La placa de recuerdu a Mánfer de la Llera en Sama, desapaecida

Vicente Álvarez Areces y María Esther Díaz, presidente d'Asturies y alcaldesa de Llangréu destapen la placa en mayu del 2011 na cai La Llera

El PAS reclama la so reposición

La placa instalóse en mayu del 2011 na cai La Llera coincidiendo cola Selmana de les Lletres Asturianes, qu'esi añu taba dedicada a la figura del escritor nacíu en Ciañu. Vicente Álvarez Areces y María Esther Díaz, presidente d'Asturies y alcaldesa de Llangréu, de manera respeutiva, naquel tiempu, encargáronse de destapar dicha placa en recuerdu a Manuel d’Andrés Fernández 'Mánfer de la Llera' (Ciañu, 1918; Xixón, 2005).

Güei, cuatro años depués, ésta ta desapaecía, según informa'l Partíu Asturianista (PAS). La formación reclama la so reposición, "máxime nestos díes nos que na su tierra d'adopción, en Xixón, homenaxeáronlu" cola instalación d'un monolitu de recuerdu nel parque que lleva'l so nome. "Paez una afrenta pública que, por contra, a un llangreanu nacíu en Ciañu se-y quite'l reconocimientu de los sos vecinos y de la so memoria", afirma Xosé Avelino Devesa, secretariu del PAS en Llangréu.                                                                  Fonte:asturies.com

La reposición d'"El Rostru Impenetrable" algamó'l 7% del "share"

Superó asina'l bon datu de la so primer emisión en TPA. El 10 de mayu pasáu emitióse otra vegada en TPA la película El rostru impenetrable (One-Eyed Jacks), doblada al asturianu por Gonzali Producciones. Esta primera reposición llegó al 7% de l'audiencia, con una xubida de cuasi dos puntos (1,9) dende la emisión anterior, el 27 d’avientu de 2013, convirtiéndose nún de los espacios más vistos del día na cadena. El llargumetraxe, según los datos de Kantar Media, tuvo perriba de la media del día (4,6%) y del mes (6,5%). El rostru impenetrable ye un western de 1961 interpretáu por Marlon Brando, Karl Malden, Pina Pellicer, Katy Jurado, Ben Johnson, Slim Pickens,Larry Duran, Sam Gilman, Timothy Carey, Miriam Colon, Elisha Cook Jr., Rodolfo Acosta y Hank Worden. Foi la única película dirixida por Marlon Brando. En 1961 tuvo nominada al Oscar na categoría de Meyor Fotografía (collor) y llogró la Concha d’Oru a la meyor película nel Festival de San Sebastián. El doblaxe ta dirixíu por Illán Gonzali, con un repartu de más de venti dobladores, ente ellos Carlos Novoa, José Antonio Lobato, Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán. L’Academia de la Llingua Asturiana foi responsable del asesoramientu llingüísticu. Fonte: Infoasturies