'De cai' estrenóse en TPA con ésitu d'audiencia pesie a la escasa promoción y la competencia na nueche del martes

por Pablo R. Guardado

Esti martes TPA emitió'l primer programa de 'De cai', espaciu conducíu pola actriz María Cotiello col asturianu como llingua vehicular. La respuesta de l'audiencia foi perbona pese a la escasa promoción fecha pol ente públicu de comunicación y les estrenes n'otres canales: 27.000 espectadores de media y un 5,6 por cientu de cuota de pantalla.

Ello supón casi un puntu más que la media de TPA, asitiáu nun 4,7 por cientu, convirtiéndose nún de los programes más vistos del día, namái superáu polos informativos de la canal (10, 16 y 6 por cientu, de manera respeutiva) y los magazines vespertinos 'De hoy no pasa' (7,6 por cientu) y 'Conexión Asturias' (6 por cientu). Sicasí, 'De cai' foi'l programa d'entretenimientu que más espectadores axuntó delantre de la pantalla, al sumar una media de 27.000 ,y el tercer espaciu de la xornada per detrás de 'TPA Noticias 1' (34.000) y 'TPA Noticias 2' (23.000).

Ello respuende a que l'espaciu conducíu por Cotiello emitióse en 'prime time', compitiendo con dos estrenes de canales estatales como la temporada nueva de 'La que se avecina' (Tele 5), que sumó un 41,8 por cientu n'Asturies, y 'Pekín Express: La ruta de los elefantes' (La Sexta), amás del final del choque ente'l Barça-Atlético y el principio de la popular serie 'Allí abajo' (Antena 3). Tres el final del partíu de Lliga de Campeones, espaciu más vistu de la temporada a nivel estatal y con un 47,7 por cientu de share nel país, 'De cai' llegó a sumar picos de 41.000 espectadores.

Dobló al restu d'especios nocherniegos de TPA

En comparanza cola nueche en TPA, l'espaciu emitíu enantes, 'Mochileros', tuvo un 3,4 por cientu de cuota de pantalla y 15.000 espectadores, mentes que'l que vieno depués, 'Cuando cae la noche', tuvo un 3,3 por cientu y 14.000 espectadores. Estos datos amuesen la espectación que xeneró l'espaciu de Cotiello mentes la so emisión, casi duplicando los espectadores de los los espacios ente los que s'emitía.

Otru aspeutu a tener en cuenta ye la nula promoción fecha por TPA de la estrena del programa, al comenzar a anuncialo un día enantes pese a que Médula Producciones, empresa editora tamién de 'Presta Asgaya', 'Mochileros', 'De folixa en folixa' o 'Mayores sin reparos', llevaba meses trabayando nel proyeutu. En 'De cai', Cotiello percuerre dellos barrios emblemáticos d'Asturies, falando coles sos xentes y contando la so historia, siempre cola llinga asturiana como idioma vehicular

Tres dedicar el primer capítulu al barriu xixonés de Cimavilla, el martes será'l turnu del avilesín de Sabugo. La hora, les 22.10.

Primer espaciu d'entretenimientu n'asturianu nun añu

'De cai' destaca tamién por ser el primer espaciu d'entrentenimientu n'asturianu nuevu qu'emite en TPA dende 'Cantadera', otru programa con bonos índices d'audiencia, nun añu. Nesti tiempu namái estrenara n'ochobre la serie documental 'L'alzada', de Ramón Lluís Bande, tamién con una respuesta espectacular del públicu: 48.000 espectadores y 10,5 por cientu de cuota de pantalla nel so primer capítulu.

Fonte: Asturies.com

Los Bolechas n'asturianu supera l'audiencia media de la programación infantil

La serie qu'estrenó la TPA esta fin de selmana tuvo datos perriba de la media de la programación infantil en castellanu. El domingu el 7'2% de l'audiencia vio "La moñeca berrona".

Pel so llau, los dos capítulos que s'emitieron de sábadu algamaron un 2'6% (2'1% y 3'2%) de l'audiencia, mientres que los que se dieron de domingu tuvieron el 5'2% de media (7'2% y 3'6%).

