La investigación contra'l cáncer abre les charres mensuales d'Ástura

Xosé Antón Suárez Puente

  Xosé Antón Suárez Puente va poner la conferencia 'De cáncer, xenomes y sidrón' esti martes nel Atenéu Obreru de Xixón.

  Aporta la seronda y, con ella, les esperaes charres de l'Asociación Cultural Ástura sobre cultura asturiana, que se celebren siempre el tercer martes de cada mes. L'encargáu d'abrir esti añu les conferencies ye Suárez Puente, profesor titular de Bioquímica y Bioloxía Molecular na Universidá d’Uviéu y miembru del Institutu Universitariu d’Oncoloxía (IUOPA), amás d'académicu.

  Na so intervención, l'investigador va falar sobre l'estáu de la cuestión al respeutive de les investigaciones sobre'l cáncer del equipu del Dr. Carlos López Otín. "El cáncer ye una enfermedá producía pola arrexuntanza de mutaciones nel xenoma. Poro, pa poder lluchar escontra esta malura, ye necesario conocer cuáles son les alteraciones del xenoma que faen qu’una célula sana se tresforme nuna célula tumoral. La secuenciación del xenoma d’un cáncanu ufierta la posibilidá de conocer tolos cambios importantes pa esti procesu, abriendo nueves víes pal diagnósticu, siguimientu y desendolcu de nueves terapies pa los pacientes oncolóxicos", apunten dende Ástura.

  El grupu de López Otín, al que pertenez Suárez Puente, foi’l primer grupu español en secuenciar un xenoma humanu, y el primeru del mundu en secuenciar el xenoma de 4 tumores. Anguaño ta acabante de completar la secuenciación de más de 500 xenomes del cáncer y d’otres enfermedaes, como cáncer de mamiella familiar, síndromes d’avieyamientu o miocardiopatíes. Estes investigaciones, feches dende l’IUOPA, tán revolucionando’l nuesu conocimientu del cáncer, y creando, dende Asturies, parte de lo que sedrá la medicina del futuru.

  La charra de Suárez Puente va principiar a les 20 hores, con entrada llibre hasta completar aforu.                                                                                                          Fonte: asturies.com

Pablo Suárez García y Xosé Antón Suárez Puente nomaos nuevos académicos correspondientes

 Según s’asoleyaba esta mañana nuna nota de prensa, la xunta estraordinaria de l’Academia de la Llingua Asturiana fecha’l pasáu xueves 10 de marzu, aprobó por unanimidá la propuesta de nomamientu de dos nuevos académicos correspondientes, los doctores D. Pablo Suárez García y D. Xosé Antón Suárez Puente.

Caricatura de Pablo Suárez García con su Quixote traducíu al asturianu 

  Pablo Suárez García (Udrión-Trubia, 1973) ye Llicenciáu n’Inxeniería Superior de Telecomunicaciones, en Matemátiques y en Filoloxía Hispánica; Doctor en Filoloxía pola Universidá d’Uviéu y Especialista en Filoloxía Asturiana. Ye autor de traducciones al asturianu y ediciones crítiques d’obres como’l Tirán el Blancu, coeditáu cola Acadèmia Valenciana de la Llengua, Proses profanes y la Tragédia de Caldesa de Joan Roís de Corella. Tamién ye’l traductor de la versión al asturianu d’El Quixote de Miguel de Cervantes. Collaborador d’esta Academia, participa nes «Xornaes Internacionales d’Estudiu» y foi premiáu en delles ocasiones nos Concursos d’Investigación de la institución.

El científicu ya investigador asturianu Xosé Antón Suárez Puente

  Xosé Antón Suárez Puente (Uviéu, 1971) ye Doctor en Bioloxía y miembru destacáu del Institutu Universitariu d’Oncoloxía de la Universidá d’Uviéu que dirixe’l profesor Carlos López Otín. Suárez Puente emplega davezu l’asturianu en conferencies y seminarios de divulgación de los avances científicos del IUOPA. Asina mesmo, ye traductor de programes informáticos al asturianu, como’l navegador Firefox, y gracies al so llabor llogróse la reconocencia per parte del comité ISO del códigu ISO-639 pa la llingua asturiana (ast), requisitu indispensable pa la so reconocencia n’Internet. Collaborador d’esta institución, ye miembru del Comité d’Espublización de la revista dixital Ciencies. Cartafueyos asturianos de Ciencia y Teunoloxía, editada pola Universidá d’Uviéu y esta Academia, y onde tien asoleyaos dellos artículos.

  Los dos nuevos correspondientes serán nomaos el próximu 6 de mayu, XXXVII DÍA DE LES LLETRES ASTURIANES.                                                     Fonte: asturnews.com

Xosé Antón Suárez Puente, el segundu académicu de 2016

A la manzorga de la semeya Xosé Antón Suárez Puente

  Güei, l'Academia de la Llingua Asturiana dio a conocer que Xosé Antón Suárez Puente(Uviéu,1971) va ser tamién nomáu académicu el próximu 6 de mayu.

  El viernes pasáu, Pablo Suárez Garcíacomentaba nes redes sociales que l'Academia de la Llingua Asturiana taba acabante comunica-y la so decisión de nomalu académicu en 2016, y esta mañana l'ALLA confirma esti nomamientu al empar qu'informa d'un segundu nomamientu.

  García Puente ye Doctor en Bioloxía y miembru destacáu del Institutu Universitariu d’Oncoloxía de la Universidá d’Uviéu que dirixe’l profesor Carlos López Otín.

Carlos López-Otín, Xosé Antón Suárez Puente y Gonzalo Rodríguez Ordóñez 

  Suárez Puente emplega davezu l’asturianu en conferencies y seminarios de divulgación de los avances científicos delIUOPA. Asina mesmo, ye traductor de programes informáticos al asturianu, como’l navegador Firefox, y gracies al so llabor llogróse la reconocencia per parte del comité ISO del códigu ISO-639 pa la llingua asturiana (ast), requisitu indispensable pa la so reconocencia n’Internet.

  Ye collaborador de l'Academia de la Llingua Asturiana y miembru del Comité d’Espublización de la revista dixital Ciencies. Cartafueyos asturianos de Ciencia y Teunoloxía, editada pola Universidá d’Uviéu y l'Academia, onde tien asoleyaos dellos artículos.
Fonte: Asturies.com