Abrese la matrícula nos Cursos de Branu d'Uniovi y la UABRA

Como cada añu, el Vicerrectoráu d'Estensión Universitaria y Comunicación publica la so ufierta de Cursos de Branu, coles mires de proxectar la conocencia a la sociedá asturiana y dientro d'ellos los cursos de la Universidá Asturiana de Branu de l'Academia de la Llingua (UABRA) que se celebren en Cangas del 28 de xunetu al 8 d'agostu. Esti añu hai convocaos, amás de los cursos elemental y avanzáu, el cursu de capacitación pala traducción, unu d'ecoloxía y otru sobre l'emplegu didáuticu d'Internet. El cursu básicu de llingua asturiana inclúi, con 60 hores llectives, un repás peles Normes ortografiques, la sociollingüística aplicada al casu asturianu, exercicios escritos, situaciones comunicatives escrites y orales, y un averamientu a la Lliteratura Asturiana. Pela so parte, l’Avanzáu, col mesmu númberu d’hores, adiéntrase nel estudiu de la llingua asturiana estándar y la so presencia na sociedá de l’Asturies de güei, plantegando tamién situaciones comunicatives escrites y orales, más complexes, aspeutos de la cultura asturiana y de la Historia d'Asturies, un repás a la Lliteratura asturiana contemporánea y un pequeñu cursu de téuniques de creatividá lliteraria. Cursos d'Afondamientu No que cinca a los Cursos d'Afondamientu Cultural y Llingüísticu, como cada añu va celebrase un cursu de Capacitación pa la Traducción al Asturianu, de 35 hores, del 28 de xunetu al 2 d'agostu, y embaxo la dirección de la decana de Filosofía y Lletres de la Universidá d'Uviéu, Cristina Valdés, y la collaboración de los profesores Xosé Lluis García Arias, Ana Mª Cano y Xosé Antón González Riaño. Nel cursu preséntense davezu los presupuestos teóricos que rixen la traducción a una llingua minoritaria, teniendo en cuenta, de mou especial, l'exerciciu de tornes de testos lliterarios y periodísticos y de testos llegales y científicos. Y a esto xúnese una sesión monográfica sobre estratexes de traducción ingles-asturianu. El cursu dedicáu a les nueves tecnoloxíes va ser esti añu nes mesmes feches que'l de traducción y va titulase “Internet como recursu educativu y cultural”. Nes sos 35 hores va sirvir pa ufiertar nueves y prestoses posibilidaes pa que'l profesoráu de Llingua Asturiana d'Educación Primaria y Secundaria pueda acceder a los recursos qu'ufre la rede y pueda diseñar, llueu, xeres y actividaes d'aula pal deprendizax oral y escritu de la Llingua Asturiana. El so coordinador ye David Melendi y tendrá profesores como Xulio Berros y Xabiel García Pañeda. EL caberu de los cursos d'afondamientu lleva por títulu "Ecoloxía y Mediu ambiente y desenvolverase embaxo la dirección de Carlos Lastra. Los Cursos tán abiertos a toes aquelles persones interesaes nes materies que s'imparten, independientemente de si se trata o non d'universitarios y la matrícula fadráse na Universidá, magar los cursos de la UABRA tendrán inscribise na see de l'Academia de la LLingua. Nel casu de los alumnos y alumnes universitarios, la carga llectiva de los cursos ye homologable, nes enseñances non anovaes (a escastar), por creitos de llibre configuración -con calificación- cuando l'alumnu cumpla los requisitos d'asistencia y supere el procesu d'evaluación; o por creitos -ensin calificación- cuando l'alumnu cumpla'l requisitu d'asistencia (90% de les sesiones). Tamién son susceptibles de reconocencia por creitos ECTS nos estudios de Grau y Máster, siempres que l'alumnu asista, a lo menos, al 90% de les sesiones, los cursos de conteníu cultural que cunten cola oportuna autorización. El plazu de Matrícula vieno acabante d'entamar esti pasáu 21 d'abril, quedando supeditada la realización de los mesmos a qu'algamen un númberu de matricules suficiente, anulando aquellos que la so realización envalorese invidable, según el calendariu d'anulaciones. Les persones afectaes pola anulación del cursu, yá matriculaes, tendrán de dirixise a la Unidá de Matrícula pa regularizar la so situación. Les normes de matrícula ya tan dispoibles na web d'Uniovi Más información: Web de la Universidá colos Cursos d'esti 2014 Fonte: Asturnews

