Dios y el cuchu fain munchu, pero más el cuchu

Xicu Xabel Monteserín Rodríguez (Xixón) Ye verdá, queda mui guapo dar voces en castañéu, falando de lo muncho que nos pruye la llingua asturiana, y dicir al alto la lleva que l’asturianu ye un elementu cultural perimportante. Falar ye gratis, tovía, y los nuesos repúblicos y representantes políticos en xeneral falen pa que sobre; pero cumplir, lo que se diz cumplir, eso ya ye fariña d’otru costal. Tras un nuevo Día de les Lletres Asturianes a esos políticos hai que-yos dar un suspensu xeneral: siguimos ensin especialidad d’asturianu y con una enseñanza de la llingua en precario, tola toponimia fecha una llaceria, con una llei d’usu del asturianu probeyata y ruina qu’arriendes nun la cumplen nin los propios responsables políticos y culturales de turnu, unos medios de comunicación públicos que cásique sólo lo empleguen pa les chancies ruralistes más fates. Xurídica y llegalmente l’asturianu ta na marxinalidá, ensin un reconocimientu acordies nel Estatatu d’Autonomía. Ye la única llingua estatal nun reconocida oficialmente; asina los asturianos nun somos titulares de derechos llingüísticos y culturales, talo que navarros, gallegos, catalanes, baleares, vascos o valencianos, y como ximuestra los nuesos escritores nun pueden presentase a premios lliterarios estatales o perdemos cientos de miles de euros de los Presupuestos del Estáu al nun ser llingua oficial. Poro, como diz el refrán: Dios y el cuchu fain munchu, pero más el cuchu. Trátase de querer y apostar pola pervivencia del idioma, asina, ta bien que los nuesos políticos amuesen estos díes tolo que quieren al asturianu y saquen unos cartelinos y fagan unos xuegos florales, pero ye un derechu de los asturianos y yá un clamor social que se pongan daveres a trabayar pol asturianu ensin roces, zunes y complexos estúpidos, y ente toos y col mayor consensu posible coles instituciones científiques, sociales y culturales, normalizar l’asturianu y declarar la cooficalidá de les dos llingües propies d’Asturies, qu’a toos arriquez. Fonte: La Nueva España