Naz en Nueva York la Celtiberian Heritage Society pa espardir la música asturiana n’Estaos Xuníos

El que fuera presidente del Centru Español de Queens, el músicu gallegu asitáu en Nueva York dende va más de sesenta años, Bernardo Riveiro, vieno acabante de facer alitar la Celtiberian Heritage Society pa espardir la música asturiana n’Estaos Xuníos.

Son yá dellos los años que les bandes de gaites asturianes tomen la Quinta Avenida de Nueva York pa participar nel desfile de San Patriciu. Esti añu, la Banda Gaites de Llacín arrasó na ciudá estaunidense, pero tamién dientro de les nuestres fronteres; el videu de la so actuación roza’l millón de visites en Youtube y tolos medios de comunicación reflexaron tan destacada presencia. Sicasí, estes actuaciones nun sedríen posibles ensin el sofitu d’estremaes persones y organizaciones. La recién fundada Celtiberian Heritage Society (Sociedá Herencia Celtibérica), naz, nesti sen, como un pegoyu pa la esportación de la música asturiana n’Estaos Xuníos.

“Los gastos de traer a les bandes de gaites son altos y les sociedaes españoles ayuden económicamente, pero non abondo. Asina que dellos collacios asturianos, gallegos y yo mesmu creemos Celtiberian Heritage Society pa dedicanos namás a esti llabor, desendolcar un meyor trabayu y da-y más valor a daqué tan importante que tien que continuar”. Estes palabres son de Bernardo Riveiro (Tui, 1945), gallegu asitáu en Nueva York dende va más de sesenta años. En 1971 fundó y presidió’l Centru Español de Queens, lleva más de seis años sofitando económicamente a que bandes asturianes desfilen per Manahattan y agora embárcase nesti nuevu proyeutu.

Too entamó cola so actividá cuando yera presidente del Centru Español de Queens. “Tenemos clases y banda de gaites gallega y asturiana, amás de grupu de baille. Organizamos nueches celtes y traximos a tocar a grupos como Luar na Lubre”, desplica Riveiro. El siguiente pasu que dio cuéntalo asina: “Siempre que veníen bandes les acompañábemos nos desfiles y nes actuaciones. La xente que los veía, decía ‘¡Qué maravilla!’, pero toos s’entrugaben d’ónde yeren. Ehí decatéme del gran fallu; que dempués de tantos gastos y esfuercios pa venir a Nueva York, la xente nun sabía d’ónde veníen. Entós falé coles bandes y colos responsables de traeles, y lo primero que fice foi da-yos pancartes col nome la so banda y la so procedencia, pa facer la so información más visible. Dempués entamé a sofitales con tresportes, agospios, xintes… Porque vi un potencial mui granible pa espardir ente millones d’americanos daqué non conocío d’España y que diba acullá del flamencu”.

“Dalgunos sectores de la sociedá española tovía faen de menos a la gaita, pero n’Estaos Uníos la gaita ye reina: ta presente n’actos oficiales, desfiles o entierros”. Riviero fala con emoción de la bona acoyida que tán teniendo les bandes asturianes n’Estaos Xuníos: “Cada vegada tenemos más invitaciones, esti añu tamién actuemos en dos contaos del Estáu de Nueva Jersey, pal que vien yá tamos convidaos al Estáu de Connecticut, y les invitaciones siguen aportando, anque llamentamos que quizá’l presupuestu nun nos va dexar espardinos más”.

Pa valtar coles dificultaes, Celtiberian Heritage Society entama un importante percorríu que nagua por “promover la cultura asturiana n’Estaos Xuníos y que’l camín de les bandes a Nueva York seya más cenciellu”. Riveiro describe dalgunes de les acciones más inmediates que planeen: “Producimos el discu de Slum Suit –grupu del gaiteru uviedín residente en Nueva York Carlos Casado-, tamos preparando una nueche celta pa mayu, con un poco suerte tendremos a una banda asturiana equí n’ochobre y siguimos sofitando a la banda gaites La Mecigaya de Nueva York”.

72 años, más de cuatro décades al llombu dinamizando actividaes culturales y a esti gallegu emigráu entá-y queda enerxía. Ilusionáu con Celtiberian Heritage Society, ye claro a la hora de falar de les sos motivaciones: “El mio patriotismu y el mio amor a la cultura asturiana, gallega, andaluza… Anque conozo a munchos patriotes que s’escaecen de too namás que-yos toquen el bolsu”. Col so particular mecenazgu y la xera de la so nueva organización, Bernardo Riveiro va siguir trabayando p’aportar la so semiente al mundu la gaita: “Traer a les bandes ye caro y nos lleva trabayu enforma, pero paga la pena”.