Últimes places pal cursu "Xestión cultural n'Asturies: trabayando con llingües y cultures" na UABRA

Va celebrase na UABRA, dientro del programa de los Cursos de Branu de la Universidá d'Uviéu

   Dientro del marcu de la Universidá Asturiana de Branu, que se celebra na primer quincena d'agostu en Cangas del Narcea, la Universidá d'Uviéu y l'Academia de la Llingua Asturiana organicen esti añu un cursu baxo'l títulu "Xestión cultural n'Asturies: trabayando con llingües y cultures", onde va afondase na conocencia de la teoría y les ferramientes práutiques de la xestión cultural venceyaes n’especial a los campos de la xestión de la política llingüística y la cultura n’Asturies, averándonos a la conocencia de la situación de la estaya y apurriendo ferramientes básiques pal trabayu nel campu de la xestión cultural n’Asturies. El cursu va celebrase ente los díes 5 y 9 d'agostu en réxime d'internamientu y tien un preciu, pensión completa incluyida, de 190 euros.

   Esti programa tuvo un bon nivel de matriculación pero entá queden delles places llibres pa los que pue matriculase unu a lo llargo de los próximos díes nel llar de l'Academia de la Llingua Asturiana n'Uviéu, na cai l'Águila.

   El cursu ta dirixíu por Isabel Hevia, profesora de la Universidá d'Uviéu y esperta en programes sociales d'acción cultural, y va cuntar ente'l profesoráu col periodista y especialista en xestión cultural Inaciu Galán encargáu del bloque d'Averamientu a la xestión cultural, la responsable de la Oficina de Normalización Llingüística de Xixón, Mª Xosé Rodríguez, que va centrar les sos sesiones nel campu de la xestión de la normalización de llingües y el periodista de TPA y profesor de la Universidá CJC, Cristobal Ruitiña, que dedicará la so parte del cursu a la difusión de la información nel ámbitu de la xestión cultural.

   Esti cursu tien reconocencia oficial per parte de la Conseyería d'Educación del Principáu d'Asturies, darréu de l'acreitación de l'ALLA como "Entidá Organizadora d'Actividaes de Formación Permanente del Profesoráu". Ello afita a tolos efeutos la reconocencia d'estos Programes Formativos dende'l puntu de vista alministrativu (currículum, méritos, sexenios, etc.) pal profesoráu d'Educación Primaria y Secundaria del Principáu d'Asturies. Amás, al tar nos programes de los Cursos de Branu de la Universidá d'Uviéu, el títulu inclúi créitos universitarios.

   Más información: Más información pa la matriculación nel cursu

   Fonte:  Asturnews.

Cuasi 90 escolinos de 22 países deprenden gallegu nel branu

Case 90 alumnos de 22 países aprenden galego nos cursos de verán dá Academia.

Ou presidente dá RAG, Xosé Luís Méndez Ferrín, acudiu á presentación oficial na sede dá institución

Escrito por: manuel rei

Había unha vez unha polaca, unha chilena, unha brasileira e unha portuguesa que falaban galego entre elas. Monika, Sandra, Cecilia e Martina son catro dos 86 alumnos de 22 países que asisten este mes á XXV edición dos cursos de verán de lingua e cultura galegas para estranxeiros. Onte tivo lugar na sede da Real Academia Galega, na Coruña, a presentación oficial, coa presenza do presidente da institución, Xosé Luís Méndez Ferrín. Os estudantes xa levan dende o día 2 acudindo ás clases en Santiago de Compostela, que rematarán o día 27. Durante este tempo, ademais das leccións teóricas e prácticas, os alumnos empaparanse da cultura do país visitando vilas como Allariz, Celanova ou Fisterra.

