músiques de los cuasi 70 grupos que participaron nestos 25 años del Conciertu.

   Fonte: Asturnews.

L’Atenéu N’Alfoz y Compromisu critiquen la decisión del Niemeyer pa col Conciertu pola Oficialidá

Pablo R. Guardado
La negativa del Centru Niemeyer a acoyer el Conciertu pola Oficialidá d’esti añu provocó les crítiques de l’Atenéu n’Alfoz y de Compromisu por Asturies. Dambos coleutivos nun entienden esti actu discriminatoriu nuevu pa col nuesu idioma.

La entidá cívica qu’axunta a asturianistes d’Avilés, Castrillón, Corvera y Illas esixe a los responsables del Centru Niemeyer “respetu pola cultura asturiana”. “L’Atenéu N’Alfoz atopa nesta decisión una amuesa más de la actitú d’autoodiu promovida polos socesivos gobiernos d’Asturies, col oxetivu de dexar la nuesa llingua y cultura morrer nel escaezu”, señala nun comunicáu nel que reafita’l compromisu del coleutivu pola oficialidá y nel qu’amuesa la so solidaridá cola Xunta pola Defensa de la Llingua Asturiana (XDLA), organización qu’entama’l Conciertu pola Oficialidá xunto con Xunta Moza.

Pela so parte, la federación de partíos Compromisu por Asturies fala de “una discriminación nueva de la llingua asturiana”, más sangrante entá “al venir d’una entidá de financiamientu públicu”, con un costu de 40 millones d’euros, que se vende “como un espaciu pa la cultura” cuando, al mesmu tiempu, “refuga la presencia de la llingua asturiana nel so espaciu”. Pa Yolanda Huergo, vocera de la organización, negar el centru avilesín a la XDLA ye “la guinda del pastel, la culminación d’un proyeutu cultural qu’aveza a traenos dende la so nacencia noticies de sobrecoste, presupuestos inflaos y dineros perdíos de forma misteriosa; too ello paez que cola conocencia y permisividá del Gobiernu del PSOE, siempres más esmolecíu polo megalómanu que polo asturiano, y por conxurar les sos pantasmes y obsesiones en rellación cola cultura asturiana”.

Los nacionalistes ven nesta decisión “un exemplu nidiu de censura ideolóxica que s’axunta al nomáu paletismu la FSA, incapaces de valorar lo más cercano, inclinándose siempre por cualquier cosa que venga de fuera primero que polo fecho, falao o pensao n’Asturies”, lo que constitúi “otra amuesa del autoodiu qu’esiste ente los políticos asturianos”. Por último, reclamen la oficialidá de la llingua asturiana p’acabar “cola dicriminación de les y los asturianos pol fechu de selo y falar el so idioma”.

Fonte: Asturies.com

La XDLA denuncia que’l Centru Niemeyer nun permite la cellebración del XXV Conciertu pola Oficialidá

La Xunta pola Defensa de la Llingua Asturiana celebra dende va 25 años el Conciertu pola Oficialidá. Esti cuartu de sieglu conviértelu nún de los festivales musicales de más tradición y trayectoria de los que se faen n’Asturies. Dende la organización espliquen como “el valir simbólicu” que tien l’acontecimientu pa la música asturiana y la reivindicación llingüística-yos fíxo pensar nuna vuelta a la ciudá que lu vio echar a andar allá pel añu 1989; y ye que foi Avilés l’escenariu d’aquel primer conciertu de reivindicación de la oficialidá. Sicasí, el Niemeyer nun permitió celebralu na so esplanada, lo que dende la Xunta ven como “un vetu ridículu y prevaricador”.

La Xunta pensare nesti espaciu “qu’al paecer del so diseñador habíen tar abiertos a la participación del pueblu”. Pero denuncieen que “bien se sabe qu'una cosa ye la teoría y otra la visión más prosaica de los nuestros próceres y allegaos”.

