L'asturianu tuvo presente na ufrienda floral a Xovellanos

La estatua de Gaspar Melchor de Xovellanos acoyó esti sábadu, 6 d'agostu, la tradicional ufrienda floral al ilustráu xixonés coincidiendo col 125 aniversariu de la inauguración del monumentu. Como aquel día del 1891, l'asturianu tuvo presente nel actu a propuesta del Conseyu Asesor de la Llingua.

Naquella xornada del sieglu XIX, la ciudá amosaba los sos respetos a Xovellanos coincidiendo cola fecha na que tornara a Xixón tres diez años fuera depués del so periodu en prisión y representar a Asturies na Xunta Central, con unos Xuegos Florales nos qu'hubo un exemplu del plurillingüismu y de la tolerancia llingüística representada pol xixonés na so vida y obra. Asina, recitáronse poemes que lu emponderaben en llingua castellana, asturiana, vasca, gallega, catalana y alemana. Col pasu los años, el nuesu idioma quedo relegáu, siendo la so presencia nesti actu añal nula y desendolcándose en castellanu dafechu.

Esta dinámica camudó esti sábadu, yá que la llingua asturiana tuvo presencia na ufrienda floral, llegando a intervenir nel nuesu idioma la propia alcaldesa de la ciudá, Carmen Moriyón. Asina lleéronse discursos intercalaos en castellanu y n'asturianu. Amás, el Conseyu Asesor de la Llingua, que propunxo que l'actu se desendolcara nes dos llingües, foi una de les 26 entidaes que llevó ramu al eventu.
Fonte: Asturies.com

Aprobáu'l por unanimidá'l borrador del Plan de Normalización de Xixón

Los quince puntos más destacaos del Plan de Normalización Llingüística de Xixón 2016-2019

El pasu definitivu va ser el so preste en Plenu, posiblemente'l 16 de marzu, tres el visto bonu del Conseyu Asesor de la Llingua de Xixón. Na convocatoria celebrada'l martes participaron los representantes de tolos grupos municipales.

El documentu definitivu tendrá finalmente 68 puntos. Esta modificación d'última hora vieno por pidimientu de la Unión de Comerciantes de Gijón/Xixón por razones téuniques, pero nun modifica l'espíritu del Plan de Normalización, que vien a sustituyir el del 2008, que nun llegó a cumplise. D'esta forma, Xixón contará con una fueya de ruta pa los trés años próximos en materia llingüística cola fin de llevar la normalización de forma tresversal a toles estayes del conceyu.

El testu final ha de pasar agora pol Plenu, trámite pal que nun s'esperen sorpreses al contar cola unanimidá del Conseyu Asesor na votación d'ayeri, na que participaron tolos representantes de los grupos municipales. La fecha prevista pa l'aprobación definitiva ye la del 16 de marzu
.

L'asturianu na etapa de 0 a 3 años

Ún de los coleutivos que participen nel Conseyu Asesor de la Llingua ye 'Reciella. Families pol Asturianu', qu'apostó por introducir ún de les mayores novedaes nel Plan con respeuto al anterior. Ésta yera la creación d'un programa pilotu del asturianu como llingua vehicular nel ciclu de 0 a 3 años, pola demanda esistente ente los padres y madres, pero finalmente quedó nel estudiu de la so puesta en marcha.

"Anque esti ye un bon entamu, la nuesa propuesta yera más ambiciosa", apunta'l representante del coleutivu David Guardado, que considera "clave" pa la tresmisión xeneracional del idioma esta etapa na formación de los críos y críes. Nesi sen, señala que la midida debería dir acompañada "pola inclusión del asturianu nel currículum de 0 a 3 años por parte del Principáu, daqué que garantiza la llei d'usu pero que nun se cumple".

Na semeya, Ana Montserrat López Moro, conceyala d'Educación y Cultura y presidenta del Conseyu Asesor de la Llingua de Xixón.
Fonte: asturies.com

El Conseyu Asesor de la Llingua de Xixón recibe'l Plan de Normalización

• por Pablo R. Guardado

Esti martes, a les 18.30 hores, ta convocáu'l Conseyu Asesor de la Llingua de Xixón pa debater el borrador del Plan de Normalización Llingüística ellaboráu por una Comisión entamada al efeuto. Si se diera'l preste, ésti pasaría al Plenu pa la so aprobación definitiva.

