25/9/15

La Nueche Blanca d’Uviéu va ser el 3 d’ochobre


  Munches más actividades, una programación infantil y actividades empobinaes a persones con discapacidá visual y auditiva, van ser delles novedaes de la tercer Nueche Blanca d’Uviéu. El presidente de la Fundación Municipal de Cultura y conceyal de Cultura, Roberto Sánchez Ramos, presentó esti día la tercer edición de La Nueche Blanca, que se va celebrar el próximu sábadu 3 d’ochobre, y fízolo plantegando la idega d’ampliala a ente 4 y 6 nueches la próxima edición.
  La propuesta del conceyal pasa por desenvolver estes nueches “en blancu” a partir de la celebración de San Xuan “pa evitar que la climatoloxía perxudique a la participación”. Coles mesmes, apostó por sumar al proyeutu al sector hosteleru uvieín con menúes específicos inspiraos nel arte y a extender les actividaes al restu del conceyu.
  Les principales novedaes d’esta edición son les actividaes infantiles, la participación d’asociaciones vecinales y centros sociales y el diseñu d’una actividá empobinada a les persones con discapacidá visual y auditiva.
  No que finca a les artes plástiques, once galerías van sumase con proyeutos específicos pa esta nueche que van dende videoinstalaciones a performances. Nos baxos del Campoamor l’artista Toño Velasco va impartir el taller esperimental “Reaprendiendo a dibuxar…como los neños”.
  Amás, l’Auditoriu Príncipe Felipe d’Uviéu va acoyer la proyeición de la primer película de Orson Wells, “Too Much Johnson Live” acompañada de la interpretación en direutu de la so banda sonora per parte del so compositor ‘Remate’.
  Tamién va haber moda, con los nueve diseñadores mozos que van presentar les sos propuestes nuna pasarela instalada en Palacio Valdés.
  Y pa los neños,  na antigua see de la Escuela d’Hostelería, nel Campu San Francisco, van desenvolver a partir de los seis de la tarde funciones de títeres, cuentacuentos y talleres de marionetes. Amás van poder participar nel maratón musical ‘Un día redondu pa una Nueche Blanca’, entamáu pola Asociación Vecinal Uviéu Redondu,  dende les 13 hasta les 22 hores na Plaza del Paragües.
  La ufierta musical tamién inclúi conciertos de pop nel Teatru Filarmónica y l’actuación de los coros de seis centros sociales n’otros tantos centros sociales interpretando habaneres y cantares populares.
  El Muséu de Belles Artes va entamar una velada pictórica-musical  ente que l’Arqueolóxicu amás d’apostar pola música, va esponer obres audiovisuales.
  Visites polos principales escenarios de la Revolución d’Ochobre de 1934; la mesa redonda ‘Muyeres na lliteratura’, na que van participar cuatro escritores asturianes; teatru, al cargu de Taller ,3 con pases cada 20 minutos nel Campoamor; les ‘tapes blanques’ del Bulevar de la Sidra y el tren artísticu ‘La Xata tren fest’ que va viaxar de Bilbao a Uviéu con más de 50 artistas, son delles otees de les actividaes.
  Tamién destaca otra vuelta que la comunidá de Monxes Benedictines del Monesteriu de San Pelayo volverán abrir les sos puertes pa que’l públicu pue escuchar los sos cantares de víspores y como novedá anguaño, van realizase visites al claustru, el coru y l’ilesia.                                                                     Fonte: asturnews.com

7 comentarios:

  1. Les Nuechis Blanques ye un inventu bien estendíu de lluz y color, pero nada interesante.

    ResponderEliminar
  2. Sí, ye un inventu bien comercial, namás.

    ResponderEliminar
  3. Ye un cuentu modernu bien populista y bien pocu cultural.

    ResponderEliminar
  4. Ye una fiesta de tipo económicu, sin más oxetivos que los crematísticos: panem et circenses pero en barato.

    ResponderEliminar
  5. Ye un inventu políticu bien baratu de los conceyos -Xixón, Uviéu- pa tener ocupada y tranquila a la xente inquieta gastando pocu y de camín allixerando el bolsu a los incautos que van velo. Cenciellamente ye un camelo de poca fortuna.

    ResponderEliminar
  6. La Nueche Blanca i el cartell anuncia "Noche Blanca"? Suposo que deu ser perquè tothom ho entengui, clar.

    ResponderEliminar
  7. Hai muncho agoreru sueltu...

    ResponderEliminar

Los comentarios tán pendientes de moderación. Espublizaránse lo primero dable.