XXXV Selmana del Folclore Astur de Siero

Cartelu de la XXXV Selmana Esti llunes entamaba en La Pola Siero la XXXV Selmana del Folclore Astur, entamada un añu más pol Grupu FIolclóricu y d'Investigación "El Ventolín" y qu'esti añu tien un tema bien importante como protagonista "La Llingua". Por mor d'ello la presentación oficial dirixíala esti día Ana Cano González, presidenta de l'Academia de la Llingua Asturiana interviniendo tamién les autoridaes llocales, nun actu que tuvo llugar a les 8 la tarde na Sala de Cámara del Auditoriu. Los Actos de la Selmana van celebrase toos nel Auditoriu de La Pola Siero del 21 al 26 d'Abril y ente les actividaes programaes, podrán visitase esposiciones de pintures y escultures, una esposición etnográfica y otra esposición de coleiciones filatéliques. Tamién va haber Cuentacuentos n'asturianu, Teatru Costumista a cargu del Grupu de teatru Carbayín y una Muestra audiovisual n'asturianu de Pablo. A Quiroga Prendes. El puntu final a la Selmana pondrálu'l XXXV Festival Folclóricu Internacional. Esti martes 22 tuvo llugar pela mañana'l cuenta cuentos d'Emilio'l del Nido na Plaza l'Ayuntamientu y pa mañana miércoles ta prevista una representación de teatru costumbrista asturianu con la presentación de "El Candidatu" al cargu del Grupu de Teatru de Carbayín. Pal xueves ta prevista pela tarde una muestra del audiovisual asturianu y pal vienres pela mañana una subasta d'obres d'arte, antes de qu'aporte'l pieslle final cola celebración del XXXV Festival Folclóricu Internacional qu'esti añu va cuntar cola participación de Pauliteiros de Miranda Do L Douro (Portugal), E.M.A. Los Yerbatos (Bimenes), los Alumnos de la E.M.T. de El Ventolín y l'estrenu de “TRADICIONANDO”, un espectáculu de baile y música tradicional a cargu de los grupos GFI El Ventolín (La Pola Siero), GBT de Fitoria (Uviéu), B.G. Xiranda (Cualloto) y el grupu folk Degaña’s. Fonte: Asturnews

N’Ast pide la dimisión de Mauricio Bogomak

Énte esti nueu casu de represión llingüística, esta vegada nel Conceyu Sieru L'Asociación N’Ast vieno acabante pidir esta fin de selmana la dimisión de Mauricio Bogomak, talo y comu denunció apocayá la Xunta pola Defensa de la Llingua Asturiana (XDLA), por prohibir esti home l’usu del asturianu na camiseta oficial de la XXV Media Maratón de Sieru, al refugar el diseñu orixinal nel que trayía “Campeonatu d’Asturies”, pal qu’esta preba deportiva ye puntuable. De la mesma manera que la XDLA, en N’AST camienten que’l casu "ye más grave entá si tenemos en cuenta que de la so conceyalía depende’l Serviciu de Política Llingüística d’esti conceyu: nun ye normal que tea al frente de la mesma una persona que refuga abiertamente l’asturianu". Poro, N’AST "nun sólo quier sumase a la denuncia d’esti casu, sinón que quier pidir públicamente la dimisión de Mauricio Bogomak de los sos cargos nel Ayuntamientu Sieru o que se lleve a cabu la so destitución por parte del Alcalde’l Conceyu". Fonte: Asturnews

Conceyu Abiertu por Noreña denuncia que nun se cumple la toponimia oficial

Otra vuelta, problemes col cumplimientu de la toponimia oficial n'Asturies. Énte la instalación de señalización toponímica nel enllaz de Noreña cola Autovía Minera Conceyu Abiertu por Siero y Conceyu Abiertu por Noreña denuncien que “nun se respeta la toponimia oficial, dándose'l casu que la oficial “Ferrera” se convierte en “La Ferrera”, apaeciendo amás “La Ferrera de Abajo” y “La Ferrera de Arriba”, en llugar de les denominaciones oficiales “Ferrera de Baxo” y “Ferrera de Riba””. Los miemros de CA recuerden que la toponimia tradicional ye la oficial del Conceyu de Siero dende 2009, cuando s’espublizaó nel BOPA’l correspondiente decretu.
Pa CA ye “surrealista” que más de dos años más tarde nun se señalice respetando la toponimia oficial, “llegando al esperpentu d'inventar topónimos como “La Ferrera”, espliquen. Recuerden que nel casu d’esti topónimu, parte “pertenez al Conceyu de Noreña, siendo oficial el topónimu dende 2007”, cuando s’espublizó’l decretu de toponimia del conceyu condal.
Conceyu Abiertu por Noreña, que cunta con representación nel Plenu Municipal va solicitar que'l Conceyu de Noreña tome la iniciativa y pida que se respete, como sedría lóxico, la toponimia oficial nes instancies que correspuendan y que contacte col Conceyu de Siero de cara a faer causa común. Fadrálo yá en forma de ruegu nel Plenu que se celebra mañana, xueves 26.
Amás d'esto, recuerden que “na señalización del enllaz esisten erros más graves si cabe y los cartelos indicativos nun recueyen la forma oficial de la capital del Conceyu de Siero, “La Pola Siero”, señalizándose erroneamente “Pola de Siero”.
Conceyu Abiertu califica de “chambonada” la señalización y considera que los Conceyos tienen que tomar cartes nel asuntu de cara a que l'enllaz recueya la señalización correcta. Recuerden que “quiciabes si los responsables municipales tuvieren sollertes al desenvolvimientu de les obres y tuvieren comenenciudos na bona señalización de les llocalidaes, agora nun taríamos énte esta aberración, qu'amás xeneró indignación ente los vecinos noreñenses y sierenses de Ferrera”.

Fonte: asturnews