Artistes pola Oficialidá na Casa Cultura de Nava

Dempués de pasar n'agostu pela Sala Loreto de Colunga, la Casa la Cultura "Marta Portal", en Nava, acueye dende'l llunes 4 al xueves 29 d'ochobre la esposición “Artistes pola Oficialidá”, entamada pol CAO (Conceyu Abiertu pola Oficialidá).

La esposición ye amuesa del sofitu del mundiu artísticu asturianu a la conservación del nuesu padrimoniu llingüísticu, y ta formada d'obres donaes por artistes asturianos de les cuatro últimes xeneraciones. Dende veteranos autores de la talla y el prestixu de Bernardo Sanjurjo o Fernando Alba a otros muncho más mozos que formen parte del arte emerxente actual.

L’amuesa vien a ser un interesante percorríu pol arte contemporaneu producíu n'Asturies, na que s'atopa tanto escultura como pintura y fotografía, con gran variedá de téuniques y soportes. Al marxe de la esposición artística, na esposición danse a conocer les campañes y l'activida que'l CAO tien puesto en marcha.

Fonte: Asturnews

Celfeden: el galés xune artistes y llingües minoritaries

Celfeden ye un nuevu eventu que quier xunir artistes y llingües y cultures minoritaries ufiertando una oportunidá única pa esponer el Gales espiritual y el so paisaxe cultural al traviés de medios artísticos.

Esti añu Celfeden ta empobináu a 9 artistes internacionales que residirán en Plas Tan y Bwlch en Maentwrog, un espeutacular llugar del Snowdonia National Park.

Los artistes representen a Gales y Holanda falando en galés. Amás tán Cataluña, Suiza ya Italia.

Los events y trabayos cuntarán con Bwrlwm Eryri la compañía d’artistes, poetes, cuntacuentos y músicos.

Los escolinos de gales y tola comunidá deprenderán en Datod Tafod en Talysarn y Felin Sgwrsio en Y Felinheli col Poeta Nacional de los Neños Ifor ap Glyn.

Tamién van facese artes visuales y trabayos con dellos grupos en Antur Waunfawr.

Celfeden sedrá una oportunidá pa tol mundiu pal cambéu d’idegues, tomar parte y cellebrar la so cultura. Cuntacuentos y poetes fadrán trabayos pa los neños demientres la selmana en Plas Glyn y Weddw. Los elementos d’esos trabayos fadrán una eshibición na fin de selmana en Plas Tan y Bwlch.

Más información de Celfeden en http://www.celfeden.com/

"Artea oinez 09" axunta 67 artistes pol euskera

Artea oinez 09 axunta obres de 67 artistes, pintores y escultores que sofiten la defensa del euskera, en Donostia.
Creyaciones de 67 artistes d’Euskal Herria conformen l’amuesa Artea oinez 09 qu’entamó ayeri nes Sales Kutxa Boulevard de Donostia. La propuesta, ye una de les iniciatives del Nafarroa Oinez qu’esti añu organiza la ikastola Andra Mari de Etxarri Aranatz, podrá visitase fasta’l próximu día 28.
Los creyadores presentes na esposición, qu’axunta pintura, escultura y cerámica, amuesen asina la so defensa del euskera que promueve la folixa de les ikastolas navarres. Baxo’l llema Txikiak handi , persiguen "vindicar la grandeza de les llingües minoritaries metanes l’actual globalización".
El vicepresidente de la Ikastola Andra Mari, el responsable de Rellaciones Institucionales de Kutxa, el representante de Gipuzkoako Ikastolen Elkartea, y l’artista Dora Salazar presentaron en rueda de prensa esta esposición colleutiva que gocia d’un ampliu repertoriu de téuniques. 67 nomes propios engrosen la llarga llista d’artistes que xunen arte y euskera.
Asina, na amuesa espónse la pieza Ezustekoa II , de la que se ficieron 40 répliques, como los años que cumple la ikastola Andra Mari. El restu les pieces distribúinse en tres plantes.

Tamién editóse un catálogu sobre l’amuesa, nel que’l so comisariu detalla que la mayor parte de les obres espuestes encartia na corriente abstrauta, anque tamién tán presentes la espresionista, la neofigurativa y la hiperrealista. El llirismu del paisaxe figurativu tamién ta ampliamente representáu.

Dora Salazar amás tien creyao semeyes llaminaes sobre los pueblos qu’apurren neños a la ikastola Andra Mari. El material compilóse na espublización Beriainen itzalean xunto con testos de siete escritores vascos: Pako Aristi, Toti Martínez de Lezea y Kirmen Uribe, ente otros.