2 Profes n'Apuros abre la campaña p'acutar l’axenda solidaria en llingua asturiana pa maestros

• . Dos profesores catalanes editen una axenda solidaria en llingua asturiana pa maestros

Cubierta de l'axenda solidaria "2 Profes n'Apuros"

  Tres l’ésitu de la primer edición, cola venta de la totalidá d’axendes solidaries en llingua asturiana pa maestros, les profesores catalanes Anna Palencia y Carlota Hernández repiten proyeutu. La plataforma dixital 2 Profes en Apuros ta acabante d’entamar la campaña p'acutar la de cursu 2017-2018.

  “Tamos mui contentes de la respuesta de los maestros y maestres asturianes, yá que vendimos toles axendes que sacamos, más de 300 de les 1.200 qu’asoleyamos en toles llingües. Amás recibimos munchos comentarios agradeciéndonos la iniciativa énte la falta d’axendes pa profesores n’asturianu”, asegura Hernández. Esti ésitu de l’Axenda pa Profes n’Apuros animó a la catalana xunto a la so colega Palencia, que conformen 2 Profes en Apuros, a apostar otra vuelta pol nuesu idioma; asina, la del cursu 2017-2018 va editase en llingua asturiana amás d’en catalán, castellanu, inglés, gallegu y eusquera, esta última en principio sólo en PDF.

  Pa ello entamaron una cuestación popular na rede al traviés de la plataforma Verkami, cola necesidá de sumar 7.500 euros. De momento sumen 3.741 euros y les espeutatives son les de cubrir esta cantidá enantes del 26 de marzu, cuando fina la campaña, pa empezar colos encargos d’edición y tenela llista pal so unvíu a los mecenes pal mes de mayu.

  La xente interesao en facese con un exemplar en formatu físicu puede facelo de magar los 14 euros, mentes qu’en PDF baxa hasta los 9 euros. Sicasí, ye posible sofitar la campaña con una aportación de 5 euros o facese con ún de los munchos packs de diferentes precios que s’ufren y qu’inclúin dende a un termu a una bolsa con un diseñu especial.

Novedaes

  Esti añu como novedá, l'axenda inclúi una fueya de contautos ameyorada, más espaciu pa horarios y xuntes, un llistáu de tutoríes simplificáu y munches más fueyes p'anotar tolo que necesita’l profesional nel so trabayu diariu. Según desplica Ana Martínez, la 'superilustradora' de la iniciativa, basáronse “nes propuestes que nos dieron los siguidores pa incluyir novedaes y munches meyores”. A ello hai que sumar la so funcionalidá y una estética cuidada, valorada pola profesional Patricia Such.

Otra manera, los mecenes de la campaña tamién podrán disfrutar de l’aplicación de l’axenda fecha pa IOS desendolcada pola empresa asturiana Gomeru Apps. Nel casu d’algamar 700 euros estra del oxetivu, ésta va asoleyase tamién pa dispositivos Android.

2.000 euros pa Save the Children

  L’Axenda pa Profes n’Apuros, amás de servir d’apoyu a los profesionales del enseñu, tamién tien la so cara solidaria. La esitosa campaña del añu pasáu permitió que la ONG Save the Children recibieren 2.000 euros pa desendolcar el so llabor.

  Nesta ocasión, 2 Profes en Apuros escoyó collaborar con Ayuda en Acción, que recibirá’l 10 por cientu de lo beneficios pal ‘Programa de apoyo a la infancia' que tien en marcha esta organización nel Estáu. "Escoyimos esti proyeutu porque a ser solidariu tamién se deprende y queremos aportar el nuesu granín de sable pa esparder esti mensaxe", apunta Palencia.

  Amás, cola merca de l’axenda, los maestros y maestres van poder tener accesu a tolos conteníos de EducAcción, una propuesta d’Ayuda en Acción qu'integra materiales didáuticos pa trabayar la educación en valores nel aula y averar otres realidaes sociales y el valor de la solidaridá a los centros educativos.

Sofitu d'Iniciativa pol Asturianu

  “Tamos encantaos de collaborar con un proyectu como’l de l’Axenda pa Profes n’Apuros, que’l cursu actual ta permitiendo que munchos profesores y maestros puedan tener la so axenda n’asturianu y vivir na so propia llingua nun ámbitu más”, destaca Iniciativa pol Asturianu, coleutivu que sofita esta iniciativa solidaria.                               Fonte: asturies.com

Iniciativa pol Asturianu vuelve a collaborar cola Axenda solidaria pal profesoráu

Iniciativa pol Asturianu apoyará otra vegada la plataforma online destinada a collaborar col Programa de apoyo a la infancia y sus familias en Españade la ONG Ayuda en Acción llamáu Aquí también. Pa ello va llanzase un crowfunding na plataforma Verkami que va durar hastal’l 26 de marzu.