Estos datos son especialmente bonos si los contestualizamos nel ámbitu de les audiencies de les programaciones pa neños y neñes. Peppa Pig, el productu más vistu d'ente les emisiones infantiles en castellanu, tien un 5'2% d'audiencia y Bob Esponja malapenes pasa del 3%. Pel so llau, Clan TV, la canal infantil temática de TVE, tien un 2'6% d'audiencia media.

El datu de Los Bolechas ye tamién significativu si tenemos en cuenta que l'anterior intentu de programación infantil na TPA, Presta Asgaya, que s'emitia en castellanu, tenía índices d'audiencia del 0'0%.

Asina, la primer esperiencia de programación en llingua asturiana na televisión autonómica, llegó a axuntar esti domingu nel primer capítulu a 3.000 persones.

Fonte: Asturies.com

Les emisiones n’asturianu en TPA del Día d’Asturies tuvieron bonos datos d’audiencia

por Pablo R. Guardado

Un 6,2 por cientu y un 6,1 por cientu de cuota de pantalla algamaron la redifusión de ‘El rostru impenetrable’ y la emisión de ‘Greystoke, la lleenda de Tarzán’, de manera respeutiva, en TPA’l 8 de setiembre, datos superiores a la media de la canal. La XDLA recuerda la necesidá de cuidar la calidá llingüística de los productos.

La yá histórica película de Marlon Brando doblada por Gonzali Producciones volvió a ser un ésitu d’audiencia na so tercer emisión tres la so estrena les Navidaes pasaes pesie a competir nesta ocasión cola final d’etapa de La Vuelta en La Farrapona. Mentes, la producción sobre Tarzán tornada al asturianu por Vacaloria Producciones –mesma empresa responsable del doblaxe de ‘Os Bolechas– rexistró tamién unos bonos datos pesie a coincidir cola estrena de temporada de productos bien conocíos de televisiones de calter estatal, como ‘El chiringuito de Pepe’ (Telecinco), ‘Isabel’ (TVE) o ‘Top Chef’ (Antena 3). Según los datos fechos públicos pola Xunta pola Defensa de la Llingua Asturiana (XDLA), dambes películes superaron la media de la canal, “que ye del 6 por cientu”, y a otros productos de ficción de TPA n’asturianu emitíos na fin de selmana, que tuvieron una media del 3,8 por cientu. “Asina, queda demostrao a les clares la demanda social y l’ésitu d’audiencia que supón la emisión de producción ayena doblada al asturianu”, apunten dende’l coleutivu cívicu, que recuerda que “independientemente de los datos, RTPA tien la obligación llegal d’emitir programación n’asturianu y ser un axente activu nel procesu de normalización del nuestru idioma. Amás, nun se pue dexar de llau la importancia económica que tienen estos productos al convertise nun revulsivu pal texíu audiovisual del país, ún de los motivos polos que se punxo en marcha RTPA”.

Sicasí, la XDLA quier poner la voz d’alarma nun asuntu bien importante, como ye’l cuidáu de la calidá llingüística: “Depués de ver el doblaxe de les dos películes y conocida la noticia d'un proyeutu de programa infantil dobláu al asturianu, la XDLA quier volver recordar la necesidá d'un mayor control sobre la calidá llingüística de los productos. Ye imprescindible que les traducciones tean en manes de persones o equipos con una esperiencia y conocimientu contrastaos. El modelu llingüísticu tien que ser natural y non rebuscáu, pero tamién los actores tienen que saber pronunciar bien lo que tán dramatizando. Pa eso ye fundamental que la supervisión del guión, amás de ser efectiva nel papel, siga tamién na sala de doblaxe, controlando que nun se dean por bones tomes onde haiga errores na pronunciación o onde s'escapen castellanismos. Estos primeros pasos del doblaxe teníen que disponer non solo d'un equipu filolóxicu asesor sinón d'abondos medios económicos pa que'l productu final tenga toles garantíes”.

