Sayambre acoyó la V Xornada de Patrimoniu Llingüísticu

Cartelu de la V Xornada n'Oseya de Sayambre

   El Teixu, Rede pal Estudiu y Defensa de la Llingua Asturllionesa celebrí esti sábadu 29 d’agostu, cola colaboración del Ayuntamiento de Oseja de Sajambre, una nueva edición de la Xornada de Patrimoniu Llingüísticu y Cultural, qu’esti añu tuvo llugar n’Oseya.

  A lo llargo de la Xornada, pela escuela de la capital sayambriega pasaron Xosé Antón Fernández “Ambás”, Ramsés Ilesies, Ramón Sordo Sotres, Javier Valentín Rodríguez Bulnes, Gonzalo Barrena, Elena E. Rodríguez Díaz y Fran Allegre, que participaron nun programa qu’incluyía conferencias, presentaciones de llibros, un conciertu y un recital poético-musical.
  La xornada entamaba con un conciertu de Xosé Antón Fernández “Ambás” y Ramsés Ilesies onde recoyíen música tradicional sayambriega, con pieces musicales recoyíes pelos distintos llugares del conceyu. Y pela tarde tuvo llugar la conferencia Enteradores de Sayambre, Valdión y otros conceyos, na que l’escritor Ramón Sordo Sotres averose a la figura d’Ismael Redondo, vecín del pueblu de Pio y autor d’un textu escritu en sayambriegu, amás d’otros informantes llingüísticos de la zona. N’acabando, Javier Valentín Rodríguez Bulnes presentarba so llibru El habla de Maraña, nel que recueye las características de la llengua d’esti conceyu de la montaña oriental llionesa.

  Una conferencia sobre los nombres de los sitios sayambriegos de Gonzalo Barrena, perconocedor de la toponimia de los Picos d’Europa y otra de la profesora de la Universidá de Güelva Elena E. Rodríguez Díaz, presentando so llibru Notas y cuadernos de notas de los Piñán, escribanos públicos de Sayambre (1659-1721), un estudiu exhaustivu de los fondos d’esti arquivu sayambriegu, completaben el programa,
La xornada pesllabala l’escritor y músicu Fran Allegre, qu’ufrió un recital poéticu-musical con textos del so llibru Deixando’l cuerpu, acabante publicar.

  Les Xornaes de Patrimoniu Llingüísticu y Cultural, organizaes alternativamente por El Teixu y l’asociación Faceira, celébrense anualmente en distintos llugares de la provincia de Llión y pretenden destacar el valor incalculable de las variedades del asturllionés que sobreviven nestas zonas. Dimpués de ḥacese n’Estorga, Llión, Viḷḷablinu y Villamejil, El Teixu quixo arimase a una de las variedades más olvidaes del asturianu, la oriental, celebrando esta quinta edición nel únicu conceyu qu’entavía la conserva en Llión. Fonte: asturnews.com

El Teixu presenta un mapa cola toponimia tradicional del conceyu de Tinéu

   El Teixu, Rede pal Estudiu y Defensa de la Llingua Asturllionesa presenta un mapa de Tinéu que representa los nomes tradicionales de tódolos ḷḷugares del conceyu, recoíos directamente n’encuestas a los vecinos. Esti mapa, qu’inclúi tamién datos d’oronimia ya hidronimia, vei ser presentáu dientro del programa del homenaxe a Manuel Menéndez García que se celebra esti vienres 27 de febreiru, a partir de las 17:00 horas, na Casa de Cultura de Navelgas.

   Ḷḷugares ya brañas cumo Xinestaza, Buḷḷacente, Xera, Silvayyana ou Caeras; cursos d’augua cumo El Ríu Mirayu, El Ríu Faxeirúa ou L’Esva; picos cumo Muḷḷeirosu, Penafilera ou Capieḷḷamartín… Alredor de setecientos topónimos, recoíos íntegramente n’encuestas orales feitas en tódalas parroquias del conceyu, xúntanse nesti trabayu a todu color publicáu por El Teixu, qu’incorpora tamién un mapa parroquial del conceyu, amás de territorios supralocales, casas sueltas, sierras ya puertos de montaña.

   El mapa, que se vei distribuír ḷḷou por todu’l conceyu de Tinéu, estrénase esti vienres 27 na Casa de Cultura de Navelgas, dientro del actu “Manuel Menéndez ya la Asturias occidental mediu sieglu despuéis”. Fernando Álvarez-Balbuena García, Andrés Menéndez Blanco ya Mónica Rodríguez Riesgo, autores del trabayu, van ser los encargaos de presentar esti mapa, que cuenta tamién cona colaboración d’Ignacio González, María Cueto, Ramsés Ilesies ya David González. El deseñu del material cartográficu ta al cargu d’Andrés Menéndez Blanco.