“Cuando nos entrevistemos colos responsables directos de facer posible’l disfrute de la instalación, viemos bien rápido la ideoloxía real que’l poder tresmite a esti tipu de, como-yos dicen, "contenedores culturales": nun se busca la igualdá o la participación, sinón simplemente la fachada, l'apariencia o asonsañamientu brutu”, espliquen. En definitiva, punxeron lo que al Xunta califica de “sides pa nun dicir que nun queríen actos reivindicativos de la oficialidá: nun había feches, yera demasiao tarde, yá se reunió'l patronatu..., pero si-yos viniere la propuesta de cualquier estrella, reconocieron, yá lo iguaben pa que pudiere actuar en pocos díes”.

Pa la Xunta “al final, dalguna utilidá habíen tener estos mausoleos faraónicos de la castra política asturiana: son los que meyor van falar nel futuru de la so ideoloxía escarniada: en nome de la cultura y la participación xenérase un discursu y unes polítiques que tienen como resultáu un decoráu de cartón-piedra pa favorecer y, sobre too, xustificar l’apartheid y llavar l’auto-odiu”.

Fonte: Asturnews

XXIII Conciertu pola Oficialidá

El Conciertu pola Oficialidá va abrir les puertes a les 19:00 hores, el sábadu 16 d’abril, nes instalaciones de la Feria de Muestres de Xixón. Nesti recintu van instalase dos escenarios independientes que van dir alternando les actuaciones de los grupos, pa evitar tiempos muertos. Esti añu cúntase cola participación d’ocho bandes, que son estes: Blima, Llangres, La Bandina, Toli Morilla, Misiva, K-Nalón, La Col.lá Propinde y La Tarrancha.

El conciertu va presentase esti llunes 4 d'abril nuna rueda de prensa que na va cuntase cola presencia de dellos músicos que participen nesta XXIII edición del Conciertu y que yá confirmaron la presencia: Toli Morilla, Santi Caleya y Merce Santos de La Bandina.

El Conciertu pola Oficialidá ye una iniciativa de la Xunta pola Defensa de la Llingua Asturiana que yá cumple la XXIII edición. Ye un referente nidiu de la música fecha n’asturianu que cunta siempres cola participación solidaria de los grupos y artistes asturianos con más sonadía y que davezu val tamién como plataforma pa echar a andar propuestes nueves. L’ésitu de públicu de les ediciones pasaes y l’abondancia y calidá de los grupos valen pa facer rescamplar un panorama musical n’asturianu mui dinámicu onde tán presentes estilos musicales bien estremaos, dende la canción asturiana más tradicional a les nueves tendencies na música lletrónica,ska, rock, etc.

Fonte: Asturnews

XXII Conciertu pola Oficialidá

La XPDLLA y la so estaya de mocedá, Xunta Moza, presentaron el XXII Conciertu pola Oficialidá, esixendo que, dempués de ventidos años, seya la última convocatoria.
Xentiquina, La Curuxa, Toli Morilla, DRD, Skama la Rede, Los Berrones, Dixebra y Misiva, nesi orde, son los grupos que van xubise al escenariu de la Feria de Muestres de Xixón, nel Pabellón de les Naciones, esti sábadu 24 d’abril, a partir de les 19.00 hores. Va haber dos escenarios, colo que nun habrá espacios muertos ente grupu y grupu y cada formación tará nel escenariu alredor d’una hora.

Na presentación, na que participaron María Xosé Martínez de la Xunta, Xune Elipe de Dixebra, y Nel Sánchez de La Curuxa, calificaron el conciertu como ún de los actos más importantes del movimientu de reivindicación llingüística y una de les cites del panorama músical asturianu. “Un conciertu espectacular, al qu’acuden miles de persones y que pue facese gracies al trabayu desinteresáu de músicos y organizadores”, afirmó Mª Xosé Martínez.

Según Xune Elipe, líder de Dixebra, grupu que tocó en venti de les ventidos ediciones, paez mentira que ventidos años depués tengan que tar tocando nesti actu, “tamos fartos de tocar nesti conciertu, esperamos que l’añu que vien, cola reforma del Estatutu, cellebremos d’una vegada'l Conciertu de la Oficialidá”.

Pa Elipe, el conciertu amuesa que la nuesa llingua ye valida pa les necesidaes espresives de cualesquier música, “asina pue vese nos grupos, que van dende la música infantil, el pop, el rock, la tradicional o el cantar d’autor”.
El cantante de Dixebra dixo qu’anguaño, “a falta de polítiques reales de normalización”, los músicos tán supliendo esa falta de normalización de la llingua. En referencia a la oficialidá, Xune Elipe dixo que nun sabe que defeutu xenéticu tenemos los asturianos pa que nun valga equí lo que si val pa otros.

