‘Nora na viesca los milenta güeyos', historia nueva de Trexu pa mayores de 8 años

Trexu, a la izquierda, na presentación del llibru en Xixón xunto cola editora Esther Prieto y la ilustradora Violeta Mateu.

   Helena Trexu presenta una obra nueva de lliteratura infantil, de nome ‘Nora na viesca los milenta güeyos’. Editáu por Trabe, esti llibru que cuenta l'aventura prestosa d’una rapacina presumida y espabilada ta dirixíu a neños y neñes mayores de 8 años.

   Nora recibe’l día del so cumpleaños, que coincide col martes d’Antroxu, una visita bien rara y sorprendente. Trátase d’un pládanu que tien voz y güeyos que recibiera’l mandáu de llevala a conocer la viesca los milenta güeyos, onde va vivir bien d’aventures. ‘Nora na viesca los milenta güeyos’ ye un cuentu qu'invita a la imaxinación, al empar que conciencia na igualdá de xéneru al facer protagonista a una neña como respuesta a toles histories onde la mayoría son neños los protagonistes.

   Na historia tamién ta presente el valor de la familia como referente seguru na neñez, asina como’l valor de la naturaleza y la ecoloxía dando voz a la viesca. Esta obra nueva de Trexu súmase a otres anteriores enfocaes al públicu infantil como ‘Llara quier ser astrónoma’, ‘Olaya n’África’ o ‘Mitoloxía asturiana pa rapacinos y rapacines’, ente otros munchos.                                                Fonte: asturies.com

Presentación de "Poética de Muyeres 2014" en Piedrasblancas

Cartelu  de  Poética de Muyeres 2014

Nel Valey dende les 19:30.

   Esti xueves 18 d'avientu dende les 19:30 hores va tener llugar nel Valey Centru Cultural de Piedrasblancas la tercer presentación de "Poética de Muyeres 2014", trabayu editáu pol Grupu Epona y que recueye'l facer poéticu de numberoses muyeres, como Esther García, Lourdes Álvarez, Llucía Fernández, o Marta Mori, ente otres. Dalgunes de les autores recoyíes nesta obra van facer llectura de dalgunu de los sos poemes, too ello cola presentación a cargu d'Inaciu Galán.         Fonte: Infoasturies.net

Helena Trexu presenta “Llara quier ser astrónoma” en LlibrUviéu

El xueves 17 de mayu, a les seis y media la tarde, presentaráse en LlibrUviéu, la feria del llibru de la capital asturiana, el volume pa neños 'Llara quier ser astrónoma” de l'autora asturiana Helena Trexu Fombella. La hestoria foi ganadora del Premiu Asturnews de Lliteratura Infantil y Xuvenil. La presentación va tar a cargu de José Luis Remis, asesor d'enseñances en llingua asturiana de la Conseyería de Cultura.
“Llara quier ser astrónoma” ye un volume xuvenil onde se cuenta la hestoria de Llara, una neña a la que-y prestaría atopar otru planeta onde tol mundu seya feliz y por eso quier ser astrónoma, y ta asoleyáu pol Grupu Epona.
Helena Trexu tien tres de si una llarga carrera lliteraria con munchos premios y una montonera llibros publicaos que toquen tolos xéneros y temátiques, anque nos últimos años vien centrando’l so llabor na lliteratura infantil y xuvenil.

Fonte: asturnews