Fonte: Asturnews

Pedro y Diego Pangua espublicen el llibru-CD ‘En Ca’l Gaiteiru’

Cubierta del llibru "En Ca'l Gaiteru" de Pedro y Diego Pangua

  Testos, partitures y sones formen esti trabayu que busca ampliar el repertoriu tradicional y promocionar la diversidá interpretativa y organolóxica de la gaita asturiana.

  Editáu por Tierra Llibros, ‘En Ca’l Gaiteiru’ repasa la trayeutoria de Pedro y Diego Pangua, padre y fíu, y, al empar, la variedá de repertorios gaiteros a lo llargo de la nuesa xeografía. En total son 180 páxines y 82 partitures, a los qu’hai sumar 21 pistes nun CD que faen d’esti trabayu una auténtica ayalga.

  Pedro, con 41 años al llombu tocando’l tambor, lleva toda una vida “dedicada a la música tradicional asturiana, faciendo de ponte ente los músicos vieyos, los depositarios d’una tradición musical de tresmisión oral, y los músicos nuevos, les más de les veces salíos d’un mediu urbanu. Una ponte construida día a día nes aules de les escueles de música y nos escenarios pisaos dientro y fuera d’Asturies”.

  Al so saber súmase’l de Diego, gaiteru de Felpeyu y tamién maestru de gaita. “‘En Ca’l Gaiteiru’ ye’l frutu natural d’esa vida como intérpretes y profesores: un discu nel que repasen el repertoriu que vienen tocando nos últimos años, acompañáu de 82 partitures, muestra del so trabayu de décades como maestros de gaita y percusión”, apunten dende la editorial.

Les fontes d’esti repertoriu           Pa la ellaboración de’esti trabayu, los Pangua utilizaron l’archivu propiu de Pedro y la esperiencia acumulada de dambos col pasu de los años, amás d’otros esternos, sobre manera’l de Xosé Antón Fernández ‘Ambás’. El llibru inclúi un CD que ye una bona amuesa del repertoriu actual de padre y fíu como pareya de gaita y tambor, con un espíritu purista que quier recordar a les cintes de cassette. “El formatu nun ye’l mesmu, pero l’espíritu sí: l’emplegu d’instrumentos antiguos y el respetu a la manera de tocar de cada gaiteru y de cada zona son los principios que guíen tol trabayu”, espliquen.

  Los dos autores pretenden con ‘En Ca’l Gaiteiru’ qu’ésti “fuere aprovecháu por tolos gaiteros asturianos en dos sentíos distintos. Lo primero, p’ampliar el so repertoriu. Ye innegable que n’Asturies actúa una fuerza centrípeta que lleva a casi tolos intérpretes a centrase nun garrapiellu de pieces consideraes como centrales, básiques y, en dellos casos, normatives. Pero hai muncho más, muncha música por descubrir. L’otru oxetivu ye promocionar la diversidá interpretativa y organolóxica de la gaita asturiana”. Esto ye, nun quedar namái en sumar más pieces al repertoriu, sinón “rescatar y valorar la diversidá qu’había hai décades nos patrones de construcción de gaites y na manera de tocales”.

  “Nes gaites con tercera neutra y subtónica que facíen dellos constructores del centru’l país y nes gaites de dixitación abierta o semiabierta que s’estilen hoi nes cuenques del Eo y del Navia, por poner dos exemplos, tenemos pistes abondes del trabayu que nos queda por facer a los gaiteros. Si tocamos una pieza tradicional d’una zona d’Asturies determinada, l’oxetivu ideal tien de ser facelo con una gaita que respete el tipu constructivu d’esa zona y emplegar los recursos técnicos típicos del informante que la tocaba”, demanden los autores.

  La xente interesao en mercar ‘En Ca’l Gaiteiru’ pue facelo en Musical Vila (Uviéu), Paradiso (Xixón) y Librería San Andrés (La Puela Ayande), asina como nel taller de Chus Solís. Nel casu de nun poder desplazase hasta estos puntos de venta, esiste la posiblidá de contautar con Diego Pangua al traviés del corréu electrónicu dpangua@gmail.com. Fonte: asturies.com

Fina la segunda temporada d'El Club Musical en TPA

Dixebra ye'l grupu que fai la despedida d'esta temporada

Dixebra  en plena actuación

   La segunda temporada del programa El Club Musical (martes, 23:00 h, TPA) llega al so fin teniendo como banda convidada a los avilesinos Dixebra, asina nel últimu capítulu van interpretar dellos de los temes que formen parte del discu que presentaben a principios d’añu, tituláu Tiempos modernos, y que los llevó a tocar per bien de llugares d’Asturies, del Estáu y mesmamente a nivel internacional. Nun van faltar tampoco dellos cantares yá clásicos nel repertoriu d’esta formación veterana, como «Mañana fría», «La danza» o «Nesti mundu traidor».

