27/6/13

Uviéu acueye esti xueves una nueva manifestación escontra la LOMCE


Dende los principales sindicatos de trabayadores, organizaciones estudiantiles y de pás y más, llamen a participar nuna nueva movilización escontra'l proyeutu de llei educativa.

Esti xueves Uviéu va a acoyer una nueva movilización del seutor educativu escontra la LOMCE, el proyeutu de llei educativa conocíu como "Llei Wert", emburriáu dende'l gobiernu central y que cunta con un claru calter españolizador y clasista. Poro, dende sindicatos educativos como SUATEA, CC.OO o UGT llamen a participar y protestar escontra un proyeutu altamente perxuiciosu pa los y les trabayadores del seutor, que sufriríen entá más retayos, despidos, y precarización. Tamién recuerden del papel cómpliz del gobiernu asturianu de la FSA-PSOE, que prautica retayos adicionales ensin nenguna torga.

Tamién ye destacable'l sofitu a la convocatoria de la Federación Asturiana de Pás y Más d'Alumnos, asina como d'organizaciones estudiantiles como la Xunta Estudiantil Asturiana, que llama a participar "escontra les polítiques educatives españolistes y ultrarelixoses, les polítiques capitalistes na Educación Pública, la privatización y mercantilización del conocimientu que nos pertenez a toes y toos, y los retayos y dinámiques segregadores nel sistema educativu". La movilización saldrá a les 18:00 de la Plaza d'España, n'Uviéu.

Fonte: Infoasturies

2 comentarios:

  1. ¿Y escontra'l Psoe y los sos adláteres politiqueros que nun quieren la oficilidá l'asturianu, pa cuando?

    ResponderEliminar
  2. La LOMCE nun ta mal. Lo que ta mal ye les mamandurries y les beques conseguíes ensín méritu dengún, ensín esfuerzu, porque sí... El problema del asturianu ye cosa de la conseyería que nun quier la oficialidá de la llingua y non de la Lomce.

    ResponderEliminar

Los comentarios tán pendientes de moderación. Espublizaránse lo primero dable.