30 por cientu del total de la programación

La XDLA tamién quier felicitar a RTPA pola iniciativa d’emitir más de cuatro hores de ficción en llingua asturiana, más nuna xornada tan marcada como’l Día d’Asturies, lo que supunxo un 30 por cientu del total de la programación de la TPA’l 8 de setiembre, “dalgo ensin precedentes na historia” de la canal, si sumamos otros espacios nel nuesu idioma. D’igual forma, recuerda a la direición del ente públicu de comunicación que “esti 8 de setiembre demostró qu’una cadena comprometida col idioma y la cultura d’esti país ye posible y, amás, tien ésitu, polo que ye hora de que dexen de llau los sos complexos d’inferioridá y se comprometan con una televisión que de verdá puea llamase asturiana”.

Fonte: Asturies.com

El Rostru Impenetrable algama les 50.000 reproducciones na TPA

Ye con muncho'l programa más vistu del serviciu online "Tpa a la carta" El doblaxe d'El Rostru Impenetrable (ONLINE ) ye’l programa más vistu de ‘TPA a la carta‘, teniendo superao la cifra record de 50.000 reproducciones, mui lloñe de les poco más de quince mil reproducciones que tien el programa más descargáu d'Asturianos en el mundo", uno de los más vistos na web de tola programación de la canal . Ye tamién el títulu que más rápido foi algamando esa posición cimera nel siguimientu per internet. La noticia afita entá más l'encamientu fechu dende la sociedá civil pa llograr una parrilla con más presencia del asturianu pol granible resultáu que s'algama. El Rostru Impenetrable, con un 5,1%, superó l'audiencia media de la cadena del 27 d'avientu (4,9%), día de la so emisión, y del mes (4,7%). Los espacios programaos con anterioridá tuvieron per baxo de la media de TPA -'Date una vuelta' 3,9%, y 'Superasturianos' 4,5%-. Per otru llau, la película de la tarde en castellanu, Green Lantern (2011), tuvo tamién per baxo d'esta media, al quedar nun 4,4%. La emisión d'quella, al traviés del hashtag #ElRostruImpenetrable, foi ún de los espacios más comentaos na nueche del vienres 27 d'avientu ente los usuarios de Twitter n'Asturies, xenerando más d'un 80% de comentarios positivos. La Televisión del Principáu d’Asturies entamó a ufiertar online'l doblaxe al asturianu El rostru impenetrable realizáu por Gonzali Producciones el 10 de xineru d'esti añu y dende esi día algamó les 50000 reproducciones nun periodu de namái que cuatro meses.t Dirixíu y producíu por Illán Gonzali, cuenta con un repartu de más de venti actores de doblaxe, ente ellos Carlos Novoa (Marlon Brando), José Antonio Lobato (Karl Malden), Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán. L’Academia de la Llingua Asturiana fizo l’asesoramientu llingüísticu. El rostru impenetrable (One-Eyed Jacks, 1961) tien una duración de 135 minutos y ta interpretáu por Marlon Brando, Karl Malden, Pina Pellicer, Katy Jurado, Ben Johnson, Slim Pickens,Larry Duran, Sam Gilman, Timothy Carey, Miriam Colon, Elisha Cook Jr., Rodolfo Acosta y Hank Worden. Foi la única película dirixida por Marlon Brando. En 1961 tuvo nominada al Oscar na categoría de Meyor Fotografía (collor) y llogró la Concha d’Oro a la meyor película nel Festival de San Sebastián. Fonte: Asturnews

Másima audiencia nos programes n'asturianu na RTPA

La programación en llingua asturiana púnxose al frente esti sábadu de l'audiencia de la televisión pública asturiana con unos datos enxamás vistos. El programa que llideró la xornada del sábadu foi "Nós", dirixíu y presentáu pol direutor d'Asturnews, Próspero Morán, qu'algamó un share del 21,1. Camín de Cantares col 20,9 y TPA Noticies col 19,7 siguieron na clasificación de l'audiencia de la xornada al microespaciu en llingua asturiana.

L'espaciu de "Nós"que llideró esti día l'audiencia de la TPA tuvo dedicáu al conceyu de Piloña y nelli participaron l'alcalde del conceyu y la responsable de la Oficina de Política Llingüística de la Mancomunidá.

Fonte: Asturnews