Nueu casu d’Asturfobia en Siero

Un ciudadanu denuncia problemes a la hora de presentar un escritu n’asturianu na Casa Conceyu de Siero

12 de xunu 2017, 11 de la mañana, Ayuntamientu de Siero. F.M, vecín de Muñó (Siero) diríxese a la so Casa Conceyu col envís d’iguar un trámite municipal. L’escritu que va a presentar ta fechu na so propia llingua, llegalmente reconocía como mediu de comunicación pente les istituciones y los ciudadanos.

Sicasí, F.M. va alcontrase con un problema: la funcionaria niégase a almitir el documentu col argumentu de que nun lo entiende y desixe que-y lo torne, que repita’l documentu, esta vegada en español. Un escenariu que se repite continuamente y que non siempres alcuentra enfrente con una persona dimpuesta a llantar cara ante la discriminación. Son permunchos los asturianos y asturianes que, ante esperiencies comu esta, opten por autocensurase y presentar los sos escritos na llingua impuesta.

“Siguimos igual qu`hai 40 años” declara l’afeutáu “Un drechu básicu pisotiáu por una funcionaria que se supón que ta ehí pa protexer los derechos ciudadanos, o eso creen munchos ilusos que defenden el sistema funcionarial español. La realidá ye qu`actuen asina porque se sienten impunes.” La discriminación a los falantes d`asturianu ta al orden del díi y dende delles organizaciones, como Andecha Astur o Iniciativa pol Asturiano anímase a la población a denunciar públicamente situaciones comu esta que costitúin auténticos casos d’apartheid llingüísticu, inadmisibles nesta dómina.

L’asturianu ta reconocíu como llingua minorizada pola mesma UNESCO, recoyía como llingua a protexer dientro les direutives del Parllamentu Européu y teóricamente defendía por una Llei de proteición y Usu que data del añu 1.998.  Da lo mesmo, demientres nun tenga la Oficialidá se pongan en marcha les midíes llegales correspondientes, habrá ignorantes que se crean con drechu a dicinos que yos lo tornemos, que nun lo entienden…
Fonte: Infoasturies

Siero tamién tendrá ordenanza d'usu del asturianu

• por Pablo R. Guardado

La propuesta de Somos Siero salió alantre nel Plenu del xueves col sofitu de PSOE, Foro, IX y la Plataforma Vecinal de La Fresneda, y l'astención de PP y PINSI. El voceru de la candidatura de xunidá popular, Javier Pintado, espera que tea llista pa depués del branu.

"Tamos mui contentos, sobre manera pol apoyu grande que nos mostraron Foro, PSOE y IX", afirma Pintado, que llamenta "intervenciones d'otros tiempos" mientres l'alderique de la propuesta pa la redaición de la ordenanza que regularizará l'emplegu del idioma. En concreto referíase a la vocera del Partido Popular (PP), Beatriz Polledo, que reinvindicó que la llingua materna de los sierenses "ye l'español", pa depués afirmar que los partidarios del asturianu son "un grupu minoritariu que lu defende porque hai subvención".

Los populares, que siguen una llinia d'ataque continuu al idioma nos meses últimos dende'l refugu de la so presidenta Mercedes Fernández al usu de la llingua asturiana na Xunta Xeneral, qu'esta selmana tuvo repercusión por mor de l'anulación por parte de la Delegación del Gobiernu estatal n'Asturies del Plan de Normalización Llingüística de Carreño, sicasí s'astuvieron na votación, al igual que'l Partido Independiente de Siero (PINSI). L'edil Juan Camino Fernández sí que se declaró favoratible al asturianu, pero non a una supuesta imposición nin a aumentar el gastu corriente.

"Tenemos que facer un trabayu de didáutica; esplicar que l'asturianu ye de nueso, que forma parte de nós y que nun hai qu'avergoñase d'ello", apunta Pintado, qu'espera que'l testu tenga "si non unanimidá, si un apoyu mayoritoriu". De momento, Somos Siero aceptó la enmienda presentada pol PSOE, que demandaba "pa sospresa de nós", que la redaición corriera a cargu de téunicos municipales, dalgo que la candidatura de xunidá popular daba por fecho.

En setiembre

Tres l'aprobación en Plenu de la redaición de la ordenanza, l'equipu del Gobiernu del PSOE habrá d'encargar a los téunicos la ellaboración del borrador pal so alderique y modificación na Comisión de Cultura. Darréu dirá a Plenu pa la so aprobación y pasu posterior a información pública, enantes del so afitamientu definitivu.

Pintado cuenta con que'l Conceyu de Siero pueda cuntar "cola ordenanza pa setiembre si too va bien". Na so páxina web, Somos Siero tien espublizao una propuesta de testu pa la mesma compuestu por 17 capítulos dividíos en seis capítulos.

Fonte: Asturies.com