Podemos entruga al Gobiernu estatal cuándo va adaptar la toponimia oficial asturiana

• por Pablo R. Guardado

La diputada Sofía Fernández Castañón unvió una entruga con ruegu de respuesta per escrito al Gobiernu estatal cola fin de conocer cuándo va adaptar la toponimia oficial asturiana nes sos bases de datos. Podemos quier que s’emplegue en cartelos y comunicaciones internes y esternes, como marca la llei.

La entruga concreta fecha por Fernández Castañón la selmana pasada ye ‘¿En qué fecha va’l Gobienu a adaptar la toponimia presente nes sos bases de datos y usada nes sos comunicaciones internes y esternes, rotulación de víes públiques, carreteres, aeropuertos y ferrocarriles de la so titularidá o dependientes d’él, a fin d’actualizar y utilizar los topónimos oficiales del Principáu d’Asturies p’asina cumplir colo llexislao?’. Enantes, la diputada de Podemos por Asturies fai una esposición de motivos nos que recuerda que la toponimia asturiana ye oficial en 54 de los 78 conceyos, quedando asina derogada la castellana, y fai referencia al Estatutu d’Autonomía y a la Llei d’Usu y Promoción del Bable/Asturianu.

D’igual forma, apunta que “pese a ser d’obligáu cumplimientu pa toles alministraciones”, tanto “na Rede de Carreteres del Estáu como nel ferrocarril públicu y nos puertos y aeropuertos siguen ensin figurar estos topónimos oficiales”. Nun ye la primer vegada que Podemos fai una consulta d’esti calter, yá que hai menos d’un mes l’otru diputáu asturianu de la formación, Segundo González García, tresmitió al Executivu estatal una entruga sobre l’incumplimientu de la toponimia oficial por parte de Renfe nes estaciones asturianes.

Fonte: Asturies.com

El Gobiernu estatal frena la creación de la especialidá docente de Llingua Asturiana por tar en funciones

. La creación de la especialidá docente entra nuna fase de parálisis

• . Podemos ufre'l so sofitu a Alonso pa que la especialidá docente nun tea en riesgu

Xenaro Alonso fala na Xunta Xeneral asturiana

   Genaro Alonso acusa de "desllealtá" al Gobiernu de Mariano Rajoy por camudar de postura sobre la creación de la especialidá de Llingua Asturiana. Diz agora que modificar el real decretu d'especialidaes ye "imposible" al tar en funciones y el conseyeru rellaciona esta decisión cola postura contraria del PP asturianu a la normalización.

  El secretariu d'Estáu d'Educación, Formación Profesional y Universidaes, Marcial Marín, comunicó al Gobiernu asturianu que la única vía posible pa la reconocencia ye'l cambiu del real decretu 1834/2008, d'especialidaes, un trámite que xulga agora “imposible” de facer pol contestu políticu. “El Gobiernu central desdizse asina del alcuerdu adoptáu pa siguir col diálogu y los llabores del grupu de trabayu, una actitú dafechu deslleal, porque la situación actual del Executivu en funciones ye exautamente la mesma que cuando s'alcordó siguir cola negociación”, esplicó Alonso.

  La reunión prevista p'ayeri cancelóse díes enantes per parte de Madrid tres l'anuncia de Marín d'esta circunstancia a la Conseyería d'Educación y Cultura, que tenía preparada una documentación colos antecedentes de la negociación, la propuesta de decretos de creación de la especialidá docente y la solicitú pa la posterior reconocencia per parte del ministeriu. Tamién incluyía, según espliquen dende'l Gobiernu, una serie d'informes que xustifiquen la necesidá de resolver la situación actual, como'l dictame del Conseyu Escolar del Estáu, casos de profesoráu en llingües propies d'otres comunidaes y la normativa vixente n'Asturies sobre'l tratamientu educativu del asturianu y el gallego-asturiano, amás d'otros estudios d'interés.

La política del PP sobre la normalización          "Esta situación d'incumplimientu de los compromisos alcordaos y de desllealtá institucional concuerda cola política que ta faciendo'l PP d'Asturies, qu'intenta torpediar el procesu de normalización del asturianu y del gallego-asturiano con iniciatives incomprensibles”, afirmó Alonso, que cita, ente otres actuaciones, el boicó de los populares al usu del asturianu xunto col castellán na Xunta Xeneral del Principáu, la impugnación del Plan de Normalización Llingüística de Carreño y la rotura, agora, del procesu de negociación pa consiguir la especialidá docente del profesoráu de Llingua Asturiana y Lliteratura y Gallego-Asturiano.

  Sicasí, el conseyeru apunta que'l so departamentu va siguir trabayando pa llograr la reconocencia de la especialidá y avanzó que va buscar sofitos a favor d'esta midida ente los grupos parllamentarios de la Xunta Xeneral, na Conferencia Sectorial d'Educación y nel restu de comunidaes autónomes. “La reconocencia de la especialidá nes mesmes condiciones que'l restu ye la forma más afayadiza de dignificar la enseñanza del asturianu y la situación de los más de 300 docentes que la imparten de forma regular na inmensa mayoría de los centros educativos”, añadió.                                                                      Fonte: asturies.com