Fonte: La Voz de Galicia

Nueva Universidá Asturiana de Branu (UABRA)

Ente les novedaes más importantes presentaes nel discursu de la presidenta de l’Academia de la Llingua Asturiana, esti vienres, tuvo l’anuncia de la fundación d’una Universidá Asturiana de Branu, que se funda en collaboración cola Universidá d’Uviéu y el Conceyu de Cangas del Narcea, y que va incluyir los tradicionales Cursos de Branu y otres actividaes.

Ente los cursos nuevos, qu’entamen esti añu Internet y asturianu: aplicaciones socio-educatives, d’averamientu a la llocución periodística en llingua asturiana, Cantares, bailles ya instrumentos musicales asturianos, La lliteratura asturiana nel aula d’Educación Primaria, d’aniciu a la investigación dialeutal, toponímica y de tradición oral y un Cursu d’entamu a la investigación hestórica de la llingua asturiana.

Amás Ana Cano reflexonó sobre les cuestiones que marcaron l’actualidá de la llingua asturiana a lo llargo d’esti añu, recordando que “tamos a un añu de les elleiciones, y cuido que ye’l momentu de ver qué queremos pa la cultura d’esti país”. Pidió tamién “xenerosidá y altor de mires” a los partíos políticos pa solucionar el problema del estatus llegal del asturianu.

Fonte: Asturnews

Parlem Català fai énfasis na llingua catalana

Dempués de tres años, l’asociación Parlem Català da, nos meses de xunetu y agostu, los cursos de catalán nel Barcarès de la Cataluña del Norte al que lo deseya. Una iniciativa que nun ambiciona otro que proponer a los que tán de vacancies "compartir un momentu de convivencia descubriendo delles nociones de catalán." Los cursos, que tuvieron que ponese ente una hora y una hora trenta, permiten a los estudiantes descubrir el catalán nun ambiente n’efeutu d’estudiu pero tamién distendíu. Dempués de qu’estos últimos se familiarizaran con delles pallabres básiques de la llingua, ehí ta que les profesores proponen a los sos escolinos una "interrogación" oral: facer una pequeña fras en catalán. Y de fuercia ye constatar qu’esceutu l’énfasis, los discípulos deprenden rápidamente les bones pallabres de la fastera; el resultáu final ye más bien convincente.

Un aperitivu... catalán por supuestu.

El restu’l cursu desendólcase nel bon humor: dellos cancios catalanes tán nel programa y la convivencia ye más que nunca alitada. Dellos minutos enantes del meudía, el cursu s’apara y profesores y escolinos améstense pa compartir un aperitivu onde los productos llocales son puestos con tol honor (muscat, rosquielles...). ¡Bon provechu!.

La presidenta de l'ALLA pide la dignificación y normalización de la llingua na Universidá

La presidenta de l'Academia de la Llingua Asturiana (ALLA), Ana Cano, desixó’l vienres énte'l reutor de la Universidá d'Uviéu, Vicente Gotor, la "dignificación y normalización" de la llingua na Universidá y protestó énte'l refugu en dellos departamentos de documentos por tar escritos n'asturianu, o por llevar dalgún términu nesti idioma.

Cano espresóse nesti sen demientres l'actu de pieslle de los Cursos de Branu de l'Academia, cola entrega de diplomes nel Edificiu Hestóricu de la Universidá, al qu'asistió el reutor, encargáu de facer la intervención final.
Nel so discursu, la presidenta de l'ALLA destacó los avances en materia de llingua asturiana, especialmente cola inclusión de les especialidaes nel enseñu regláu de Maxisteriu y Filoloxía, pero añedió que "tovía queda muncho por facer". Nesti sen, desixó "la dignificación y normalización" del idioma, y refirióse a la visualización nes instancies universitaries del mesmu, asina como la puesta en serviciu de la páxina web, que yá ta tornada, pero que tovía nun ta operativa.

