Un cursu na sede de la RTPA va permitir a periodistes formase n'asturianu

por Pablo R. Guardado

La Direición Xeneral de Planificación Llingüística y Normalización y l'Academia de la Llingua Asturiana (ALLA) entamen xunto con RTPA un 'Cursu de Llingua Asturiana pa Programes Informativos' en dos niveles. Ésti ta destináu a profesionales del sector audiovisual.

Esta iniciativa ye asemeyada a la fecha hai unos años pol ente públicu de comunicación pal so personal, cola diferencia de que nesta ocasión ta abierta a tolos profesionales de la comunicación nel país. El oxetivu ye "capacitar al alumnáu pa ellaborar, acordies col so perfil, un programa informativu n’asturianu en radio/televisión".

Pa ello dispondrán de baldre d'un cursu semipresencial de 60 hores de llargor, que se divide en cuatro bloques: 'Gramática, normes ortográfiques y léxicu', impartíu por Marta Mori; 'Sociollingüística, Llexislación y Alministración', a cargu de Pablo Texón y José Luis Remis; 'Medios de comunicación y normalización', con Damián Barreiro como maestru; y  'Práctica del asturianu en programes informativos de radio y televisión', clases que van poner Naciu Varillas y Xosé Miguel Suárez Fernández 'Tapia'.

Les sesiones van celebrase de 15 a 18 hores, xueves y vienres, nun calendariu que va principiar el día 31, con final previstu pal 26 de mayu. Los alumnos que participen nel cursu van recibir un certificáu d'aprovechamientu del mesmu. Pa formalizar la matrícula ye necesario unviar a la direición xeneral la fueya d'inscripción disponible na so web, o nel documentu qu'apaez como axuntu nesta noticia con tola información sobre la so programación, enantes del día 22.

Formar a periodistes nel emplegu de la llingua asturiana

Esta iniciativa naz del enfotu del conseyeru d'Educación y Cultura, Genaro Alonso, y del direutor xeneral de Planificación Llingüística y Normalización, Fernando Padilla, cola intención de formar periodistes nel emplegu de la llingua asturiana. L'oxetivu últimu ye aumentar la programación n'asturianu de la RTPA, unos de los puntos que trata'l documentu del Plan de Dignificación que s'aprobó na Xunta Xuneral, pendiente de la so redaición definitiva por parte del Conseyu de Gobiernu.

Fonte: Asturies.com

Adxuntu	Tamañu
cursu_de_llingua_asturiana_pa_programes_informativos.pdf	101.43 KB

Iniciativa pol Asturianu ufre un cursu d'asturianu na Xunta Xeneral

Modelu de carta presentada a tolos grupos de la Xunta Xeneral d'Asturies ufriéndose pa organizar un cursu d'asturianu pa diputaos y trabayadores del Parllamentu.

Fonte: Iniciativa pol Asturianu

La Casa d'Asturies de Valencia fina'l so primer cursu d'asturianu

   El pasáu 29 de xineru acabó’l I Cursu d’Asturianu en Valencia, celebráu na Casa d'Asturies y col que collaboraba l'Asociación Iniciativa pol Asturianu. Les venticinco hores de desendolcu del cursu, nes que pudo deprendese gramática, léxicu, sociollingüística del asturianu, y participar al traviés de xuegos, videos y actividaes en situaciones comunes del día a día pa saber espresase d’un xeitu cómodu en llingua asturiana, finaron con un vídiu fechu polos propios escolinos y escolines. Esti cursu, que cuntaba col reconocimientu de la Academia de la Llingua Asturiana, impartióse al traviés d'un alcuerdu de collaboración ente la Casa d'Asturies en Valencia ya Iniciativa pol Asturianu.

   Dende Iniciativa pol Asturianu queremos felicitar, mesmo al alumnáu qu'a la Casa d'Asturies y esperamos siguir collaborando pa siguir alantre con iniciatives como esta.

   Los alumnos y alumnes del Cursu despidiéronse d’esta primer esperiencia con un videu a favor de la llingua asturiana. Un videu nel que pue vese'l so compromisu y ciñu cola llingua asturiana.                         Fonte: Asturnews