'Nun-yos tengas percerguera' yá tien segunda parte

Cubierta del llibru

   Sidoro Villa Costales, autor de 'Nun-yos tengas perceguera', espubliza la segunda parte d'esta obra qu'axunta poesía y animales pa disfrute de los sos munchos siguidores. La primera, editada tamién por Trabe, ta escosada.

  "Al traviés de la poesía, Sidoro Villa, vuelve otra vegada a esplicar a los rapacinos y rapacines les maneres de vida y los sentimientos (que tamién los tienen) de los animales que pueblen la tierra d’Asturies. 'Nun-yos tengas perceguera 2' ye un prestosu y atractivu llibru qu’avera a la xente menudo al mundu animal y a la poesía, dos escentricidaes nel mundu de la postmodernidá tecnolóxica", espliquen dende la editorial con sede n'Uviéu.

  El llibru tien un preciu de 7 euros y destaca, al igual que la primer parte, polos dibuxos qu'acompañen a les histories que protagonicen y viven esos animalinos qu’atopamos na ñatura y que mos faen munches veces recular cuando los atopamos. 'Nun-yos tengas percerguera' ye llectura recomendada nos llibros de testu de Llingua Asturiana y Lliteratur en Primaria, al tar indicáu pa neños y neñes mayores de 7 años.                                                                                                                Fonte: asturies.com

Xuan Xosé Sánchez Vicente presenta’l so poemariu últimu n’Uviéu y Xixón

Cartelu

   Esti llunes, día 11 de xineru, a les 19, 30 hores, va presentase De les hores y les memories, poemariu últimu de Xuan Xosé Sánchez Vicente, nel Club de Prensa Asturiana, nel Salón d’Actos de la Fundación CaxAstur Liberbank d’Uviéu.

  Nesta primer presentación, n’Uviéu, van abellugar al autor l’editor Antón garcía y la poeta esther Prieto, d’Ediciones Trabe. La presentación del poemariu en Xixón va ser el día  14 na llibrería La Buena Letra, na cai Casimiro Velasco, 12 a les 8 la tarde, y nes dos presentaciones ta prevista la llectura de poemes pol autor.

  Había más d’una década que Xuan Xosé Sánchez Vicente nun publicara un llibru de poesía y por eso ye enforma bien recibía l’apaición d’esta “obra de madurez”, como la noma la Editorial Trabe, na que l’autor algama gran altor llíricu y na que’l yo poéticu s’amuesa rescamplante. Ye “una poesía del sosiegu y de la serenidá que da l’aceptación de la vida y de la muerte” porque “en poemes de corte clásicu que s’allarguen como l’alcordanza, va esgranando Sánchez Vicente los grandes temes de la lliteratura universal, el pasu del tiempu, el amor y la muerte, con versos trescalaos de serena señardá polo perdío y de referencies lliteraries al tiempu que la naturaleza va, a poco y a poco, ganando protagonismu”.

  Xuan Xosé Sánchez Vicente (Xixón, 1949) ye un nome imprescindible de les lletres asturianes: poeta, narrador, dramaturgu y articulista agudu y reflexivu, la so obra, bayurosa y variada, empobina yá’l camín de los clásicos. Asina los sos poemarios Camín de señardaes (1980), Poemes de Xixón (1981), De reidores costes (1988), …Y de llastientes picos (1999) y As de corazones (2001).                              Fonte: asturnews.com

‘Nora na viesca los milenta güeyos', historia nueva de Trexu pa mayores de 8 años

Trexu, a la izquierda, na presentación del llibru en Xixón xunto cola editora Esther Prieto y la ilustradora Violeta Mateu.

   Helena Trexu presenta una obra nueva de lliteratura infantil, de nome ‘Nora na viesca los milenta güeyos’. Editáu por Trabe, esti llibru que cuenta l'aventura prestosa d’una rapacina presumida y espabilada ta dirixíu a neños y neñes mayores de 8 años.

   Nora recibe’l día del so cumpleaños, que coincide col martes d’Antroxu, una visita bien rara y sorprendente. Trátase d’un pládanu que tien voz y güeyos que recibiera’l mandáu de llevala a conocer la viesca los milenta güeyos, onde va vivir bien d’aventures. ‘Nora na viesca los milenta güeyos’ ye un cuentu qu'invita a la imaxinación, al empar que conciencia na igualdá de xéneru al facer protagonista a una neña como respuesta a toles histories onde la mayoría son neños los protagonistes.

   Na historia tamién ta presente el valor de la familia como referente seguru na neñez, asina como’l valor de la naturaleza y la ecoloxía dando voz a la viesca. Esta obra nueva de Trexu súmase a otres anteriores enfocaes al públicu infantil como ‘Llara quier ser astrónoma’, ‘Olaya n’África’ o ‘Mitoloxía asturiana pa rapacinos y rapacines’, ente otros munchos.                                                Fonte: asturies.com