Tamién, denunció'l refugu de documentos por tar escritos n'asturianu. Comentó asina’l caberu d'estos casos, nel qu'una tesis nun s'almitió por llevar el nome de la universidá y el departamentu n'asturianu, cuando tamién taben en castellán. "Nun podemos tar dependiendo de les preferencies de persones concretes que ponen torgues", señaló. Al términu del actu, comentó-y al reutor qu'esti tipu de casos asoceden davezu.
Asina, pidió mayor collaboración del reutoráu, y anunció la cellebración de conceyos próximamente pa definir estos campos de collaboración.

El reutor, pela so parte, destacó los avances que col so equipu de Gobiernu ta dando la Universidá en materia de llingua, non sólo cola inclusión de les especialidaes reglaes, sinón también cola aprebación del reglamentu que permite la presentación de documentos, asina como l'acuerdu cola Conseyería de Cultura pa la torna de los mesmos. "Nun dexamos contenta a muncha xente, a los que mos desixen más y a los que tán a la escontra de la llingua", señaló. Sicasí, amosóse dimpuestu a siguir collaborando cola Academia y pidió’l sofitu d'ésta institución pa siguir trabayando.

No que cinca a los cursos, Ana Cano destacó'l "bon nivel" y el "saber tar" de los más de 100 participantes, qu'algamaron la titulación de los niveles Elemental, Avanzáu, Gallego-Asturianu, amás de los seyes d'Afondamientu.

XVII Cursos de branu de l'Academia de la Llingua Asturiana

L'Academia de la Llingua Asturiana va recuperar esti mes d'agostu, nos sos cursos de branu, el d'Ecoloxía y Mediu Ambiente, amás de creyar dos nuevos títulos, empobinaos a la formación de filólogos en xeneral y de profesores de gallego-asturianu. La edición d'esti añu va desendolcase demientres les dos primeres selmanes d'agostu na Escuela Llar de Santantolín d'Ibias, y qu’ayeri presentaron oficialmente la presidenta de l'Academia, Ana Cano, el direutor de programación de los cursos, Xosé Antón González Riaño, y el responsable del cursu d'Ecoloxía y ayalgueru de l'Academia, Carlos Lastra.

Hai cuatro años que nun s'ufiertaba el cursu d'Ecoloxía y Mediu Ambiente que, según Cano y el propiu Lastra, muncha xente solicita tolos años. Esti añu va tar orientáu a tres temátiques: los espacios naturales y especies protexíes d'Asturies, el desendolcu enerxéticu na comunidá y la construcción d'infraestructures. Lastra desplicó que'l cursu pretende que los asistentes tengan una visión "crítica" y "reflexiva" sobre la necesidá de qu'Asturies seya la productora d'enerxía pa tol Estáu y sobre la "obsesión" de los nuesos políticos coles grandes infraestructures, ente les que citó'l túnel del Rañadoiru y l'autovía ente Ponferrada y Tinéu.

Pela so parte, Riaño refirióse al cursu 'Ferramentas prá normalización llingüística del gallego-asturiano', primer fas de les tres de les que se va componer esta actividá. Ye, según el direutor de programación, un aición de "reciclaxe y anovamientu" del profesoráu de gallego-asturianu qu'imparte les sos enseñances na zona Navia-Eo, que tien por oxetu ufiertar nueves posibilidaes didáutiques.

La otra novedá, el Cursu d'Especialización en Filoloxía Asturiana va destináu a filólogos n'Hispániques y Romániques, o titulaos na Especialidá de Filoloxía Asturiana, interesaos en "deprender principios básicos de la llingua asturiana" y "afondar nos sos conocimientos científicos". Los otros cursos ufiertaos son yá avezaos d'esta actividá braniega de l'Academia: l'Elemental y l'Avanzáu de Llingua Asturiana, el de Capacitación pa la Traducción, el de Capacitación pal Gallego-Asturianu, amás de'l de Presencia de la Llingua Asturiana n'Internet y el Xuegos y Tradiciones Populares na Enseñanza (de cara a la so inclusión nos currículos docentes).

Esti añu hai una matrícula d'unes 120 persones. De fechu, calcularon que pudieron facelos en total más de 5.000 persones dende la so primer edición.