11/9/12

El PSOE refuga otra vegada la oficialidá del asturianu


González remarcó nun conceyu cola XDLA la negativa del so grupu políticu a la oficialidá del idioma


Pablo R. Guardado
Representantes de la Xunta pola Defensa de la Llingua Asturiana (XDLA) aconceyaron el llunes con Ana González. La conseyera d’Educación, Cultural y Deporte remarcó la negativa del so grupu políticu a la oficialidá de la llingua asturiana.

Ésta foi una de les primeres afirmaciones que fixo González a Carlos Pulgar, Xosé Candel y Llucía Menéndez, representantes de la XDLA presentes nel aconceyamientu, nel que tamién acudieron en compañía de la conseyera la direutora xeneral de Política Llingüística, Ana Fueyo, y l’asesor téunicu docente de Llingua Asturiana na Educación, Xosé Lluis Remis. La responsable d’Educación, Cultura y Deporte sí reiteró’l so compromisu de cumplir cola creación de la especialidá d’asturianu, recoyíu nel programa eleutoral de la FSA-PSOE, anque ensin concretar fecha –“a lo llargo d’esta llexislatura”–, y foi receptiva a la inclusión de la Llingua Asturiana nel currículu d’Infantil, en procesu d’ellaboración y aprobación. D’igual forma, los representantes de la XDLA solicitaron a González que “s'informe de manera efeutiva a tolos centros sobre l'aplicación ineludible de la sentencia xudicial qu’elimina la ratio mínima pa impartir Llingua Asturiana en Secundaria” y una interpretación “recta” de la Llei d’Usu y Promoción del Asturianu “pa minimizar el descensu xabaz de matriculaciones nel pasu de Primaria a Secundaria”.

La continuación de los trabayos de la Xunta Asesora de Toponimia, col oxetivu de completar la oficialización de la toponimia de tolos conceyos d'Asturies, ye otru llabor que la conseyera y direutora xeneral de Política Llingüística dixeron que diben en poner en marcha yá. D’igual forma, aseguraron tar en contautu col direutor de la RTPA, Antonio Virgili, “cola intención d'afalar el cumplimientu de la toponimia oficializada nos diferentes espacios y tamién, pa impulsar la presencia na programación de conteníos deportivos, informativos y de ficción n'asturianu”, según espliquen dende la XDLA.

La organización cívica de defensa del idioma criticó la negativa dafechu a la oficialidá remarcada por González, “porfiando, otra vuelta, na discriminación d’una parte de la sociedá asturiana, y dexando bien a les clares les actitúes antidemocrátiques del partíu que representa, que fai oyíos sordos a los mandaos internacionales qu’encamienten la reconocencia del idioma, asina como la llexislación vixente”. La XDLA tamién quier “llamar l'atención de que tres más de cien díes de gobiernu, nun se conoz l’adopción de nenguna midida en materia llingüística y, endagora, sólo podemos falar de la disposición d’esti Gobiernu a solventar aquellos procesos yá entamaos, pero qu’en nengún casu suponen la planificación d’una serie de midíes coherentes que sienten les bases d’una normalización social de la llingua autóctona que vengan a superar los déficits nes funciones sociales del asturianu”.

Fonte: Asturies.com

16 comentarios:

  1. Son la mesma muria intransixente de siempres.

    ResponderEliminar
  2. No ho entenc. Quina excusa-explicació donen per a oposar-se a l'oficialitat? Què té de dolent l'oficialitat? A qui perjudica?

    ResponderEliminar
  3. A España, David, paez mentira pa ti...
    La oficialidá ye una concesión qu'España nun ta dispuesto a dar sinón que la situación social lo faiga absolutamente necesario y inevitable. Y n'Asturies nun se da'l casu, nin.

    ResponderEliminar
  4. La esclusión llingüística que supón afitar la superioridá del castellanu como única llingua oficial ye una política fata y decadente, d'otres dómines. Marxinar llingüísticamente a los asturianos cuando nel restu comunidaes billingües la llingua propia ye oficial tamién, ye una amuesa d'autoodiu y despreciu a la cultura del país.

    ResponderEliminar
  5. ¿Ye que esperabais otra cosa del psoe?

    ResponderEliminar
  6. David, la mayoría de los asturianos y asturianas pasen olímpicamente de la llingua.

    ResponderEliminar
  7. Fáltate añedir "la mayoría DE LOS POLÍTICOS". El pueblu nun ye antiasturianu como ellos.

    ResponderEliminar
  8. Gràcies per les respostes.

    Per tant, és important movilitzar aquesta majoria.

    ResponderEliminar
  9. Zure hizkuntza ofizialak politikariek ezin ukatu pertsonen eskubide kultural bat da.

    ResponderEliminar
  10. A los políticos vótalos la xente. Si la xente tuviera concenciao de verdá col asuntu de la llingua, los políticos falaríen n'otros términos mui bien diferentes. Pero lo cierto ye que la mayoría de la xente nun da o quita'l votu por cuestiones llingüístiques, o lo que ye lo mesmo, nun ta tan a favor de la oficialidá como nos quieren facer creyer los de les encuestes.

    ResponderEliminar
  11. La gent vota segons la pregunta: si la pregunta és "qui creu que governarà millor Asturies, Espanya o Europa?", la gent votarà el partit que en conjunt presenti el millor programa o sentimentalment sigui més acceptable.

    A més, crec que els partits que porten l'oficialitat al programa electoral són molt pocs i tots (perdoneu-me si m'equivoco) són d'esquerres i sense gaires possibilitats de governar o entrar al Parlament.

    Si de veritat voleu que la gent accepti o negui l'oficialitat de la llengua asturiana, heu de preguntar directament "està vostè d'acord en dotar la llengua d'oficialitat". Així podran dir si sí o si no.

    Això es pot fer a través d'una ILP o a través de consultes municipals.

    ResponderEliminar
  12. Ye lo mesmo que preguntar ¿quién va gobernar meyor Cataluña: Europa, España o los políticos chupópteros catalanes?

    ResponderEliminar
  13. Una gran aportació al debat, com sempre, plurinòmin. No sé què faríem sense tu. Segurament avorrir-nos.

    ResponderEliminar
  14. Andecha Astur yá pidiera va tiempu un referendum pola oficalidá, pero en solitariu y non una ILP.

    ResponderEliminar
  15. Ye l'únicu preséu que queda, un referendum. Asina tamos qu'hasta pa drechos humanos tenemos que facer un referendum.

    ResponderEliminar
  16. Nun tan pola oficialidá y amás saquen de la manga coses como'l númberu mínimo d'escolinos pa poder dar l'asignatura.

    ResponderEliminar

Los comentarios tán pendientes de moderación. Espublizaránse lo primero dable.