Decenes de coches participaron na 'Caravana pola Oficialidá' de Gozón y Carreño

2ª Caravana pola Oficialidá

Más de 70 vehículos partieron del Cabu Peñes hacia Candás na mañana del sábadu.

Nun ambiente festivu los participantes percorrieron los conceyos de Gozón y Carreño pa "visibilizar y denunciar la situación de marxinación, acosu y falta de derechos que sufre la llingua asturiana y les persones que quieren usala", esplicó la Xunta pola Defensa de la Llingua Asturiana (XDLA) nel comunicáu lleíu nesta segunda etapa de la 'Caravana pola Oficialidá'. Asina, pasaes les 11.30 hores una filera de más de 70 coches, que foi creciendo mientres la ruta prevista, salió del Faru de Peñes pa cruciar depués Lluanco y otres poblaciones de los dos conceyos y finar en Candás.

Tres la etapa de Bimenes y parte del valle del Nalón y de la de Gozón y Carreño, van entamase otros percorríos informativos próximamente sobre la situación del idioma cola fin de visibilizala y esixir "lo necesario, que ye'l reconocimientu de los derechos fundamentales de la ciudadanía, que ye la declaración del asturianu como llingua oficial".
Fonte: asturies.com

La Lliga Celta entama'l domingu una visita al castru Punta'l Castiellu

Va tar guiada por Alberto Álvarez Peña.

Esta actividá de la Lliga Celta d'Asturies va celebrase mañana, con comienzu a les 11 hores nel faru del Cabu Peñes. Los presentes dirixiránse al castru Punta'l Castiellu, asentáu en Podes, onde l'etnólogu de la Fundación Belenos va esplicar tolos destalles sobre estos restos arqueolóxicos.

La visita ye de baldre y nun fai inscripción previa. La hora estimada pa finar el percorríu ye les 13 hores. Darréu va celebrase una xinta abierta a tol mundu que se pagará a escote. Fonte: asturies.com

La XDLA entama cursos d’asturianu nel Cabu Peñes

Dende’l 13 d’ochobre, Lluancu va acoyer un nuevu cursu d’aniciu de Llingua Asturiana entamáu pola Xunta pola Defensa de la Llingua Asturiana (XDLA), entidá acreditada pola Conseyería d’Educación pa la formación permanente del profesoráu.

Esti cursu ta empobináu a tol mundu y tien una duración de 30 hores, con horariu de 19 a 20,30 hores los llunes y los martes. Va desenvolvese na Casa La Escribana, na Cai Suárez Inclán 5, de Lluanco. La matrícula ye de 20 euros ya inclúi tol material necesariu.

Pal mes de xineru del 2016, y en terminando’l primeru, va dase otru avanzáu en Candás del qu’informaráse nel momentu afayadizu. Pa más información, contautos, señes y demás, consultái’l cartelu informativu.

Fonte: Asturnews

El muséu del Centru d'Esperimentación Pesquera de Xixón, espón per primera vegada una tortuga llaúd

Tortuga laúd (Dermochelys coriacea) nel Muséu-acuariu del Centru d'Esperimentación Pesquera de Xixón

   El muséu-acuariu del Centru d'Esperimentación Pesquera de Xixón espón dende esti vienres una tortuga llaúd (Dermochelys coriacea). Trátase d'un machu adultu de 350 quilos y 2,20 metros de llargor que quedó atrapáu nunos apareyos de pesca cerca del Cabu Peñes el pasáu 23 d'ochobre y que foi disecáu pol so induldable valor científicu

.

   La tortuga laúd ye bien pocu conocida n'Asturies y l'esposición d'esti exemplar nel muséu va dexar esplicar meyor la bioloxía d'esta especie al públicu y a los escolares.

   Pasa agora a ser una de les pieces más importantes dientro de la esposición qu'acueye'l muséu-acuariu, xuntu con otres que yá tán instalaes como l'esturión, el calamar xigante o'l tarpón. Toes estes especies  dexen faer un llabor de divulgación y d'educación, ente los  grupos  d'escolares de Primaria y Secundaria de los distintos centros educativos d'Asturies

   El pesqueru Maresco que prindó la tortuga, el pasáu mes d'ochobre, apurrir al Centru d'Esperimentación Pesquera que decidió esponelo dáu'l so induldable valor científicu nel muséu-acuariu, que ta asitiáu na planta baxa de la see de la Direición Xeneral de Pesca Marítima del Principáu y depende de la Conseyería de Agroganadería y Recursos Autóctonos, col propósitu de que dexe dar  a conocer la riqueza faunística del mar Cantábricu.    Fonte: Europapress.es