   Ente los otros conteníos del programa nun poemos escaecer que’l guitarrista y compositor Primi Abella y el cantante Xune Elipe van charrar sobre les connotaciones socio-polítiques d’esti trabayu nuevu, asina como de la so grabación, collaboradores y otres cuestiones sobre’l grupu y el discu. Los esteriores escoyíos fueron el paséu de la ría y les antigües instalaciones ferroviaries asitiaes al final d’él, polo que representen de pasáu y presente pa la villa avilesina.

   Otra manera, esta segunda temporada d’El Club Musical tuvo una acoyida mui bona y valió p’afitalu como’l gran referente musical audiovisual n’Asturies, per él pasaron trece propuestes sonores bien estremaes desarrollaes nel nuestru país, con un equilibriu ente les bandes yá consolidaes y otres emerxentes. Estilos como’l punk, el rock, el hip hop, l’indie, la canción d’autor, el folk o’l jazz tuvieron el so tiempu, asina como una presencia bultable de los grupos y artistes que desenvuelven el so llabor cola llingua asturiana como ferramienta de creación.

   Dende Goxe Producciones, encargada de la so realización, muéstrense persatisfechos y comenten que los cambios introducíos na estructura, na illuminación, nes secciones y nel planu visual tuvieron los resultaos esperaos y nagüen por poder siguir con esta esperiencia que ta valiendo pa dar a conocer la bayura y calidá de la escena musical asturiana.                                                                                                    Fonte: Asturies.com

L'anuariu de la Música Asturiana algama la so decimoquinta edición

La espublización que resume l'añu musical n'Asturies

      L’Anuariu de la Música Asturiana, cumple quince númberos na cai tres la llegada a los puntos de venta de la edición del 2013. El volume inclúi un CD con 19 cantares de dellos estilos.

     La portada d’esti númberu ta dedicada a l’amplia participación asturiana nel XLIII Festival Interceltique de Lorient, que vivió nel 2013 l’añu d’Asturies. Asina, les páxines centrales del anuariu van repasar a fondu  lo que dio de sí la representación del nuesu país nel certame más importante del mundu celta. Otros artículos destacaos son los reportaxes ‘(Sobre) Viviendo de la música’ o’l fotográficu y lliterariu sobre’l discu ‘Tiempos modernos’, de Dixebra; el repás a los diez años de trayeutoria de Skama la Rede; les cróniques dedicaes a los festivales Sol Celta d’Avilés y Arcu Atánticu de Xixón; l’informe ‘Cuando Lluis Llach nun sonaba na radio’, onde se fai una comparanza ente’l tratamientu que les radios públiques autonómiques dan a la música propia de les sos respectives comunidaes; entrevistes a Misiva y Pablo Carrera; y artículos d’opinión dedicaos, ente otres cuestiones, al trenta aniversariu de la Noite Celta de Porcía y a la polémica suspensión del conciertu d’Albert Pla en Xixón. Amás, caltiénense les seiciones ‘Anuncies’ y ‘Collecha’, ente otres.

     Ún de los apartaos más importantes del Anuariu de la Música Asturiana, l’editorial, va centrase nesta ocasión nel mercáu musical asturianu. Baxo’l nome de ‘Consumir música asturiana’, fai reflexones como la siguiente: “La solución a tou esti enguedeyu pasa inevitablemente por un mayor compromisu del poder públicu autonómicu, qu’entienda a la música asturiana non como un hobby d’unos cuantos ‘alloriaos’ o como un productu esclusivamente destináu al ociu, sinón como un posible campu d’actividá económica estable y un factor d’internacionalización d’Asturies perimportante, que pueda valir d’escaparate del país. Pero tamién los músicos tienen que ser conscientes del so papel, resistiendo n’époques de crisis y nun dexando qu’ésta amenorgue la so creatividá y productividá. Ensin escaecer a los sellos discográficos, qu’han d’ufiertar productos atractivos, guapos, con ‘pluses’ más allá de lo meramente musical qu’atrayan al posible comprador”.

    Goxe Producciones ye responsable de la edición del anuariu nesta segunda dómina del mesmu, con Xune Elipe otra vuelta como direutor. El volume, con más 100 páxines a too color, yá ta disponible nos puntos de venta avezaos –como L'Esperteyu (Uviéu); Trisquel, Paradiso y Sestaferia (Xixón); El Cafetón y El Cabanón (Avilés), Palabras de Caramelo (Candás); Cuévano (La Pola Siero); La Esbilla y Ringo Rango (Villaviciosa); o L'Abellugu y Habana (Mieres)– al preciu de 5 euros y incorpora un CD que resume les producciones apaecíes a lo llargo del añu 2013, con diecinueve temes que van de los soníos más tradicionales a los más contemporáneos: tonada, bandes de gaites, folk, canción d’autor y rock, ente otros.
    Fonte:  Asturies.com