La entidá asturiana sofita asina la campaña de ‘2 profes n’apuros’qu’amás del, asturianu tuvo en cuenta otres llingües del Estáu español como l’esukera, catalán, gallegu, castellán o llingües estranxeres como l’inglés. Como declara’l presidente de la organización:”N’Iniciativa pol Asturianu tamos encantaos de collaborar con un proyectu como'l de l'axenda pa profes n'apuros, que'l cursu actual ta permitiendo yá que munchos profesores y maestros puedan tener la so axenda n'asturianu y vivir na so propia llingua nun ámbitu más''

’2 Profes n’apuros’ ye una plataforma online que surdiera en 2015 col envís de facilitar el trabayu de los docentes. Dicen desendolcar esti llabor “dende una mirada respetuosa hacia los alumnos, acompañándolos emocionalmente y respetando los sos procesos de desarrollu”

L’axenda presenta conteníos bien afayadizos pa los docentes como horarios o plantíes d'evaluación. Pero lo más importante ye’l destín de la recaldación que nun ye otru que’l ya mencionáu Programa de apoyo a la infancia y sus familiasde laONG Ayuda en Acción.

Poro,  cola compra de l'axenda, vas poder acceder a una propuesta qu'integra materiales didáuticos pa trabayar los valores nel aula y averar les distintes realidaes sociales.Los que tean interesaos na venta anticipada pueden acceder al enllaz:  vkm.is/profesenapuros2

Fonte: Iniciativa pol Asturianu

Dos profesores catalanes editen una axenda solidaria en llingua asturiana pa maestros

Anna Palencia y Carlota Hernández entamen esti proyeutu —que va destinar parte de los sos beneficios a Save the Children— pa facilitar el día a día a los maestros. Tres una primer esperiencia, y pola demanda esistente, faen una versión n'asturianu.
"Trátase d'una axenda de maestros en DINA4 qu'inclúi contautos, tutoríes, fueyes d'evaluaciones, observaciones...", esplica Hernández, qu'afonda na importancia que dan al diseñu na so iniciativa. "Normalmente estes axendes suelen dar una respuesta únicamente funcional, dexando dalgo de llau'l diseñu, y eso ye dalgo que quiximos incorporar", añade la maestra catalana que conforma xunto con Palencia y una ilustradora '2 profes en apuros', un espaciu nel que comparten idees, recursos, reflexones y esperiencies sobre educación p'ayudar a compañeros de profesión.
Tres editar la primer 'Agenda para profes n'apuros' en .pdf n'agostu en catalán, castellanu y inglés, con un importante ésitu —7.683 descargues namái'l primer día—, les dos maestres decidieron "tomárnoslo como dalgo más serio de cara al cursu que vien". Asina naz el proyeutu d'esta axenda con fines solidarios, con versiones tamién n'eusquera, gallegu y asturianu.
"Los pidimientos de la xente lleváronnos a incorporar l'asturianu, al menos na versión dixital", esplica Hernández, que contó pa la torna col sofitu d'Iniciativa pol Asturianu. Pa que la versión física tamién sía una realidá, '2 profes en apuros' tien en marcha una campaña de cuestación popular na rede al traviés de la plataforma Verkami, cola intención de recaudar 6.500 euros. Les persones que collaboren, amás de l'axenda, van recibir delles recompenses.
De momento, en poco más d'una selmana yá consiguió más de 2.000 euros gracies a la collaboración de 108 mecenes, y la intención ye completar nun mes la cantidá presupuestada pa poder disponer de les axendes pa mayu. El 10 por cientu del preciu de cada axenda va destinase a Save the Children, "una ONG venceyada colos niños, que cree na educación como'l filu conductor pa camudar la realidá de éstos".
Collaboración d'una empresa asturiana
Amás de l'axenda en formatu físicu, '2 profes en apuros' tamién va trabayar nuna versión dixital. Pa ello va contar cola collaboración de la empresa asturiana de creación recién Gomeru Apps.

Fonte: asturies.com