Iniciativa pol Asturianu felicita al CRA Cabu Peñes por camudar la so denomación al asturianu

El Colexu Rural Agrupáu del Cabu Peñes, en Gozón, aprobó va dellos meses el cambiu pa denomase "Cabu Peñes" en llugar del castellanizáu "Cabo Peñas". Iniciativa pol Asturianu unvió una felicitación al centru aprovechando pa convidalos a siguir dando pasos na visibilidá del asturianu nel centru, talos como siguir faciendo medrar la matriculación na asignatura, usar l'asturianu na páxina web y na rotulación del centru, etc. Pa la organización "esti ye un nuevu exemplu" que se suma a otros como los colexos xixoneses de Montiana o Xove y que surdió gracies a la propuesta d'un profesor miembru d'Iniciativa pol Asturianu y que pudo llevase alantre gracies al sofitu de tola comunidá educativa.

El procesu surdió nel mes d'ochobre de 2012, cuando Fernando Padilla, profesor del centru y miembru d'Iniciativa pol Asturianu propunxo al Claustru camudar el nome de castellán a asturianu y esti aprobólo por unanimidá. Dempués l'alcuerdu del claustru pasóse al Conseyu Escolar y esti tamién lu aprobó. Con estos alcuerdos solicitóse la conformidá al Conceyu de Gozón, que la dio con tiempu y forma. Con too esto fízose la solicitú al la Conseyería d'Educación, que nuna resolución posterior aprobó'l cambiu de nome.

Iniciativa pol Asturiana aprovechó p'animar a otros centros educativos a dar pasos nesti camín hacia un usu normal del asturianu, "que dea a los alumnos y a tola comunidá educativa una visión del asturianu como una llingua que nun s'usa namás nes actividaes de l'asignatura de llingua asturiana, sinón en tola ámbitos de l'actividá escolar, como una llingua d'usu normal", espliquen nel comunicáu.

Fonte: Asturnews

El Cabu Peñes entama una campaña n'asturianu por xuguetes non sexistes

La Mancomunidá d’El Cabu Peñes, al traviés del so Serviciu de Normalización Llingüística, ta repartiendo estos díes d’avientu una campaña (que se compón de folletos y pegatines n'asturianu) que, col eslogan Na igualdá nun quedes fuera xuegu. Porque tamién xugando deprendemos a vivir, quier facer valorar los xuegos y xuguetes que desarrollen actitúes y comportamientos de cooperación, el respetu a les diferencies y les rellaciones d’igualdá. Inténtase con eso ayudar a desaniciar la visión de xuegos y xuguetes pa neños, y xuegos y xuguetes pa neñes, amás de concienciar y implicar a la xente na importancia del xuegu como principal instrumentu d’aprendimientu y socialización.Los organizadores destaquen qu'«el llabor de les families y les persones adultes ye escoyer xuguetes non sexistes y non violentos qu’entretengan y qu’eduquen, que permitan un desarrollu integral de neños y neñes, potenciando les sos cualidaes individuales y aquelles otres que tenemos que considerar importantes, como la creatividá, la imaxinación, la iniciativa y el cuidáu de les demás persones. Esti sería l'oxetivu principal d’esta campaña».

Fonte: les noticies

III Certame de Curtios n'asturianu del Cabu Peñes

El III Certame de Curtios en Llingua Asturiana de la Mancomunidá d’El Cabu Peñes ta acabante abrir el plazu de presentación pa tolos cineastes que quieran presentar les sos obres a concursu.

Los interesaos han remitir los trabayos a les oficines de la Mancomunidá (c/ Braulio Busto, 2, 2.ª, 33430 Candás) en mano, por persona interpuesta o al traviés d’un corréu certificáu con acuse de recibu. Los trabayos han presentase nun sobre o carpeta onde figuren el títulu del filme y el seudónimu del autor. Dientro, los interesaos han axuntar otru sobre ciarráu colos datos reales del responsable del filme (nome, apellíos, direición, teléfonu y seudónimu) y títulu del trabayu. El plazu queda abiertu fasta’l 11 d’avientu a les dos de la tarde. Pue ampliase esta información consultando al Serviciu de Normalización Llingüística de la Mancomunidá (teléfonos 985 87 24 06 –de martes a xueves, de 10 a 14 hores– y 985 88 35 32 –llunes, miércoles y vienres, nel mesmu horariu–) o escribiendo a la direición de corréu lletrónicu llingua@mcabop.com.

(Nota: güei ye un Día de la Nación Asturiana más ensin la oficialidá de la nuesa llingua entá, "en pelligru" según la UNESCO.)