Nun murniu comunicáu asoleyáu, l'Asociación de Trabayadores de la Normalización fai anuncia del repetíu procesu de precariedá nel que trabayen los sos asociaos nes oficines de Normalización Llingüística de los Ayuntamientos asturianos. Y noma a los culpables: "cuando zarremos esti añu 2014, una parte importante de les persones responsables de los SNL asturianos tendrá firmáu'l so cese. Ye por eso que, otra vuelta más, a l'Asociación de Trabayadores de la Normalización Llingüística correspuénde-y denunciar públicamente la situación d'inestabilidá y precariedá llaboral llaceriosa que vive esti colectivu, por culpa, ente otres coses, de la xestión pública pésima de conceyos y Principáu". L'Asociación diz que "a piques d'acabar esti añu, topémonos con que, como cada añu, a munchos de los conceyos asturianos nun-yos basta con qu'apaezan nos Presupuestos Xenerales asturianos partíes destinaes al mantenimientu de los SNL; precisen, amás, una carta comprometiendo les perres conseñaes yá na partida correspondiente". El problema ye que'el Principáu nun queda p'atrás, en rellación a esti y otros temes "como la planificación o la coordinación conxunta d'actuaciones en materia de normalización llingüística, llevemos cuatro piticiones de xunta sin respuesta dala no que va d'añu. Por too esto, nun podemos dexar de llamentar la falta de comunicación ya interés de la Direición Xeneral de Política Llingüística, más que nada polo provechosa que resultaría la puesta en común en materia de promoción". Pa finar, l'ATN diz que "l'añu nuevu nun paez sorrir a esti colectivu, qu'una vez más alcuéntrase indefensu énte la falta de procuru ya interés que manifiesten los organismos encargaos de garantizar una normalización llingüística de calidá n'Asturies y un futuru pa la nuesa llingua". Fonte: Asturnews | |
