7/9/12

La XDLA critica l'ausencia de la Feria del Llibru y el Discu n'Asturianu el Día d'Asturies


La XDLA critica que nun se celebre la Feria del Llibru y el Discu n'Asturianu esti 8-S.

La Xunta pola Defensa de la Llingua Asturiana emitió esti vienres, 7 de setiembre, un comunicáu onde critica que les celebraciones del Día d'Asturies «dexen de llau» la industria cultural n'asturianu al nun programase, dientro de los actos entamaos pol Gobiernu, la Feria del Llibru y el Discu n'Asturianu, «una actividá que da aire a un sector que xenera bien de puestos de trabayu y mueve la economía».


La organización en defensa de los derechos llingüísticos considera que'l 8 de setiembre habría ser una fecha «marcada pol emponderamientu de les nuestres tradiciones y la nuestra identidá». Acordies con esto, la folixa itinerante del Día d'Asturies, qu'esti añu acueye'l conceyu de Tinéu, inclúi muestres d'oficios y deportes tradicionales, amás de la gastronomía y los productos agroalimentarios del país, exemplos, pa la XDLA, «de la nuestra cultura y la nuestra forma de ser».

Otros aspectos positivos de les celebraciones que destaca la XDLA son el protagonismu de los grupos asturianos na estaya musical de la fiesta –frente a les «grandes estrelles de la música española, que poco o nada teníen que ver cola celebración» y que se contrataben otros años– o la cartelería billingüe –dalgo onde la organización ve espeyáu'l trabayu del movimientu de reivindicación llingüística–.

Por too ello, la tacha principal que la Xunta pola defensa de la Llingua Asturiana fai al programa oficial ye qu'esti añu nun se celebre la Feria del Llibru y del Discu n’Asturianu, una actividá que permitía que les persones qu'acudíen al sitiu onde se desenvolvía la xornada –unes 500.000 en Ribeseya nel 2010– pudieren comprobar la cantidá y calidá de la industria cultural que s'espresa nel idioma propiu. Esti ye, amás, a xuiciu de la organización ciudadana, un sector que xenera empléu y activiá económica y que, nun siendo n'actividaes como la feria qu'esti añu nun se va facer, nun tien la visibiliá qu'habría tener ente un públicu ampliu.

Dende la XDLA nun entienden que, nesti tiempu de crisis y recortes, «cola cultura como una de les primeres afectaes pola época económica mala», una actividá qu'entama'l Gobiernu autonómicu –qu'ayuda a la publicación de la mayoría de llibros y discos n'asturianu– «nun permita qu'estos productos lleguen a tola sociedá». Recuerda la organización que la llingua asturiana ye tamién «una industria grande que da trabayu a cientos de persones de manera directa o indirecta» y que, en tiempos de crisis, necesita de l'apoyu de l'Alministración.

Fonte: Les Noticies





7 comentarios:

  1. Entá vense poques banderes d'Asturies nes ventanes, sacante los llugares onde hai actos políticos o festivos. Ye una guapa tradición qu'hai de fomentar.

    ResponderEliminar
  2. La oficialidá del asturianu aportará pesia'l mal momentu que travesamos.

    ResponderEliminar
  3. Vense poucas bandeiras d'Asturias nas ventás, é verdá, y eu penso qu'é porque nun hai úa concencia clara na sociedá de qu'é el Día d'Asturias, senón que se ve como un día máis. Nun hai, tampouco, úa invitación institucional a sacar as bandeiras (como sí la hai el 12 d'Outubre), y a festa prantíase de manera folclórica (vase a tal ou cual poblo y faise úa festa, máis nada).

    Quiciabes seña úa das consecuencias d'escoyer un día pral Día d'Aturias sen nengún transfondo político civil (como pode tello el 25 de Mayo), senón relixoso.

    Xuanxo, eu creo qu'a oficialidá pode chegar, peró nun esqueizamos que pode nun chegar, ou pode chegar condo xa toda a población seña castellano falante y entós terá un carácter meramente simbólico (como na mayor parte d'Irlanda, por caso). Espero que chegue conto antias, senón mal vamos.

    ResponderEliminar
  4. Asturies merez más de la so xente, pero tovía más de los sos políticos que faen goña d'ella.

    ResponderEliminar
  5. Vense banderes pero d'España, sobremanera cuando xuega la selección de fútbol namás, fíu.

    ResponderEliminar
  6. Ye verdá, Rafa ¿ónde tán les banderes asturianes na cai, nos locales públicos, nes ventanes y balcones? solo vense el españoles perdayures, ¿tamién pasa esto en Cataluña? pero lo de la Feria del llibru y del discu ye un auténticu aprobiu.

    ResponderEliminar

Los comentarios tán pendientes de moderación. Espublizaránse lo primero dable.