'Nun-yos tengas percerguera' yá tien segunda parte

Cubierta del llibru

   Sidoro Villa Costales, autor de 'Nun-yos tengas perceguera', espubliza la segunda parte d'esta obra qu'axunta poesía y animales pa disfrute de los sos munchos siguidores. La primera, editada tamién por Trabe, ta escosada.

  "Al traviés de la poesía, Sidoro Villa, vuelve otra vegada a esplicar a los rapacinos y rapacines les maneres de vida y los sentimientos (que tamién los tienen) de los animales que pueblen la tierra d’Asturies. 'Nun-yos tengas perceguera 2' ye un prestosu y atractivu llibru qu’avera a la xente menudo al mundu animal y a la poesía, dos escentricidaes nel mundu de la postmodernidá tecnolóxica", espliquen dende la editorial con sede n'Uviéu.

  El llibru tien un preciu de 7 euros y destaca, al igual que la primer parte, polos dibuxos qu'acompañen a les histories que protagonicen y viven esos animalinos qu’atopamos na ñatura y que mos faen munches veces recular cuando los atopamos. 'Nun-yos tengas percerguera' ye llectura recomendada nos llibros de testu de Llingua Asturiana y Lliteratur en Primaria, al tar indicáu pa neños y neñes mayores de 7 años.                                                                                                                Fonte: asturies.com

Sidoro Villa Costales espón na Casa Cultura de La Pola

Sidoro Villa Costales espón na Casa la Cultura de La Pola Siero

 

   ‘Bacu y otra xente (retratos con mensaxe)’ ye’l nome de la esposición de Sidoro Villa Costales que s’inaugura mañana na Casa la Cultura de Siero. Ésta conxuga lo pictórico y lo lliterario, al incorporar poesíes n’asturianu a cada obra.
   L’ilustrador, escritor y maestru sierense presenta dellos retratos y caricaretratos fechos al acrílicu nos que presenta xente conocío de La Pola Siero y la redolada. Amás, acompaña cada obra d’un pequeñu poema en llingua asturiana que tien que ver con caún de los personaxes protagonistes, dando-y a la esposición una doble vertiente: pictórica y lliteraria.
   La muestra va tar abierta al públicu na sala d’esposiciones de la Casa la Cultura de Siero a partir de mañana y hasta’l 19 de xunetu, n’horariu de 18 a 21 hores, de llunes a vienres. La inauguración va tener llugar mañana a les 20 hores. Otra manera, esta esposición va compartir espaciu con otra dedicada a los Picos d’Europa del paisaxista Carlos Sempere.

Fonte:  Asturies.com