Con esta publicación, El Teixu, que tien por obxectivu l’estudiu, la divulgación ya la defensa de la ḷḷingua popular del espaciu asturḷḷionés, inicia una colección de mapas toponímicos de todu’l territoriu d’esti idioma. Asina, quier dignificar ya reconecer el valor d’un patrimoniu, el toponímicu, qu’inda pervive na sua forma tradicional en Tinéu ya no restu del dominiu asturḷḷionés. Documentalu, aprecialu ya usalu yía la forma d’evitar que se perda esti tesouru de valor incalculable que yía la toponimia popular tradicional.

   L’homenaxe “Manuel Menéndez ya la Asturias occidental mediu sieglu despuéis”, no que se vei presentar esti mapa, ta organizáu pol Seminariu de Filoloxía Asturiana, el Real Instituto de Estudios Asturianos, l’Aula Valdés-Salas, la Fundación Valdés-Salas ya la Fundación Aula de las Metáforas. Esti actu vei encomenzar a las 17:00 horas d’esti vienres cola intervención de Ramón Rodríguez Álvarez ya cuenta tamién cona presentación del ḷḷibru inéditu de Manuel Menéndez El Cuarto de los Valles. III. Toponimia, refranes y conjuros ya con un recital de poesía al cargu de los poetas Xuan Bello, Antón García ya Miguel Rojo.                                        Fonte: elteixu.org

El Teixu lleva a Llaciana, Palacios, Páramu y el Bierciu oriental la so campaña de normalización del asturllionés

Tres l'ésitu de la campaña en Toreno, esparden la so iniciativa

Campaña de normalización del asturllionés

   El Teixu, Rede pal Estudiu y Defensa de la Llingua Asturllionesa, llevóu estas últimas sumanas a los territorios de Ḷḷaciana, Palacios, Páramu y l’oriente d’El Bierciu la súa campaña de retulación de locales públicos, desenvolvida baxo’l títulu “Na llingua de casa”. Esta iniciativa, que quier facer visible l’asturllionés nos espacios de socialización cotidiana, de manera que la llingua estía presente con normalidá, empicipióu yá l'añu pasáu con gran éxitu nel conceyu de Torenu.

   Col obxectivu de visibilizar l’asturllionés nos municipios y comarcas citaos, miembros y colaboradores d’El Teixu están repartiendo de balde ente los comercios y establecimientos públicos d'estas zonas trés tipos distintos de carteles. Los primeiros sirven pa indicar si los locales están abiertos o pechaos (¡Pasade! Esti sitiu está abiertu / Sentímoslo, esti sitiu está pecháu), outros pa señalar la dirección na qu’abren las puertas (tirare / emburriare) y, p’acabar, los últimos distinguen los baños de muyeres (mucheres, na variedá noroccidental) y homes. Están disponibles con diseños y colores variaos pa poder adaptase meyor a la estética de cada sitiu.

   La campaña de normalización “Na llingua de casa” iniciárase l'añu pasáu con gran éxitu nel conceyu de Torenu. Prácticamente tódolos establecimientos d'esti municipiu acoyoron con entusiasmu los carteles, col resultáu de que s'agotó toda la tirada prevista pa esa zona y s'aumentó considerablemente la visibilidá de la llingua. La campaña está pensada pa extendese por tódolos territorios falantes d’asturllionés de Llión y Zamora, y está adaptada a las distintas variedades de la llingua, de manera que favorezan una mayor identificación de los falantes conos carteles.

   Nas comarcas onde l’asturllionés ye llingua propia, l’idioma vive principalmente “en casa”, ausente de rétulos y señalizaciones públicas. Nesas circunstancias, muitos falantes chegan a pensar que la súa llingua materna nun val pa usase nos ámbitos públicos o formales, o mesmamente na escritura. Por esa razón, parez necesario fomentar la visualización de la nuesa llingua a fin d’amostrala abiertamente y con dignidá, superando desprecios y vergüenzas antiguos que tienen que quedar barríos definitivamente d’una sociedá qu’ha de mirar al futuru sin facer de menos la cultura popular heredada de las xeneraciones que nos precedioron.

   Con esta campaña, El Teixu quier dar un pasu más na súa defensa de la llingua asturllionesa, amostrando non solo qu’esta sigue viva en Ḷḷaciana, Palacios, Páramu y l’oriente d’El Bierciu, sinón tamién qu’hai xente dispuesta a usala y visibilizala si se-yes dan las oportunidades pa ello. Esti llabor, que debieran tar faciendo la Xunta de Castiella y Llión y outras alministraciones públicas, queda güei en manos de la voluntá y l’esfuerzu de las asociaciones.

   El Teixu, Rede pal Estudiu y Defensa de la Llingua Asturllionesa ye una asociación fundada nel 2007 n’Estorga por xente de La Tierra de Miranda, Zamora, Llión y Asturias pa defender l’asturllionés dende la súa unidá y el respectu a las variedades internas. Pa ello desenvuelve actividades d’estudiu, divulgación y promoción por todu l’ámbitu del idioma.                                                                                            Fonte: InfoAsturies