Dende la Xunta pola Defensa de la Llingua afirmaron que van siguir lluchando pa que’l Gobiernu asturianu sienta les voces que dende la comunidá internacional tán llamando a adoutar midíes urxentes pa invertir la situación de perda idiomática.
“Vamos diguir lluchando pa que los asturianofalantes puean usar la llingua más allá del ámbitu familiar, pa que l’asturianu seya una llingua normal en tolos niveles, pa que los falantes dexen de tar estigmatizaos y puean vivir na so llingua con dignidá y normalidá”, apuntó María Xosé Rodríguez.

Asturllétric
L’actu tamién valió pa presentar a los medios de comunicación el CD compilatoriu ‘Asturllétric’, que contíen doce cantares, el primeru d’ellos ye’l single de 2010 de Músicos pola Oficialidá.
‘Ramu pola oficialidá’ ye’l sestu cantar que compón esti coleutivu de músicos que vienen editando añalmente un cantar de sofitu a la reivindicación llingüística del asturianu.
Los otros doce cantares son reellaboraciones de dellos de los grupos más punteros del país que rellacionen música tradicional asturiana con música lletrónica.

Fonte: Asturies.com

Manifestación pola oficialidá del asturianu

Mañana tendrá llugar una movilización en defensa de la oficialidá, la tradicional manifestación del Día de les Lletres Asturianes. Baxo'l llema "Agora tenemos la pallabra", convócase a la ciudadanía a movilizase conseñando que "a les puertes d’una nueva reforma del Estatutu d’Autonomía d’Asturies ye necesario dar otru pasu y llograr la reconocencia del asturianu como llingua oficial". La manifestación va salir de la Estación del Norte d'Uviéu a les 19:00 hores.

Según la Xunta pola Defensa de la Llingua Asturiana, "el movimientu de reivindicación llingüística consiguió va trenta años acutar un día del calendariu nel que la llingua asturiana sería la protagonista. Un día nel que destacamos el valor insustituíble del nuesu padrimoniu llingüísticu y la so importancia central na construcción del futuru d’Asturies. Un día nel que reivindicamos los mesmos derechos llingüísticos que disfruten cuantayá’l restu ciudadanos del Estáu".
Pa la organización "en tou esti tiempu, venimos sufriendo una clas política acomodada nes instituciones, despreocupada, irresponsable y belixerante que vien faciendo tolo posible por anular cualesquier mínimu avance na dignificación y normalización de la llingua asturiana. Sicasí, la sociedá civil vien dando amueses de qu’hai una mayoría amplia y plural que siente apreciu por esti idioma. Hai n’Asturies un movimientu de reivindicación llingüística que, col compromisu y la pallabra, yá ye quien a consiguir avances a pesar de la oposición frontal de los que tienen el poder".

XXI Conciertu pola Oficialidá

Mañana, sábadu 25 d’abril, nel XXI Conciertu pola Oficialidá, rock y folk son los sones que van enllenar carpa onde la vindicación llingüística entama una folixa pol futuru de la llingua asturiana. Hai pocos festivales de música asturiana que tengan tantos años. El conciertu va llantase nel Campus d'Humanidaes de la Universidá d'Uviéu. Ellí van tar la carpa xigante y los dos escenarios de grandes dimensiones onde van xubir los grupos participantes nesti conciertu, qu'amuesen el so compromisu y sofitu pa cola vindicación d'oficialidá de la llingua asturiana. Los grupos d'esta XXI edición son de lo meyor que se ta faciendo de música n'asturianu. Pela parte folk van tar Tuenda, Los Gatos del Fornu, Felpeyu y La Bandina, y na parte rockera Skama la Rede, Dixebra y Skontra.

Per otru llau, el conciertu va ser el llugar de presentación del nuevu CD compilatoriu de la Xunta pola Defensa de la Llingua Asturiana. Trátase del nuevu discu de Músicos pola Oficialidá pa esti añu 2009 nomáu “Ye lo que nos pasa”.