Tres más d'un mes de trabayu, tal como anunció Asturies.com el pasáu 3 de febreru, dicha Comisión consensuó un testu definitiu que güei va llevase al Conseyu Asesor de la Llingua de Xixón, organismu nel que tán representaos los grupos municipales, l'Academia de la Llingua Asturiana, asociaciones en defensa del idioma, sindicatos, vecinos, hosteleros y otros coleutivos culturales. La reunión ta prevista pa les 18.30 hores na Pescadería Municipal Antigua y nella tamién va informase de la actividá de la Oficina de Normalización Llingüística.

El Proyeutu de Plan de Normalización Llinguística busca sustituyir al del 2008 —que nun se cumplió— y nun trai novedaes destacaes respeuto a ésti. Sicasí, les partes implicaes nel so desendolcu sí muestren optimismu con que'l documentu nuevu lleve la normalización de forma tresversal a toles estayes del conceyu.

Cinco árees

El documentu divídese en cinco árees: sector alministrativu del Conceyu; enseñu y tresmisión xeneracional; sector socioeconómicu; sector sociocultural y deportivu; y medios de comunicación y nueves teunoloxíes. En total son 69 midíes, que van acompañaes colos plazos pa poneles en marches dende yá hasta'l 2019.

Ente elles destaca l'usu de la imaxe corporativa del conceyu de manera billingüe nes dependencies municipales, uniformes y vehículos, asina como na publicidá institucional; el desarrollu de campañes informatives sobre la realidá llingüística de Xixón al personal municipal; l'usu de la toponimia oficial; y el roblamientu de convenios con coleutivos empresariales pa potenciar la llingua, ente otros munchos.

Ún de los aspeutos más importantes del Plan ye'l de la tresmisión xeneracional. Al respeuto'l documentu propón estudiar la creación d'un programa pilotu qu'introduza l'asturianu como llingua vehicular nel ciclu de 0 a 3 años pa les families que lo soliciten, y el potenciamientu de la matrícula na materia de Llingua Asturiana nes escueles del conceyu. Tamién s'inclúi nel documentu'l desendolcu d'una campaña empobinada a a padres y madres, y actividaes d'ociu pa neños y neñes y mocedá.

Fonte: Asturies.com

Xixón peracaba'l borrador del so Plan de Normalización Llingüística

• por Pablo R. Guardado

La selmana pasada Xixón Sí Puede reclamaba l'aplicación del plan nuevu de normalización - Esti plan ta yá nuna fase avanzada pendiente del pasu pol Conseyu Asesor y el plenu del conceyu- El Plan de 2008 incumplióse

Según pudo saber Asturies.com, una Comisión encargada de facer un borrador del Plan lleva trabayando más d'un mes y espérase que nel so conceyu de güei miércoles seya a zarrar una redaición consensuada del borrador del Plan de Normalización Llingüística que sedrá'l primer documentu d'esti tipu aprobáu dempués del que se punxo en funcionamientu en 2006.

Tres de la finalización d'esti borrador, el documentu ha pasar pa la so discusión al Conseyu Asesor de la Llingua, y, darréu, al Plenu nel que tien que ser aprobáu poles fuerces polítiques, polo que s'espera que nel mes qu'entra pueda peracabase tol ciclu y entamar tolo más en marzu coles aiciones previstes nun documentu qu'ha tar en vigor hasta 2019.

Nos últimos meses esta Comisión de Trabayu creada pol Conseyu Asesor de la Llingua Xixón, y na que participen representantes de grupos políticos y d'asociaciones en defensa del idioma, ta trabayando les propuestes que tien enriba de la mesa, pa iguar un documentu que lleve la normalización de forma tresversal a toles estayes del conceyu.

El Plan de 2008

Les organizaciones de defensa del idioma foron especialmente crítiques coles aplicación del Plan de 2008, que s'incumplió na mayoría de les sos previsiones. Amás yá a final de 2006 la falta d'implicación del equipu de gobiernu -daquella compuestu por IU-BA y PSOE- na política llingüistica llevó a tolos miembros del conseyu asesor de la llingua a la so dimisión en bloque.

Fonte: Asturies.com