9/3/16

Santiago García Granda compromete normalizar l’asturianu na Universidá d'Uviéu


Santiago García Granda compromete normalizar l’asturianu na Universidá
García Granda, que fai alcordanza de que la llingua asturiana ye una de les “cuestiones d’imaxe y valir científicu que dacuando s’escaecen”, dexa perafitao que la so candidatura “va querer que vuelvan les illusiones y los impulsos que motivaron a esta Universidá y va querer que se faiga con una visión internacional, xeneralizando l’usu del idioma inglés y potenciando l’usu d’otros idiomas estratéxicos, pero tamién averada a lo propio“. Nesi sen, considera necesario anovar, “pasu ente pasu, el nuesu facer y la imaxe de nueso, pero siempres dende’l respetu a la tradición centenaria de la Universidá d’Uviéu” y diz que “esta candidatura tien propuesto crear, con personal propio y motivao, una Oficina de Normalización Llingüística na Universidá, pa promover l’usu del asturianu y resolver duldes n’actuaciones concretes”.
Na carta unviada esti día a los medios de comunicación diz “poer algamar eses illusiones, esos impulsos, esa motivación pernecesaria” como futuru Rector de la Universidá d’Uviéu con una estratexa universitaria a 10 años. Y nesa estratexa, “l’asturianu tien que xugar un papel. Xustamente’l papel que la Llei-y reserva y que nesti momentu nun apaez desenvueltu como debiere”.
La candidatura de Santiago garcía Granda plantega que la Universidá “tien d’amosar la so imaxe corporativa en llingua asturiana con total normalidá y esparder l’usu de la llingua na cartelería o la señalética. Ye lo que dicta la Llei d’Usu en vigor y la Universidá tien qu’acatalo y amosalo con arguyu. Y darréu d’ello ufiertar qu’un porcentaxe significativu de convocatories, solicitúes y formularios puean facese n’asturianu al tiempu qu’en castellán“.
Poro, esto nun ye abondo. Y por eso Santiago García Granda diz que “esta candidatura tien propuesto crear, con personal propio y motivao, una Oficina de Normalización Llingüística na Universidá, pa promover l’usu del asturianu y resolver duldes n’actuaciones concretes”. Y amás, plantega una bona riestra de midíes empobinaes a “proponer el conocimientu activu del asturianu facilitando al alumnáu y al profesoráu planes formativos internos que permitan, nel so casu, actividaes docentes na llingua d’Asturies”.
Y la formación y la investigación académica en llingua asturiana tampoco nun van tar escaecíes del programa d’esta candidatura porque nelli va contemplase la meyora del plan d’estudios del actual “minor” hasta convertilos nuna mención, “estudiando la posibilidá d’afondar na so entidá académica siempre col másimu consensu de la comunidá universitaria. Y va afitase una normativa eficaz que garantice, dende la d’anguañu, la defensa de Tesis Doctorales, TFG y TFM en llingua asturiana”.
Les propuestes de la candidatura de Santiago García Granda dexen bien altu el nivel de compromisu pa cola llingua asturiana na Universidá porque amás de les munches propuestes recoyíes toes elles contémplense “ensin escaecer el diseñu de planes específicos pa promover y facilitar la investigación de la llingua asturiana, demandando al Ministeriu la especialidá docente pal profesoráu d’Educación Primaria y Secundaria”.
La candidatura de García Granda contempla tamién que la Universidá edite en llingua asturiana y collabore a dignificar el teatru asturianu y n’asturianu, “impulsando al tiempu la lliteratura y el cine na nuesa llingua y fomentando la música asturiana con recitales n’asturianu de los más estremaos estilos”.
Toes estes idees, y otres munches, habrán debatise na comunidá universitaria a lo llargo del periodu de campaña electoral, pero Santiago García Granda quier dexar claro que “ye’l nuesu determín que la llingua y la cultura asturiano nun s’escaezan d’un debate onde tien de vese en comuña progresu ya inclusión, afitando’l calter de la Universidá d’Uviéu como institución científica y pública al serviciu del progresu d’Asturies, garantizando’l compromisu de la Universidá cola nuesa comunidá dende un puntu de vista social, cultural, económicu y llingüísticu, desendolcando la vertiente social de la Universidá d’Uviéu”.
Fonte: Asturnews

6 comentarios:

  1. Más info:

    http://asturies.com/noticies/garcia-granda-propon-otorgar-mayor-entida-academica

    http://asturies.com/noticies/son-plantegamientos-serios-apunta-gonzalez-riano

    ResponderEliminar
  2. Señor García-Granda, usté que ye candidatu: García, según les normes vixentes de la RAE, tien tilde na "í"... ¿o non? vamos bien (mal)

    ResponderEliminar
  3. Simplex, pensava que el que t'importaria són les normes vigents a l'ALLA. Però bé, tothom té les seves preferències.

    ResponderEliminar
  4. Esiste siempres una prioridá d'obxetivos pa caún.

    ResponderEliminar
  5. Paez que va pa rector de la Universidá d'Uviéu dientro de bien pocu, hai qu'oyelo.

    ResponderEliminar

Los comentarios tán pendientes de moderación. Espublizaránse lo primero dable.